International: 'હોર્મુઝ સ્ટ્રેટમાં અમારાથી ભૂલ થઈ': ઈરાને બંધ બારણે ડોનાલ્ડ ટ્રમ્પની ટીમ સમક્ષ સ્વીકારી ભૂલ, વાતચીત પર ભાર

અમેરિકા અને ઈરાન વચ્ચે ચાલી રહેલા ભારે તણાવ વચ્ચે એક આશ્ચર્યજનક અને મોટી વિગતો સામે આવી રહી છે. ઈરાને કથિત રૂપે સ્વીકાર્યું છે કે ચાલુ સપ્તાહની શરૂઆતમાં 'સ્ટ્રેટ ઓફ હોર્મુઝ' (હોર્મુઝની સામુદ્રધુની) માં કોમર્શિયલ જહાજો પર થયેલા હુમલા એક મોટી ભૂલ હતી. ઈરાની અધિકારીઓએ અમેરિકી રાષ્ટ્રપ્રમુખ ડોનાલ્ડ ટ્રમ્પના સલાહકારો સાથેની ખાનગી વાતચીતમાં આ હુમલાઓને પોતાની ભૂલ ગણાવી છે અને ભવિષ્યમાં વાતચીત ચાલુ રાખવાની ઈચ્છા વ્યક્ત કરી છે.

ઉલ્લેખનીય છે કે, હોર્મુઝ દરિયાઈ માર્ગે જહાજો પર થયેલા હુમલા બાદ જ બંને દેશો વચ્ચે યુદ્ધ જેવી સ્થિતિ સર્જાઈ હતી, જેના જવાબમાં અમેરિકાએ ઈરાન પર હવાઈ હુમલા કર્યા હતા અને ઈરાની સેનાએ પણ જવાબી કાર્યવાહી કરી હતી.

કટ્ટરપંથીઓના અનિયંત્રિત જૂથે કર્યો હુમલો: ઈરાનનો દાવો

અમેરિકી મીડિયા હાઉસ 'સીબીએસ ન્યૂઝ' ના અહેવાલ અનુસાર, ઈરાની અધિકારીઓએ ખાનગી સ્તરે ટ્રમ્પની ટીમને જણાવ્યું છે કે હોર્મુઝ સ્ટ્રેટમાં જહાજો પર થયેલા હુમલા સરકારની મંજૂરી વગર થયા હતા. તેમના જણાવ્યા મુજબ, આ હુમલા ઈરાનના જ કેટલાક કટ્ટરપંથીઓના અનિયંત્રિત જૂથ દ્વારા કરવામાં આવ્યા હતા, જેઓ અમેરિકા સાથેની શાંતિ વાર્તાને નિષ્ફળ બનાવવા માંગે છે. જો કે, આ મામલે ઈરાન સરકાર તરફથી હજુ સુધી કોઈ સત્તાવાર જાહેર નિવેદન આવ્યું નથી.

બીજી તરફ, વ્હાઇટ હાઉસ અને ટ્રમ્પ પ્રશાસન આ મુદ્દે મક્કમ છે. અમેરિકા ઈચ્છે છે કે ઈરાન આ ભૂલનો જાહેરમાં સ્વીકાર કરે, કારણ કે ટ્રમ્પ પ્રશાસન આ હુમલાઓને યુદ્ધવિરામ (Ceasefire) નું સીધું ઉલ્લંઘન માની રહ્યું છે.

ટ્રમ્પે આપ્યા વાર્તા ચાલુ રાખવાના આદેશ

શરૂઆતમાં આકરા પ્રહારો અને યુદ્ધવિરામ ખતમ કરવાની ચેતવણી આપ્યા બાદ, હવે ડોનાલ્ડ ટ્રમ્પે રાજદ્વારી રસ્તો અપનાવવાનું નક્કી કર્યું છે. તેમણે પોતાની ઉચ્ચ સ્તરીય વાર્તાકાર ટીમને ઈરાન સાથે વાતચીત આગળ ધપાવવાના નિર્દેશ આપ્યા છે. આ ટીમમાં અમેરિકાના ઉપરાષ્ટ્રપ્રમુખ જે.ડી. વેન્સ, ટ્રમ્પના જમાઈ જેરેડ કુશ્નર, વિશેષ દૂત સ્ટીવ વિટકૉફ અને વિદેશ મંત્રી માર્કો રૂબિયો સામેલ છે.

અમેરિકી અધિકારીના જણાવ્યા મુજબ, ઈરાન તરફથી નરમ વલણ અને ભૂલ સ્વીકારવામાં આવ્યા બાદ જ અમેરિકાએ પણ વાતચીતની ટેબલ પર પાછા ફરવાનો નિર્ણય કર્યો છે.

ઓમાનમાં યોજાશે નિર્ણાયક બેઠક

શનિવારે ઓમાનમાં અમેરિકા અને ઈરાનના પ્રતિનિધિઓ વચ્ચે એક મહત્વપૂર્ણ બેઠક યોજાવા જઈ રહી છે. આ બેઠકથી પશ્ચિમ એશિયામાં ફરી એકવાર શાંતિ સ્થપાવાની આશા જાગી છે. અમેરિકાએ સ્પષ્ટ કર્યું છે કે જો ઈરાન આવી ઉશ્કેરણીજનક પ્રવૃત્તિઓ ચાલુ રાખશે, તો અમેરિકા સૈન્ય અને આર્થિક દબાણ લાવતા અચકાશે નહીં.

અમેરિકાની મુખ્ય માંગ એ છે કે ઈરાન હોર્મુઝ જળમાર્ગને સંપૂર્ણપણે ખુલ્લો રાખવાની લેખિત ખાતરી આપે અને જહાજો પર ગોળીબાર બંધ કરે. બીજી તરફ, તણાવ ઘટાડવાના હેતુથી કતારનું એક પ્રતિનિધિમંડળ પણ શુક્રવારે ઈરાન પહોંચ્યું છે. હાલ પૂરતું, શુક્રવારથી બંને પક્ષો વચ્ચે કોઈ નવો હુમલો થયો નથી અને સ્થિતિ નિયંત્રણમાં છે.