International: UNSCમાં કાયમી સીટ માટે ભારતના દાવાને ન્યુઝીલેન્ડનું સમર્થન: પીએમ મોદીના પ્રવાસ દરમિયાન કરી જાહેરાત

સંયુક્ત રાષ્ટ્ર સુરક્ષા પરિષદ (UNSC) માં ભારતના કાયમી સભ્યપદના દાવાને ન્યુઝીલેન્ડ તરફથી ફરી એકવાર મજબૂત સમર્થન મળ્યું છે. વડાપ્રધાન નરેન્દ્ર મોદીની ન્યુઝીલેન્ડ મુલાકાત દરમિયાન બંને દેશોના નેતાઓ વચ્ચે યોજાયેલી દ્વિપક્ષીય બેઠકમાં આ મહત્વની જાહેરાત કરવામાં આવી છે. આ સમર્થન નવી દિલ્હી અને વેલિંગ્ટન વચ્ચે વધી રહેલી વ્યૂહાત્મક ભાગીદારી દર્શાવે છે, જે હવે માત્ર વેપાર પૂરતી મર્યાદિત ન રહેતા પ્રાદેશિક અને વૈશ્વિક બાબતો સુધી વિસ્તરી છે.

ભારત-ન્યુઝીલેન્ડ ભાગીદારી: ૨૦૩૦ માટે રોડમેપ

શનિવારે વડાપ્રધાન નરેન્દ્ર મોદીએ ન્યુઝીલેન્ડના તેમના સમકક્ષ ક્રિસ્ટોફર લક્સન સાથે ઓકલેન્ડમાં ઉચ્ચ સ્તરીય દ્વિપક્ષીય બેઠક યોજી હતી. આ બેઠક દરમિયાન 'ભારત-ન્યુઝીલેન્ડ વ્યૂહાત્મક ભાગીદારી: ૨૦૩૦ માટેનો રોડમેપ' સ્વીકારવામાં આવ્યો હતો. આ રોડમેપ બંને દેશોના ભવિષ્યના સંબંધોની રૂપરેખા નક્કી કરે છે. આ સાથે જ સંયુક્ત રાષ્ટ્ર અને તેની સુરક્ષા પરિષદમાં તાત્કાલિક સુધારાની જરૂરિયાત પર પણ ભાર મૂકવામાં આવ્યો છે.

આંતરરાષ્ટ્રીય મંચો પર વધશે પરસ્પર સહયોગ

સુરક્ષા પરિષદની કાયમી સીટ પર ભારતના દાવાને સમર્થન આપવા ઉપરાંત, બંને દેશો સંયુક્ત રાષ્ટ્ર અને અન્ય વૈશ્વિક મંચો પર વધુ નજીકથી કામ કરવા સંમત થયા છે.

આ કરાર આગામી ચાર વર્ષમાં સંરક્ષણ અને સુરક્ષા સહયોગને મજબૂત કરવાની એક નક્કર યોજના છે. બંને નેતાઓ સંરક્ષણ મંત્રાલય અને સેનાના સ્તરે નિયમિત વાતચીત ચાલુ રાખવા માટે સહમત થયા છે. તેમણે 'કમ્બાઈન્ડ ટાસ્ક ફોર્સ ૧૫૦' (Combined Task Force 150) હેઠળ સહયોગ પર વિશેષ ભાર મૂક્યો હતો, જેની કમાન ન્યુઝીલેન્ડ સંભાળશે અને ભારત ડેપ્યુટી કમાન્ડર તરીકે ભૂમિકા ભજવશે. આ ટાસ્ક ફોર્સ પશ્ચિમ એશિયા અને પશ્ચિમ હિંદ મહાસાગરમાં ડ્રગ્સની હેરાફેરી, આતંકવાદ અને ગેરકાયદેસર દરિયાઈ પ્રવૃત્તિઓને રોકવામાં મદદ કરશે.

ભારત અસ્થાયી સીટ માટે શરૂ કરશે અભિયાન

UNSCમાં સુધારા મુદ્દે ન્યુઝીલેન્ડનું સમર્થન ભારતને એવા સમયે મળ્યું છે, જ્યારે ભારત ૨૦૨૮-૨૯ ના કાર્યકાળ માટે સુરક્ષા પરિષદની બિન-કાયમી (અસ્થાયી) સીટ મેળવવા માટે આગામી સપ્તાહથી પોતાનું સત્તાવાર અભિયાન શરૂ કરવા જઈ રહ્યું છે. ભારતના વિદેશ મંત્રી એસ. જયશંકર સોમવારે ન્યૂયોર્ક સ્થિત સંયુક્ત રાષ્ટ્રના મુખ્યાલય ખાતેથી ભારતની સત્તાવાર ઉમેદવારીની જાહેરાત કરશે.