International: ઈરાની હુમલામાં વધુ 1 અમેરિકી સૈનિકનું મોત, મૃત્યુઆંક 17 થયો: US આર્મીએ ઈરાન પર સતત 9મી રાત્રે કરી બોમ્બમારો

ઈરાન સાથેના સૈન્ય સંઘર્ષમાં વધુ એક અમેરિકી સૈનિકનું મોત થયું છે. યુએસ સેન્ટ્રલ કમાન્ડ (US CENTCOM) એ આ ઘટનાની સત્તાવાર પુષ્ટિ કરી છે. ઉત્તરી ઈરાકમાં ઈરાનના એક તોડી પાડેલા ડ્રોનના વિસ્ફોટકોને નિષ્ક્રિય કરતી વખતે આ અકસ્માત સર્જાયો હતો. આ સાથે જ ફેબ્રુઆરીના અંતમાં ઈરાન સાથે શરૂ થયેલા સૈન્ય સંઘર્ષમાં શહીદ થયેલા અમેરિકી સૈનિકોની સંખ્યા વધીને 17 થઈ ગઈ છે. આ ઘટનામાં એક જવાન ઈજાગ્રસ્ત પણ થયો છે.

ઉત્તરી ઈરાકમાં કેવી રીતે ઘટી ઘટના?

US સેન્ટ્રલ કમાન્ડે સોશિયલ મીડિયા પ્લેટફોર્મ X પર માહિતી આપતા જણાવ્યું કે:

"ઉત્તરી ઈરાકમાં ઈરાનના તોડી પાડેલા 'વન-વે-એટેક ડ્રોન'ના વિસ્ફોટકોને કંટ્રોલ્ડ પદ્ધતિથી નષ્ટ કરતી વખતે આ દુર્ઘટના બની હતી. જેમાં સેનાના એક જવાને જીવ ગુમાવ્યો છે."

આ ઘટના બાદ મધ્ય પૂર્વ (Middle East) માં તણાવ ચરમસીમાએ પહોંચી ગયો છે.

અમેરિકાની ઈરાન પર સતત ૯મી રાત્રે એરસ્ટ્રાઈક

અમેરિકી સૈનિકના મોત બાદ US આર્મીએ ઈરાન વિરુદ્ધ પોતાના હુમલા વધુ તેજ બનાવી દીધા છે. અમેરિકાએ ઈરાન પર સતત 9મી રાત્રે ભારે બોમ્બમારો કર્યો છે. ઈરાની મીડિયા અહેવાલો મુજબ રાત્રે ૨:૩૦ વાગ્યાની આસપાસ અનેક વિસ્તારોમાં ભયાનક ધમાકા સંભળાયા હતા.

ઈરાન અને અમેરિકા વચ્ચે વધતા જતા આ યુદ્ધ જેવા વાતાવરણને કારણે સમગ્ર મધ્ય પૂર્વમાં ભારે અસ્થિરતા સર્જાઈ છે.