International: સંરક્ષણ મંત્રી પર ભડક્યા હતા ટ્રમ્પ, હથિયારોની અછત પર પૂછ્યા સવાલ? યુએસ પ્રમુખે મીડિયા રિપોર્ટ પર આપી પ્રતિક્રિયા

ઈરાન સાથેના તણાવ વચ્ચે યુએસ આર્મી પાસે હથિયારોની અછતને લઈને રાષ્ટ્રપતિ ડોનાલ્ડ ટ્રમ્પ તેમના સંરક્ષણ મંત્રી પિટ હેગસેથથી નારાજ હોવાના અહેવાલો સામે આવ્યા હતા. વોશિંગ્ટન પોસ્ટના અહેવાલ મુજબ, ટ્રમ્પે ગત અઠવાડિયે કેબિનેટ બેઠકમાં હેગસેથને પૂછ્યું હતું કે તેમને મહત્ત્વપૂર્ણ મિસાઈલો અને એર-ડિફેન્સ સિસ્ટમની અછત અંગે ગેરમાર્ગે કેમ દોરવામાં આવ્યા. જોકે, ટ્રમ્પે મંત્રી સાથેની નારાજગીના આ તમામ અહેવાલોને સંપૂર્ણપણે ફગાવી દીધા છે.

કેબિનેટ મીટિંગમાં ટ્રમ્પની નારાજગીનો દાવો

તાજેતરમાં એવા અહેવાલો વહેતા થયા હતા કે યુએસ મિલિટરીને શસ્ત્રોની અછતનો સામનો કરવો પડી રહ્યો છે, જેના કારણે ઈરાન સામેની તેમની સૈન્ય કાર્યવાહી મર્યાદિત કરવી પડી હતી. ચર્ચાથી વાકેફ સૂત્રોના જણાવ્યા અનુસાર, કેમ્પ ડેવિડમાં યોજાયેલી કેબિનેટ બેઠક દરમિયાન ટ્રમ્પે હેગસેથને ગુસ્સામાં કહ્યું હતું કે તેમને લાગતું હતું કે આ મુદ્દો અગાઉ જ ઉકેલાઈ ગયો છે.

યુએસ સેના પાસે હથિયારોની અછત

મિસાઈલોની અછતને કારણે યુએસ સેનાને ઈરાન સામેની પોતાની વ્યૂહરચના પર પુનર્વિચાર કરવાની ફરજ પડી રહી હોવાનું કહેવાય છે. યુએસ આર્મી પાસે મુખ્યત્વે લાંબા અંતરની ગાઈડેડ મિસાઈલો અને એર-ડિફેન્સ ઈન્ટરસેપ્ટર્સની અછત હોવાનું અહેવાલમાં જણાવાયું હતું. શસ્ત્રોની અછતને કારણે જ ટ્રમ્પે તાજેતરમાં ઈરાન પર વધુ એક મોટો હુમલો કરવાનો વિચાર પડતો મૂક્યો હોવાનો દાવો કરાયો હતો.

ટ્રમ્પે રિપોર્ટને ગણાવ્યો ફ્રેક ન્યૂઝ

વોશિંગ્ટન પોસ્ટના આ રિપોર્ટ પર કડક પ્રતિક્રિયા આપતા ડોનાલ્ડ ટ્રમ્પે તેને તદ્દન "ફેક ન્યૂઝ" ગણાવ્યા છે. ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું કે તેઓ હેગસેથની કામગીરીથી અત્યંત ખુશ છે અને અખબાર પર ખોટી તેમજ તથ્યહીન અફવાઓ ફેલાવવાનો આરોપ લગાવ્યો હતો. તેમણે ઉમેર્યું કે આ રિપોર્ટ પ્રકાશિત થતાં પહેલાં જ અખબારને સ્પષ્ટ કરવામાં આવ્યું હતું કે આ દાવાઓ ખોટા છે.