International: 'ઈરાનના ફ્રીઝ કરેલા પૈસામાંથી જહાજોના નુકસાનની ભરપાઈ કરીશું', હોર્મુઝમાં ઈરાની હુમલા વચ્ચે ટ્રમ્પની મોટી ચેતવણી

અમેરિકા અને ઈરાન વચ્ચે છેલ્લા બે અઠવાડિયાથી ચાલી રહેલા ભારે તણાવ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે ઈરાનને નવી અને કડક ચેતવણી આપી છે. ટ્રમ્પે ગુરુવારે જાહેરાત કરી હતી કે ઈરાની હુમલાઓથી જહાજો અને કાર્ગોને થનારા કોઈપણ નુકસાનની ભરપાઈ વોશિંગ્ટનના કબ્જામાં રહેલા ઈરાનના ફ્રીઝ કરાયેલા નાણાંમાંથી કરવામાં આવશે. તેમણે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર આ અંગેની માહિતી આપી હતી. 'અલ જઝીરા'ના રિપોર્ટ અનુસાર, ઈરાનની લગભગ 100 અબજ ડોલરની સંપત્તિ હાલ અમેરિકાના નિયંત્રણ હેઠળ ફ્રીઝ થયેલી છે.

ઈરાની સંપત્તિમાંથી વસૂલાશે નુકસાની

ટ્રમ્પે પોતાની પોસ્ટમાં લખ્યું હતું કે, "અન્ય સૂચના ન મળે ત્યાં સુધી આ નિવેદનને સત્તાવાર માનવામાં આવે: હવેથી જહાજો, કાર્ગો કે તેની સાથે જોડાયેલી કોઈપણ વસ્તુને થનારા નુકસાનની ભરપાઈ અમેરિકાના કબ્જામાં રહેલા ઈરાની નાણાંમાંથી જ કરવામાં આવશે. આ નુકસાન ઘણું મોટું હોઈ શકે છે, પરંતુ તેમ છતાં આમ કરવું સંપૂર્ણપણે વાજબી અને યોગ્ય છે."

ઈરાનનો અમેરિકા પર પલટવાર

ટ્રમ્પની આ જાહેરાત એવા સમયે આવી છે જ્યારે મધ્ય પૂર્વમાં બંને દેશો વચ્ચે ફરી એકવાર સૈન્ય સંઘર્ષ વધી ગયો છે, જેના કારણે ગયા મહિને થયેલી પ્રારંભિક સમજૂતી તૂટી ગઈ છે. વધતા તણાવ વચ્ચે ઈરાનના વિદેશ મંત્રી અબ્બાસ અરાઘચીએ ટ્રમ્પ પ્રશાસન પર આકરા પ્રહાર કરતા કહ્યું કે તેઓ જે આક્રમકતા દાખવી રહ્યા છે, તે તેમના પર જ ભારે પડશે.

અરાઘચીએ સોશિયલ મીડિયા પ્લેટફોર્મ 'X' પર લખ્યું, "અમેરિકી પ્રશાસનમાં સામેલ કેટલાક લોકો વાસ્તવિકતાથી મોં ફેરવી રહ્યા છે. તેઓ જમીની હકીકતને નજરઅંદાજ કરી રહ્યા છે અને તેમનું પૂરૂં ધ્યાન માત્ર 2028ની ચૂંટણી પર જ લાગે છે. તેઓ જે વિચાર્યા વગરની આક્રમકતાની વકીલાત કરી રહ્યા છે, તેનું પરિણામ એ જ આવશે કે રાષ્ટ્રપતિએ જે સમજૂતી મેળવવાનો પ્રયાસ કરી રહ્યા છે તેના માટે ભારે કિંમત ચૂકવવી પડશે."

અમેરિકાના ઈરાન પર સતત હુમલા

બીજી તરફ, અમેરિકી સેનાએ સતત 13મી રાત્રે પણ ઈરાનના સૈન્ય ઠેકાણાઓ પર બોમ્બમારો ચાલુ રાખ્યો હતો. અમેરિકી સેન્ટ્રલ કમાન્ડે જણાવ્યું હતું કે આ હુમલાઓનો મુખ્ય હેતુ ઈરાનની એ ક્ષમતાને નાબૂદ કરવાનો છે, જેના દ્વારા તે આંતરરાષ્ટ્રીય દરિયાઈ માર્ગો પર સામાન્ય નાવિકો અને કોમર્શિયલ જહાજો માટે ખતરો ઊભો કરે છે. ઈરાની સરકારી મીડિયાના જણાવ્યા અનુસાર, બંદર અબ્બાસ, કેશમ અને ઉત્તર-પશ્ચિમના વિસ્તારોમાં મોટા ધમાકાના અવાજો સંભળાયા હતા.