International: 'ઈરાન તેલ નહીં વેચે તો કોઈ નહીં વેચી શકે', ગાલિબાફની ખુલ્લી ધમકી: ટ્રમ્પને ગણાવ્યું યુદ્ધનું સમીકરણ

ઈરાન અને અમેરિકા વચ્ચે ચાલી રહેલો તણાવ હવે ચરમસીમાએ પહોંચ્યો છે. ઈરાનની સંસદના સ્પીકર મોહમ્મદ બાગેર ગાલિબાફે (Mohammad Bagher Ghalibaf) અમેરિકાને સીધી ચેતવણી આપતા કહ્યું છે કે જો ઈરાનને તેલ વેચતા રોકવામાં આવશે, તો આ વિસ્તારમાંથી કોઈ પણ દેશ તેલ વેચી શકશે નહીં. તેમણે સ્પષ્ટ કર્યું કે હોર્મુઝની સામુદ્રધુની (Strait of Hormuz) હવે યુદ્ધ પહેલા જેવી સ્થિતિમાં ક્યારેય પાછી નહીં ફરે.

ઈરાની સ્પીકરનું આ નિવેદન અમેરિકી રાષ્ટ્રપતિ ડોનાલ્ડ ટ્રમ્પની એ ધમકી બાદ આવ્યું છે, જેમાં ટ્રમ્પે ઈરાનના બ્રિજ અને પાવર પ્લાન્ટ્સ પર બોમ્બમારો કરવાની વાત કહી હતી.

ટ્રમ્પની ચીમકી: 'ઈરાન હુમલો કરશે તો પાવર પ્લાન્ટ ઉડાવી દઈશું'

અમેરિકી રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' (Truth Social) પર લખ્યું હતું કે, જો ઈરાન હોર્મુઝની સામુદ્રધુનીમાં કોઈ પણ જહાજ પર મિસાઈલ કે ડ્રોન વડે હુમલો કરશે, તો તેના જવાબમાં અમેરિકા ઈરાનના એક બ્રિજ અથવા પાવર પ્લાન્ટને બોમ્બ ફેંકીને તબાહ કરી દેશે.

'યા તો સબ યા કોઈ નહીં': ગાલિબાફનો પલટવાર

ટ્રમ્પની આ ધમકીનો જવાબ આપતા ગાલિબાફે સોશિયલ મીડિયા 'X' પર લખ્યું કે, "આ યુદ્ધનું સમીકરણ એકદમ સ્પષ્ટ છે: યા તો સબ, યા કોઈ નહીં. જે વિસ્તારમાંથી અમે તેલ નહીં વેચી શકીએ, ત્યાંથી કોઈ અન્ય દેશ પણ તેલ વેચી શકશે નહીં. જો અમારી સુરક્ષા સુનિશ્ચિત નહીં થાય, તો કોઈનું પણ ઈન્ફ્રાસ્ટ્રક્ચર સુરક્ષિત નહીં રહે."

તેમણે વધુમાં ઉમેર્યું હતું કે હોર્મુઝ ક્ષેત્રની સુરક્ષા અમેરિકી સેનાની ગેરહાજરીમાં જ શક્ય છે અને સ્થિતિ હવે પહેલા જેવી સામાન્ય રહેશે નહીં.

સતત ૧૨મી રાત્રે અમેરિકાનો બોમ્બમારો

આ નિવેદનબાજી એવા સમયે સામે આવી છે જ્યારે બંને દેશો વચ્ચે છેલ્લા બે અઠવાડિયાથી ભીષણ હુમલાઓ ચાલુ છે, જેના કારણે પ્રારંભિક યુદ્ધવિરામ કરાર તૂટી ગયો છે.

• અમેરિકી હુમલા: અમેરિકી સેનાએ સતત ૧૨મી રાત્રે ઈરાન પર ભારે બોમ્બમારો કર્યો છે.

• ઈરાનનો જવાબ: વળતા પ્રહારમાં ઈરાને પણ અખાતી દેશોમાં સ્થિત અમેરિકી સહયોગીઓ પર મિસાઈલ અને ડ્રોન હુમલા તેજ કર્યા છે.

• કુવૈતની પુષ્ટિ: કુવૈતી સેનાએ આ હુમલાઓની પુષ્ટિ કરતા જણાવ્યું છે કે તેઓ દુશ્મનના ડ્રોનને આકાશમાં જ નષ્ટ કરી રહ્યા છે.