International: યુક્રેનમાં શાકભાજી વેચનાર પર ડ્રોન હુમલો, ઝેલેન્સ્કીએ વીડિયો શેર કરી કહ્યું- 'રશિયા પાગલ થઈ ગયું છે'

યુક્રેને રશિયા પર ગંભીર યુદ્ધ અપરાધ (War Crime) નો આરોપ લગાવ્યો છે. યુક્રેનના ખેરસોન શહેરમાં એક ડ્રોન દ્વારા શાકભાજી વેચનાર સામાન્ય નાગરિકનો પીછો કરીને તેને ઘાયલ કરવાનો વીડિયો સામે આવ્યા બાદ આ આરોપ મૂકવામાં આવ્યો છે. યુક્રેન દ્વારા જાહેર કરાયેલા ફુટેજમાં ડ્રોન એક વ્યક્તિનો પીછો કરતું દેખાય છે. તે વ્યક્તિ બચવા માટે રસ્તા પર ઉભેલી ગાડી પાછળ છુપાવાનો પ્રયાસ કરે છે, ત્યારે જ ડ્રોનમાં જોરદાર વિસ્ફોટ થાય છે.

યુક્રેનિયન પોલીસે જણાવ્યું કે ૫૨ વર્ષીય આ વ્યક્તિ ડ્રોન હુમલામાં બચી ગયો છે, પરંતુ બોમ્બના છરા વાગવાથી તેને ગંભીર ઈજાઓ પહોંચી છે. યુક્રેની અધિકારીઓએ તેની ઓળખ 'યૂરી' તરીકે આપી છે અને હોસ્પિટલના વોર્ડમાંથી તેનો વીડિયો ઈન્ટરવ્યુ પણ જાહેર કર્યો છે. આ ઘટના બાદ યુક્રેનના રાષ્ટ્રપતિ વોલોદિમીર ઝેલેન્સ્કીએ આકરા પ્રહારો કરતા કહ્યું કે રશિયા પાગલ થઈ ગયું છે.

યુક્રેનના વિદેશ મંત્રાલયનો આકરો પ્રહાર

યુક્રેની વિદેશ મંત્રાલયે નિવેદન આપતા કહ્યું કે, "રશિયા કોને નિશાન બનાવી રહ્યું છે? કોઈ સૈન્ય મથકને નહીં, પરંતુ કામ કરી રહેલા એક સામાન્ય નાગરિકને. રશિયન ડ્રોને જાણી જોઈને એક સામાન્ય વેપારીને નિશાન બનાવ્યો. આ હુમલામાં ૫૨ વર્ષીય વ્યક્તિના માથાના ભાગે ગંભીર ઈજા થઈ છે."

રાષ્ટ્રપતિ ઝેલેન્સ્કીનો આક્રોશ

રાષ્ટ્રપતિ વોલોદિમીર ઝેલેન્સ્કીએ આ હુમલાની સખત શબ્દોમાં નિંદા કરી છે. તેમણે કહ્યું કે આ ઘટના એ વાતની સાબિતી છે કે રશિયા યુદ્ધના નિયમોનું ઉલ્લંઘન કરીને સામાન્ય નાગરિકોને નિશાન બનાવી રહ્યું છે. ઝેલેન્સ્કીએ સોશિયલ મીડિયા પ્લેટફોર્મ 'X' પર વીડિયો પોસ્ટ કરતા લખ્યું કે, "રશિયન ડ્રોને ખેરસોનમાં શાકભાજી વેચતા વ્યક્તિનો જાણી જોઈને પીછો કર્યો અને તેની પાસે જઈને વિસ્ફોટ કર્યો. રશિયનોને પોતાના કૃત્ય પર કોઈ પસ્તાવો નથી, બલ્કે તેઓ લોકોને ડરાવવામાં ગર્વ અનુભવે છે. ખેરસોનમાં સામાન્ય લોકો સામે આવી 'સફારી' જેવી ક્રૂર કાર્યવાહીઓ દરરોજ કરવામાં આવી રહી છે."

'વિશ્વ રશિયાને રોકે'

ઝેલેન્સ્કીએ વૈશ્વિક સમુદાયને અપીલ કરતા કહ્યું કે, "દુનિયાએ આ બધું જોવું જોઈએ. દરેક પુરાવા પર નજર કરવી જોઈએ કે રશિયા કઈ હદ સુધી હિંસા અને આક્રમકતાના માર્ગે વધી રહ્યું છે. રશિયન સૈનિકો લોકોને મારીને અને હેરાન કરીને ખુશી અનુભવે છે. રશિયા પર આકરૂ દબાણ લાવ્યા વિના અને નક્કર સુરક્ષા ગેરંટી વિના શાંતિની કલ્પના કરવી મુશ્કેલ છે."

યુક્રેની વિદેશ મંત્રાલયે ઉમેર્યું કે નિર્દોષ નાગરિકોમાં ડર ફેલાવવાનું આ એક આયોજનબદ્ધ અભિયાન છે અને વિશ્વએ તેને સામાન્ય ગણીને સ્વીકારવું ન જોઈએ. ઝેલેન્સ્કીએ ચેતવણી આપી હતી કે રશિયાની આ 'સફારી' માત્ર યુક્રેન સુધી મર્યાદિત નહીં રહે, તેથી પોલેન્ડ, ફિનલેન્ડ, રોમાનિયા અને મોલ્દોવા જેવા દેશોએ પણ સાથે મળીને વાસ્તવિક સુરક્ષા ગેરંટી માટે કામ કરવું પડશે.