International: ઈરાન સમર્થિત હૂતિઓનો લાલ સાગરમાં સાઉદી તેલ ટેન્કરો પર હુમલો: મિસાઈલ અને ડ્રોન વડે સાધ્યું નિશાન, હોર્મુઝ બાદ નવો મોરચો ખોલ્યો

યમનના હૂથી વિદ્રોહીઓએ દાવો કર્યો છે કે તેમણે લાલ સાગર (Red Sea) માં સાઉદી અરેબિયાના બે ઓઈલ ટેન્કરો પર ભીષણ હુમલો કર્યો છે. સાઉદી અરેબિયા સંબંધિત જહાજો સામે દરિયાઈ નાકેબંધી (Maritime Blockade) ની જાહેરાત કર્યા બાદ ઈરાન સમર્થિત આ જૂથનો આ પહેલો મોટો હુમલો છે.

હૂથીઓએ જણાવ્યું કે તેમણે બાબ અલ-મંદેબ (Bab al-Mandeb) નજીક બેલિસ્ટિક મિસાઈલ, ક્રૂઝ મિસાઈલ અને ડ્રોનનો ઉપયોગ કરીને સાઉદી અરેબિયાના બે તેલ ટેન્કરો— એન્સેલિયા (Encelia) અને લાયલા (Layla) ને નિશાન બનાવ્યા હતા.

જહાજોમાં આગ લાગ્યાનો દાવો

ટેલિગ્રામ પર જાહેર કરાયેલા એક નિવેદનમાં હૂથી વિદ્રોહીઓએ જણાવ્યું કે તેમણે આ બંને ટેન્કરો વિરુદ્ધ એક વિશેષ સૈન્ય અભિયાન ચલાવ્યું હતું. હુમલા બાદ બંને ટેન્કરોમાં આગ લાગી હોવાનો દાવો પણ કરવામાં આવ્યો છે. હૂથી જૂથે સાઉદી ઓઈલ ટેન્કરો પર તેમની દરિયાઈ નાકેબંધીના ઉલ્લંઘનનો આરોપ લગાવ્યો હતો.

સાઉદી અરેબિયા વિરુદ્ધ દરિયાઈ નાકેબંધી

હૂથી વિદ્રોહીઓએ સાઉદી અરેબિયા સામે દરિયાઈ નાકેબંધીની જાહેરાત કરી હતી. આ ઈરાન સમર્થિત જૂથનું કહેવું છે કે તેમણે આ પગલું આ મહિનાની શરૂઆતમાં સના એરપોર્ટ પર થયેલા હુમલાના જવાબમાં ઉઠાવ્યું છે, જેના માટે તેઓ સાઉદી અરેબિયાને જવાબદાર ગણાવે છે.

અંતરરાષ્ટ્રીય શિપિંગ રૂટ પર વધતું સંકટ

સાઉદી અરેબિયાએ હૂથીઓની આ દરિયાઈ નાકેબંધીની સખત શબ્દોમાં નિંદા કરી છે અને યમનની આંતરરાષ્ટ્રીય સ્તરે માન્યતા પ્રાપ્ત સરકાર પ્રત્યે રિયાધના સમર્થનને પુનરોચ્ચાર કર્યો છે.

લાલ સાગરમાં હૂથીઓના આ હુમલાને કારણે મહત્વપૂર્ણ આંતરરાષ્ટ્રીય શિપિંગ રૂટ પર તણાવ વધી ગયો છે. આ પહેલાં હોર્મુઝની સામુદ્રધુની (Strait of Hormuz) માં ઈરાનના હુમલાને કારણે અખાતી દેશોની ઊર્જા નિકાસને ભારે અસર પહોંચી હતી. હવે લાલ સાગરમાં શરૂ થયેલા આ નવા મોરચાથી ગ્લોબલ ટ્રેડ અને એનર્જી સપ્લાય પર મોટું સંકટ ઊભું થયું છે. હૂથીઓએ દાવો કર્યો છે કે તેમની નાકેબંધીના કારણે લગભગ ૧૦ જહાજો પહેલેથી જ પરત ફરી ચૂક્યા છે.