International: 'કોઈ પાકિસ્તાની કાશ્મીર નથી', PoK વાળા રિપોર્ટ પર ન્યૂયોર્ક ટાઈમ્સને ભારતીય દૂતાવાસનો કડક જવાબ- 'હંમેશા ભારતનો અભિન્ન અંગ રહેશે'

અમેરિકા સ્થિત ભારતીય દૂતાવાસે અમેરિકી અખબાર 'ધ ન્યૂયોર્ક ટાઈમ્સ' (NYT) દ્વારા પાકિસ્તાનના કબજા હેઠળના કાશ્મીર (PoK) માં થયેલી હિંસા પર પ્રકાશિત રિપોર્ટની ભારે ટીકા કરી છે. રિપોર્ટમાં આ વિસ્તારને 'પાકિસ્તાની કાશ્મીર' કહેવા પર ભારતીય દૂતાવાસે સખત વાંધો ઉઠાવ્યો છે અને તેને ગેરમાર્ગે દોરનારું તેમજ તથ્યહીન ગણાવ્યું છે. NYT એ પોતાના રિપોર્ટમાં પીઓકેમાં કહેવાતી વિધાનસભા ચૂંટણી દરમિયાન થયેલી હિંસક ઝડપોનો ઉલ્લેખ કર્યો હતો, જેનું શીર્ષક હતું- 'સ્થાનિક ચૂંટણી માટે વોટિંગ શરૂ થતાં જ પાકિસ્તાની કાશ્મીરમાં ઝડપો.'

અમેરિકા સ્થિત ભારતીય દૂતાવાસે હેડલાઈનના શબ્દો સામે વાંધો ઉઠાવતા X પર એક પોસ્ટમાં જણાવ્યું કે, "ન્યૂયોર્ક ટાઈમ્સની હેડલાઈન ગેરમાર્ગે દોરનારી અને ખોટી છે. કોઈ 'પાકિસ્તાની કાશ્મીર' નથી, તે માત્ર પાકિસ્તાનના કબજા હેઠળનું કાશ્મીર (PoK) છે."

PoK સહિત સમગ્ર જમ્મુ-કાશ્મીર ભારતનો જ ભાગ

દૂતાવાસે આગળ લખ્યું, "જમ્મુ-કાશ્મીર અને લદ્દાખના કેન્દ્રશાસિત પ્રદેશો ભારતનો અભિન્ન અને અવિભાજ્ય ભાગ રહ્યા છે, છે અને હંમેશા રહેશે. પાકિસ્તાને આ વિસ્તારોના કેટલાક ભાગો પર ગેરકાનૂની રીતે કબજો જમાવ્યો છે અને હવે તે આ કબજા હેઠળના વિસ્તારોના લોકો સામે હિંસાનો ઉપયોગ કરી રહ્યું છે."

પીઓકેમાં પાકિસ્તાની સેનાની બર્બરતા

ભારતીય દૂતાવાસનું આ નિવેદન એવા સમયે આવ્યું છે, જ્યારે પાકિસ્તાનના કબજા હેઠળના કાશ્મીરમાં સ્થાનિક ચૂંટણી દરમિયાન વિરોધ પ્રદર્શનો અને પ્રદર્શનકારીઓ પર સુરક્ષા દળો દ્વારા કરવામાં આવેલા ભારે બળપ્રયોગે સમગ્ર વિશ્વનું ધ્યાન ખેંચ્યું છે. પીઓકેમાં પ્રદર્શનોનું નેતૃત્વ કરી રહેલા નાગરિક જૂથ 'જોઈન્ટ અવામી એક્શન કમિટી' (JAAC) ના જણાવ્યા અનુસાર, સોમવાર અને મંગળવારના રોજ માત્ર બે જ દિવસમાં પાકિસ્તાની સુરક્ષા દળોની કાર્યવાહીમાં ૩૦ થી વધુ નિઃશસ્ત્ર પ્રદર્શનકારીઓ માર્યા ગયા છે અને ડઝનબંધ લોકો ઘાયલ થયા છે.

JAAC એ આરોપ લગાવ્યો છે કે પાકિસ્તાની સુરક્ષા દળોએ નિર્દોષ અને નિઃશસ્ત્ર પ્રદર્શનકારીઓ પર ગોળીબાર કર્યો હતો. રાવલકોટ અને મીરપુરમાં ભારે હિંસક ઝડપો થઈ છે. અવામી એક્શન કમિટીએ પાકિસ્તાની સેના પર પ્રદર્શનકારીઓના મૃતદેહો ગાયબ કરવાનો પણ ગંભીર આરોપ લગાવ્યો છે. જૂથે જણાવ્યું કે તેમની પાસે રસ્તાઓ પર લોહીલુહાણ થયેલા લોકોના વીડિયો છે, પરંતુ સુરક્ષા દળોએ તેમના મૃતદેહોને ગાયબ કરી દીધા છે.