International: બાંગ્લાદેશના PM તારિક રહમાન ભારત નહીં આવે: ઘરેલું રાજકારણનો ડર, જૂના મિત્રથી બનાવી રહ્યા છે અંતર

બાંગ્લાદેશના વડાપ્રધાન તારિક રહમાને હાલ પૂરતો પોતાનો ભારત પ્રવાસ મોકૂફ રાખવાનો નિર્ણય કર્યો છે. બાંગ્લાદેશના અગ્રણી અખબાર 'અમર દેશ' દ્વારા વિદેશ મંત્રાલયના અધિકારીઓ અને રાજદ્વારી સૂત્રોના હવાલાથી આ અહેવાલ આપવામાં આવ્યો છે. તારિક રહમાનના નેતૃત્વમાં ઢાકા (બાંગ્લાદેશ) દ્વારા પોતાના સૌથી જૂના સહયોગી અને મહત્વપૂર્ણ પાડોશી દેશ ભારતથી અંતર જાળવવા પાછળ બાંગ્લાદેશનું આંતરિક રાજકારણ મુખ્ય કારણ હોવાનું માનવામાં આવે છે.

ભારતથી અંતર જાળવી રહ્યા છે તારિક રહમાન

ભૂતકાળમાં બાંગ્લાદેશના વડાપ્રધાનો પદ સંભાળ્યા બાદ શરૂઆતના તબક્કામાં જ ભારત પ્રવાસને પ્રાથમિકતા આપતા આવ્યા છે, પરંતુ આ વર્ષે ફેબ્રુઆરીમાં યોજાયેલી ચૂંટણી બાદ સત્તામાં આવેલા તારિક રહમાને ભારત પ્રવાસ અંગે કોઈ ખાસ રસ દાખવ્યો નથી. તેના બદલે, રહમાને તેમના પ્રથમ સત્તાવાર વિદેશ પ્રવાસ તરીકે મલેશિયાની પસંદગી કરી હતી અને ત્યારબાદ તેઓ ચીનની મુલાકાતે પણ ગયા હતા.

બાંગ્લાદેશમાં તારિક રહમાનના નેતૃત્વવાળી બીએનપી (BNP) સરકાર આવ્યા બાદ બંને દેશોના દ્વિપક્ષીય સંબંધોમાં નવો અધ્યાય શરૂ થવાની અપેક્ષા હતી. જોકે, ઢાકા તરફથી હજુ સુધી આ દિશામાં કોઈ નક્કર પગલાં લેવામાં આવ્યા નથી. તેમ છતાં, પૂર્વવર્તી વચગાળાની સરકારના સમયની સરખામણીએ હાલમાં સંબંધો થોડા સ્થિર જરૂર થયા છે.

કટ્ટરપંથીઓનું દબાણ અને ભારત સાથેના વણઉકલ્યા પ્રશ્નો

આંતરિક રાજકીય દબાણ: બાંગ્લાદેશની વર્તમાન તારિક રહમાન સરકાર દેશની અંદર ઇસ્લામિક કટ્ટરપંથી સંગઠનોના ભારે દબાણનો સામનો કરી રહી છે.

આ આંતરિક તણાવની સાથે સાથે નવી દિલ્હી અને ઢાકા વચ્ચે કેટલાક મહત્વપૂર્ણ મુદ્દાઓને લઈને પણ ગજગ્રાહ ચાલી રહ્યો છે, જેમાં મુખ્યત્વે બે પ્રશ્નો સામેલ છે:

1. સરહદ પાર નદીના પાણીની વહેંચણીનો વિવાદ.

2. ભારતમાંથી ગેરકાયદેસર બાંગ્લાદેશી ઘૂસણખોરોની પરત ઘરવાપસી.

ભારત-બાંગ્લાદેશ વચ્ચેના વિવાદિત મુદ્દાઓ

આ ઘૂસણખોરીના મુદ્દાને કારણે સરહદ પર ભારતની બીએસએફ (BSF) અને બાંગ્લાદેશના સુરક્ષા દળો વચ્ચે ઘણી વખત તણાવભરી સ્થિતિ પણ સર્જાઈ ચૂકી છે. આ તમામ રાજકીય અને કૂટનીતિક કારણોસર તારિક રહમાન અત્યારે ભારત આવવાનું ટાળી રહ્યા હોવાનું વિશ્લેષકોનું માનવું છે.