International: હોર્મુઝ સ્ટ્રેટ ખોલવા ઈરાન અને ઓમાન વચ્ચે ડીલ અંતિમ તબક્કામાં, જહાજો પર લાગશે સર્વિસ ફી

ઈરાને જાહેરાત કરી છે કે હોર્મુઝ જળડમરુમધ્ય (Strait of Hormuz) ને લઈને ઓમાન સાથે એક સમજૂતીનો ડ્રાફ્ટ અંતિમ તબક્કામાં પહોંચી ગયો છે. આ મહત્વપૂર્ણ ઊર્જા જળમાર્ગ ફરી ખુલવાથી વૈશ્વિક અર્થતંત્ર પરનું દબાણ ઘટી શકે છે. આ અગાઉ ગત અઠવાડિયે અમેરિકી પ્રમુખ ડોનાલ્ડ ટ્રમ્પે સંકેત આપ્યો હતો કે ટૂંક સમયમાં સમજૂતીની જાહેરાત થઈ શકે છે. જોકે, ટ્રમ્પ વહીવટીતંત્રે અગાઉ એવા કોઈ પણ કરારને ફગાવી દીધો છે જેનાથી આ જળમાર્ગ પર ઈરાનનું નિયંત્રણ વધુ મજબૂત થાય.

હોર્મુઝ પર નિયંત્રણ જાળવી રાખવા ઈરાન મક્કમ

ઈરાને હોર્મુઝ જળડમરુમધ્ય પર પોતાનું નિયંત્રણ જાળવી રાખવા પર ભાર મૂક્યો છે અને સ્પષ્ટ કર્યું છે કે આ મહત્વપૂર્ણ દરિયાઈ માર્ગ હવે યુદ્ધ પહેલાની સ્થિતિમાં પાછો નહીં ફરે. ઉલ્લેખનીય છે કે, અમેરિકા અને ઈઝરાયેલ દ્વારા ૨૮ ફેબ્રુઆરીએ ઈરાન સામે સૈન્ય કારવાઈ શરૂ કરાયા બાદથી તેહરાને આ જળમાર્ગ પર વ્યવહારુ નિયંત્રણ મેળવી લીધું છે.

ઈરાન અને ઓમાન ટૂંક સમયમાં સંયુક્ત નિવેદન બહાર પાડી શકે છે

ઈરાનની સરકારી સમાચાર એજન્સી IRNA અનુસાર, ઈરાની વિદેશ મંત્રાલયના પ્રવક્તા ઈસ્માઈલ બાકેઈએ જણાવ્યું હતું કે, ઓમાન સાથેનો કરાર ડ્રાફ્ટિંગના આખરી તબક્કામાં છે. અમેરિકા તરફ ઈશારો કરતા તેમણે ઉમેર્યું કે જો અમુક પક્ષો આ પ્રક્રિયામાં વિક્ષેપ નહીં ઊભો કરે તો બંને દેશો દ્વારા સંયુક્ત નિવેદન જારી કરવામાં આવશે.

બાકેઈએ પત્રકારોને જણાવ્યું હતું કે, જો કોઈ કરાર થઈ જાય તો પણ તેનો અર્થ એ નથી કે આ જળમાર્ગમાંથી પસાર થતા તમામ જહાજો માટે સંપૂર્ણ સુરક્ષા સુનિશ્ચિત થઈ જશે. સૂત્રોના જણાવ્યા અનુસાર, ઈરાન અને ઓમાન વચ્ચેની આ ડીલના ડ્રાફ્ટને ઈરાનના સુપ્રીમ લીડર મોજતબા ખામેનેઈની આખરી મંજૂરી મળવાની બાકી છે.

પસાર થતા જહાજોએ ચૂકવવી પડશે સર્વિસ ફી

અહેવાલો મુજબ, આ સંભવિત ડીલથી અમેરિકા અને ઈરાન વચ્ચે તેહરાનના પરમાણુ કાર્યક્રમ પર ફરીથી વાટાઘાટો શરૂ કરવાનો માર્ગ મોકળો થશે. સંભવિત સમજૂતી હેઠળ, જહાજો ઈરાનના નિયંત્રણવાળા માર્ગેથી પર્સિયન ગલ્ફ (ફારસની ખાડી)માં પ્રવેશ કરશે અને ઓમાનના નિયંત્રણવાળા માર્ગેથી બહાર નીકળશે. આ માટે જહાજો પાસેથી કોઈ ટોલ ટેક્સ વસૂલવામાં નહીં આવે, પરંતુ સુરક્ષા પૂરી પાડવા અને દરિયાઈ પર્યાવરણના રક્ષણ માટે 'સર્વિસ ફી' લેવામાં આવશે.