INTERNATIONAL: 'આપણે પીએમ મોદી સાથે હાથ મિલાવવા તરસી રહ્યા છીએ', શાહબાઝ શરીફના સલાહકારનું પાકિસ્તાન અંગે મોટું નિવેદન

પાકિસ્તાનના વડાપ્રધાન શાહબાઝ શરીફના વિશેષ સલાહકાર રાણા સનાઉલ્લાહ ખાને ભારત સાથેના સંબંધોને લઈને એક અત્યંત ચોંકાવનારું અને મોટું નિવેદન આપ્યું છે. રાણા સનાઉલ્લાહે ભારત સાથેના સંબંધો બગાડવા માટે અન્ય કોઈને નહીં પરંતુ ખુદ પાકિસ્તાનને જ જવાબદાર ઠેરવ્યું છે. પાકિસ્તાની ટીવી ચેનલ પર એક ચર્ચા દરમિયાન તેમણે સ્વીકાર્યું કે પાકિસ્તાન પાસે ભારત સાથે મિત્રતા કરવાની અને કાશ્મીર સહિતના તમામ મુદ્દા ઉકેલવાની સુવર્ણ તક હતી, પરંતુ પીએમ નરેન્દ્ર મોદીનો આંધળો વિરોધ કરવાની લ્હાયમાં પાકિસ્તાને બધું જ ગુમાવી દીધું. તેમણે વસવસો વ્યક્ત કરતા કહ્યું કે, "આજે પીએમ મોદી આપણો ફોન પણ નથી ઉપાડતા, તો તેના માટે આપણે પોતે જ જવાબદાર છીએ."

'બેકડોર ડિપ્લોમેસી' પર કર્યો મોટો ખુલાસો

પાકિસ્તાનની પ્રખ્યાત 'સમા ટીવી' (Samaa TV) ના એક કાર્યક્રમ દરમિયાન રાણા સનાઉલ્લાહે વર્ષ ૨૦૧૫ માં વડાપ્રધાન નરેન્દ્ર મોદીની અચાનક થયેલી લાહોર યાત્રા તરફ ઈશારો કર્યો હતો. તેમણે કહ્યું કે તે સમયે પાકિસ્તાન પાસે ઈતિહાસ બદલવાની બહુ મોટી તક હતી. જ્યારે એન્કર દ્વારા પૂછવામાં આવ્યું કે, શું અત્યારે ઈસ્લામાબાદ 'ટ્રેક ૨ ડિપ્લોમેસી' (Track 2 Diplomacy) દ્વારા નવી દિલ્હી (ભારત) નો સંપર્ક સાધી રહ્યું છે? ત્યારે વડાપ્રધાનના સલાહકારે આ વાતની કબૂલાત કરી અને જણાવ્યું કે બંને દેશો વચ્ચે બેકડોર ડિપ્લોમેસી (ગુપ્ત વાટાઘાટો) ક્યારેય સંપૂર્ણપણે બંધ થઈ જ નથી. નવાઝ શરીફના કાર્યકાળમાં પ્રાદેશિક શાંતિ માટે ખૂબ જ સાનુકૂળ વાતાવરણ સર્જાયું હતું.

પાકિસ્તાનમાં પીએમ મોદીનો ડર

જ્યારે એન્કરે સવાલ કર્યો કે પાકિસ્તાનમાં તમારા પક્ષ (PML-N) પર હંમેશા મોદી સાથે મિત્રતા વધારવાના આરોપો લાગે છે, ત્યારે રાણા સનાઉલ્લાહે તેને પાકિસ્તાનની કમનસીબી ગણાવી હતી. તેમણે પાકિસ્તાની નેતાઓની બેવડી નીતિ પર પ્રહાર કરતા કહ્યું કે, "આપણા દેશમાં લોકો કહે છે કે મોટી આફત આવી ગઈ છે, મોદી આપણી વાત સાંભળી રહ્યા નથી. મોદી શાંત છે, ખબર નહીં હવે શું કરી દેશે! આપણા પર કોઈ મિસાઈલ હુમલો ન થઈ જાય! અને બીજી તરફ જ્યારે તેઓ (પીએમ મોદી) પોતે ચાલીને આપણા ઘરે (લાહોર) આવે છે, ત્યારે તમે તેમને ગાળો આપો છો અને વિરોધ પ્રદર્શનો કરો છો."

તેમણે આગળ ઉમેર્યું કે, "આ કેટલી મોટી કમનસીબી છે કે જે વ્યક્તિ સાથે હાથ મિલાવવા માટે તમે પાછળથી તરસી રહ્યા છો, તે જ્યારે સંબંધ સુધારવા તમારા ઘરે આવે ત્યારે તમે તેમનું અપમાન કરો છો."

'ભારત સાથે દોસ્તી હોત તો IMF સામે ભીખ ન માગવી પડત'

રાણા સનાઉલ્લાહે પાકિસ્તાની સિસ્ટમને આડે હાથ લેતા કહ્યું કે પાકિસ્તાને પોતાના ભૂતકાળમાંથી સબક શીખવાની જરૂર હતી, પરંતુ અમે યોગ્ય સમય ગુમાવી દીધો. જો તે સમયે ભારત સાથે વાતચીત આગળ વધી હોત, તો આજે આ સમગ્ર એશિયા ક્ષેત્રમાં શાંતિ હોત. તેમણે પાકિસ્તાનની કંગાળ આર્થિક સ્થિતિ પર ટિપ્પણી કરતા સ્પષ્ટ શબ્દોમાં કહ્યું કે, જો ભારત સાથે પાકિસ્તાનના સંબંધો સારા હોત તો આજે પાકિસ્તાનને આંતરરાષ્ટ્રીય નાણાભંડોળ (IMF) ના ઉંબરા સુધી ભીખ માંગવા જવું ન પડત અને ન તો દેશે આટલી મોટી આર્થિક કટોકટી અને મોંઘવારીનો સામનો કરવો પડત.