International: ભારત-બાંગ્લાદેશ સીમા પર વધ્યો તણાવ, બાંગ્લાદેશીઓએ ભારતીયનું કર્યું અપહરણ તો BSF એ સ્મગલરને વિંધી નાખ્યો

ભારત અને બાંગ્લાદેશ સીમા પર તૈનાત સુરક્ષા દળો વચ્ચે તણાવ વધી ગયો હોવાના અહેવાલો સામે આવ્યા છે. બાંગ્લાદેશના બોર્ડર ગાર્ડ બાંગ્લાદેશ (BGB) એ દાવો કર્યો છે કે બોર્ડર સિક્યુરિટી ફોર્સ (BSF) એ એક બાંગ્લાદેશી નાગરિકની ગોળી મારીને હત્યા કરી દીધી છે. મૃતકની ઓળખ ૨૦ વર્ષીય તારા મિયા તરીકે થઈ છે, જે ભારતીય સરહદમાં ઘૂસણખોરી કરી રહ્યો હતો.

BSF એ ઘૂસણખોરો પર ચલાવી ગોળીઓ

BGB ના જણાવ્યા અનુસાર, તસ્કારોનું એક જૂથ ભારતીય વિસ્તારમાં ઘૂસી ગયું હતું. BSF એ ઘૂસણખોરી કરી રહેલા આ તસ્કરોના જૂથ પર ગોળીબાર કર્યો હતો, જેમાં તારા મિયાનું મોત થયું હતું. ઉલ્લેખનીય છે કે મૃતક તારા મિયા સામે અગાઉ પણ તસ્કરીનો ગુનો નોંધાયેલો હતો.

બાંગ્લાદેશીઓએ ભારતીય નાગરિકનું કર્યું અપહરણ

આ ઘટના પહેલા શનિવારે ભારત-બાંગ્લાદેશ સરહદ નજીક પંચગઢ જિલ્લામાં તણાવ ત્યારે વધી ગયો જ્યારે સ્થાનિક બાંગ્લાદેશીઓએ એક ભારતીય યુવકનું અપહરણ કરી લીધું હતું. અપહરણ કરાયેલા ભારતીય નાગરિકની ઓળખ પશ્ચિમ બંગાળના જલપાઈગુડી જિલ્લાના રહેવાસી ૩૫ વર્ષીય દીપાંકર ગોપ તરીકે થઈ છે.

બાંગ્લાદેશીઓનો દાવો છે કે તેમણે એક ૭૮ વર્ષીય બાંગ્લાદેશી નાગરિકને BSF દ્વારા અટકાયતમાં લેવાના વિરોધમાં આ પગલું ભર્યું છે. પરિસ્થિતિ વણસતાં BGB અને BSF ના કંપની કમાન્ડરો વચ્ચે ફ્લેગ મીટિંગ યોજાઈ હતી, પરંતુ કોઈ ઉકેલ આવી શક્યો નથી.

બાંગ્લાદેશી નાગરિકને મુક્ત કરવાની માંગ

સ્થાનિક લોકોનો આરોપ છે કે અગાઉ એક બાંગ્લાદેશી ખેડૂત તમીજ ઉદ્દીનને BSF એ પકડી લીધો હતો, જે પોતાની ગાય શોધતી વખતે ભારતીય સરહદમાં આવી ગયો હતો. બાંગ્લાદેશીઓએ શરત મૂકી છે કે જો BSF તમીજ ઉદ્દીનને મુક્ત કરશે, તો તેઓ પણ ભારતીય નાગરિક દીપાંકર ગોપને ભારતીય અધિકારીઓને સોંપી દેશે.