International: નેપાળે ભારતીય ચલણ પરનો પ્રતિબંધ હટાવ્યો, હવે ₹200 અને ₹500ની નોટો લઈ જવાની મંજૂરી; ભારતીયોને મોટી રાહત

નેપાળની બાલેન શાહ સરકારે ભારતીય ચલણ પર લાદવામાં આવેલા પ્રતિબંધોમાં મોટી છૂટછાટ આપતા દેશમાં ₹૨૦૦ અને ₹૫૦૦ની ભારતીય નોટો લાવવા અને લઈ જવાની મંજૂરી આપી દીધી છે. આ મંજૂરી નવેમ્બર ૨૦૧૬ પછી જારી કરાયેલી નોટો પર લાગુ થશે. આ નિર્ણયથી નેપાળ જતાં ભારતીય પ્રવાસીઓ તેમજ સરહદી વિસ્તારના લોકોને મોટી રાહત મળશે. નોંધનીય છે કે, ભારતમાં નવેમ્બર ૨૦૧૬માં થયેલી નોટબંધી પછી નેપાળમાં માત્ર ₹૧૦૦ની નોટો લાવવા-લઈ જવાની પરવાનગી હતી.

પ્રતિ વ્યક્તિ ₹૨૫,૦૦૦ સુધી લઈ જવાની છૂટ

બાલેન શાહ સરકારે ભારતીય અને નેપાળી નાગરિકો માટે ₹૨૦૦ અને ₹૫૦૦ની નવી નોટો સાથે રાખવાની છૂટ આપી છે, પરંતુ તેની મહત્તમ મર્યાદા પ્રતિ વ્યક્તિ ₹૨૫,૦૦૦ નક્કી કરવામાં આવી છે. જ્યારે ૯ નવેમ્બર ૨૦૧૬ પહેલાં જારી કરાયેલી જૂની ₹૫૦૦ અને ₹૧૦૦૦ની નોટો પર પહેલાંની જેમ જ પ્રતિબંધ યથાવત રહેશે.

નેપાળ રાષ્ટ્ર બેંકે જારી કરી સ્પષ્ટતા

નેપાળની સેન્ટ્રલ બેંક 'નેપાળ રાષ્ટ્ર બેંક' (NRB) એ માહિતી આપતાં જણાવ્યું હતું કે, આ નવા નિયમોનો હેતુ બંને દેશો વચ્ચે પ્રવાસ અને સરહદી વેપાર સરળ બનાવવાનો છે. NRB ના પ્રવક્તા ગુરુ પ્રસાદ પૌડેલે સ્પષ્ટ કર્યું હતું કે, નેપાળી કે ભારતીય નાગરિકો માત્ર ભારતમાંથી જ આ ભારતીય ચલણ નેપાળ લાવી શકશે. ભારત સિવાયના અન્ય કોઈ દેશમાંથી આ રકમ નેપાળમાં લાવવાની કે લઈ જવાની મંજૂરી રહેશે નહીં.

વિદેશી ચલણ અંગેના નિયમો

અધિકૃત માહિતી મુજબ, ભારતીય ચલણ ઉપરાંત નેપાળ આવતા પ્રવાસીઓ કોઈપણ કસ્ટમ્સ ડિક્લેરેશન વિના ૫,૦૦૦ યુએસ ડોલર ($5,000) કે તેના સમાન મૂલ્યનું અન્ય વિદેશી ચલણ લાવી શકે છે. જો રકમ $5,000થી વધુ હોય, તો એરપોર્ટ કે બોર્ડર પર કસ્ટમ અધિકારીઓ સમક્ષ તેની જાહેરાત કરવી અનિવાર્ય રહેશે.