International: 'અમેરિકાની 1,000 મિસાઇલોનું નિશાન ઈરાન પર': ડોનાલ્ડ ટ્રમ્પની તેહરાનને ખુલ્લી ધમકી- મને મારવાનો પ્રયાસ ન કરતા

અમેરિકાના રાષ્ટ્રપ્રમુખ ડોનાલ્ડ ટ્રમ્પે ઈરાનને અત્યાર સુધીની સૌથી મોટી અને કડક ચેતવણી આપી છે. ટ્રમ્પે સ્પષ્ટ શબ્દોમાં જણાવ્યું છે કે, જો તેમની હત્યા કરવાનો કોઈ પણ પ્રયાસ કરવામાં આવશે, તો ઈરાનને સંપૂર્ણપણે બરબાદ કરી દેવામાં આવશે. ઈરાન તરફથી સતત મળી રહેલી જાનથી મારી નાખવાની ધમકીઓ વચ્ચે ટ્રમ્પનું આ આક્રમક નિવેદન સામે આવ્યું છે. તાજેતરમાં ઈરાનના સુપ્રીમ લીડર આયાતોલ્લા અલી ખામેનેઈના અંતિમ સંસ્કાર દરમિયાન ટ્રમ્પને જાનથી મારવાની ધમકીઓ આપવામાં આવી હતી, જેના જવાબમાં ટ્રમ્પે કહ્યું છે કે અમેરિકાની હજારો મિસાઇલો ઈરાન પર ભીષણ હુમલા માટે તૈયાર છે.

'અમારી મિસાઇલો ઈરાન તરફ તાકેલી છે'

અમેરિકી રાષ્ટ્રપ્રમુખ ડોનાલ્ડ ટ્રમ્પે શનિવારે સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું, "અમારી મિસાઇલો ઈરાન તરફ નિશાન સાધીને બેઠી છે. ઈરાની શાસનની ધમકીઓ મુજબ જો મારી હત્યાનો કોઈ પણ પ્રયાસ થશે, તો તરત જ હજારો મિસાઇલો છોડવામાં આવશે. આ માટેના જરૂરી આદેશો પહેલેથી જ આપી દેવામાં આવ્યા છે. અમેરિકી સેના ઈરાનના તમામ વિસ્તારોને એક વર્ષ સુધી સંપૂર્ણપણે તબાહ કરવા માટે તૈયાર છે અને આ સમયગાળો આગળ પણ વધારી શકાય છે."

તેમણે વધુમાં ઉમેર્યું કે, હાલ એક હજાર મિસાઇલો એકદમ તૈયાર છે અને તેમનું એકમાત્ર નિશાન ઈરાન છે. જો ઈરાન સરકાર પોતાની ધમકી પર આગળ વધશે, તો અમેરિકી સેના ઈરાનનો નકશો બદલી નાખશે.

ટ્રમ્પ કેમ ગુસ્સે ભરાયા છે?

ઈરાનમાં તાજેતરના દિવસોમાં, ખાસ કરીને અલી ખામેનેઈના અંતિમ સંસ્કારના કાર્યક્રમ દરમિયાન ડોનાલ્ડ ટ્રમ્પની હત્યાને લઈને જાહેરમાં નિવેદનોબાજી કરવામાં આવી હતી. આનાથી ગુસ્સે ભરાયેલા ટ્રમ્પે વળતો પ્રહાર કર્યો છે. જો કે, ઈરાને સત્તાવાર રીતે આવી કોઈ યોજના હોવાનો ઇનકાર કર્યો છે, પરંતુ અમેરિકા કોઈ પણ જોખમ લેવા તૈયાર નથી.

બીજી તરફ, આ ધમકી પહેલા અમેરિકાએ ઈરાન પાસે જાહેરમાં એવી જાહેરાત કરવાની માંગ કરી છે કે 'સ્ટ્રેટ ઓફ હોર્મુઝ' (હોર્મુઝની સામુદ્રધુની) નો દરિયાઈ માર્ગ ખુલ્લો રાખવામાં આવે અને ત્યાંથી પસાર થતા જહાજો પર હુમલા બંધ થાય. જ્યારે ઈરાનનો દાવો છે કે આ દરિયાઈ માર્ગ તેના નિયંત્રણમાં રહેવો જોઈએ અને ત્યાંથી પસાર થતા જહાજો પાસેથી તેને ટેક્સ (શુલ્ક) વસૂલવાનો હક મળવો જોઈએ.

અમેરિકા-ઈરાન વચ્ચે વધતો તણાવ

છેલ્લા કેટલાક દિવસોમાં અમેરિકાએ ઈરાનના ઠેકાણાઓ પર હવાઈ હુમલા કર્યા છે, જેના જવાબમાં ઈરાને પશ્ચિમ એશિયાના કેટલાક દેશોમાં જવાબી હુમલા કર્યા છે. આ તણાવ ચાલુ સપ્તાહની શરૂઆતમાં હોર્મુઝ સ્ટ્રેટમાં ત્રણ જહાજો પર ઈરાનના હુમલા બાદ વધુ વકર્યો છે. જો કે, બંને દેશો વચ્ચેના તણાવને ઓછો કરવા માટે ઓમાનમાં બંને પક્ષોના મધ્યસ્થો વચ્ચે વાતચીત થવાની પણ શક્યતા છે.

અત્રે ઉલ્લેખનીય છે કે, ૨૮ ફેબ્રુઆરીના રોજ અમેરિકા અને ઈઝરાયેલે ઈરાન પર હુમલા શરૂ કર્યા હતા, જેના કારણે ૬ અઠવાડિયા સુધી ભીષણ યુદ્ધ ચાલ્યું હતું. હાલ સીઝફાયર (યુદ્ધવિરામ) હોવા છતાં બંને દેશો વચ્ચેની તનાતની ઓછી થવાનું નામ નથી લઈ રહી.