Lifestyle: સાવધાન! ડાયાબિટીસ અને સ્થૂળતાની દવાઓ છીનવી શકે છે તમારા વાળ, રિસર્ચમાં સામે આવ્યું મોટું સત્ય

ખરાબ લાઈફસ્ટાઈલના કારણે આજના સમયમાં ડાયાબિટીસ અને સ્થૂળતા (ઓબેસિટી) ની સમસ્યા ખૂબ જ ઝડપથી વધી રહી છે. ડાયાબિટીસને કંટ્રોલમાં રાખવા માટે દવાઓ લેવી અનિવાર્ય છે, તો બીજી તરફ વજન ઘટાડવા માટે પણ લોકો કસરત કરવાના બદલે દવાઓ પર આધાર રાખવા લાગ્યા છે. પરંતુ તાજેતરમાં સામે આવેલા એક સંશોધનમાં ચોંકાવનારો ખુલાસો થયો છે કે, ડાયાબિટીસ અને વજન ઘટાડવાની કેટલીક દવાઓ ભલે શરીરને ફાયદો પહોંચાડતી હોય, પરંતુ તેનાથી વાળ ખરવાની સમસ્યા અને ટાલ પડવાનું જોખમ વધી શકે છે.

વાળ પર દવાઓની આડઅસર

નવા અભ્યાસ અનુસાર, ડાયાબિટીસ અને વજન ઘટાડવા માટે વપરાતી GLP-1 રિસેપ્ટર એગોનિસ્ટ દવાઓ (જેમ કે સેમાગ્લુટાઈડ અને ટિરઝેપેટાઈડ) ના કારણે ગંભીર રીતે હેર ફોલ થઈ શકે છે. સંશોધકોએ શોધી કાઢ્યું છે કે GLP-1RA દવાઓ લેતા દર્દીઓમાં SGLT-2 ઈન્હિબિટર્સ લેનારાઓની સરખામણીએ ટાલ પડવાની શક્યતા ૩૭% વધુ હતી, જ્યારે DPP-4 ઈન્હિબિટર્સ લેનારાઓની સરખામણીએ આ જોખમ ૬૮% જેટલું વધુ જોવા મળ્યું હતું.

સેમાગ્લુટાઈડ કેવી રીતે કરે છે કામ?

સેમાગ્લુટાઈડનો ઉપયોગ મુખ્યત્વે ટાઈપ-૨ ડાયાબિટીસને નિયંત્રિત કરવા અને વજન ઘટાડવા માટે થાય છે. તે શરીરમાં કુદરતી હોર્મોન્સની નકલ કરીને ભૂખ ઓછી કરે છે અને ઈન્સ્યુલિનનું સ્તર વધારે છે. બીજી તરફ, DPP-4 ઈન્હિબિટર્સ વર્ગની દવાઓ પણ ઈન્સ્યુલિનના સ્ત્રાવને ઉત્તેજિત કરે છે.

જાન્યુઆરી ૨૦૧૯ થી સપ્ટેમ્બર ૨૦૨૪ વચ્ચે હાથ ધરવામાં આવેલા આ વ્યાપક અભ્યાસમાં હજારો દર્દીઓના ડેટાનું વિશ્લેષણ કર્યા પછી જાણવા મળ્યું છે કે આ દવાઓ વાળના સ્વાસ્થ્ય પર નકારાત્મક અસર કરી રહી છે. નિષ્ણાતોના મતે, વજનમાં ઝડપી ઘટાડો અને હોર્મોનલ ફેરફારો પણ વાળ ખરવાનું મુખ્ય કારણ બની શકે છે.