International: અમેરિકી ઉપરાષ્ટ્રપતિ JD વેન્સ ચોથી વાર બન્યા પિતા, ભારતવંશી પત્ની ઉષાએ પુત્રને આપ્યો જન્મ: 156 વર્ષમાં પ્રથમ ઘટના

અમેરિકાના ઉપરાષ્ટ્રપતિ જેડી વેન્સ (JD Vance) ચોથી વખત પિતા બન્યા છે. તેમની ભારતવંશી પત્ની અને અમેરિકાની સેકન્ડ લેડી ઉષા વેન્સ (Usha Vance) એ પુત્રને જન્મ આપ્યો છે. અમેરિકી ઇતિહાસમાં 156 વર્ષ બાદ એવું બન્યું છે કે કોઈ સત્તાધારી ઉપરાષ્ટ્રપતિના ઘરે બાળકના કિલકારી ગૂંજી હોય.

જેડી અને ઉષા વેન્સે તેમના ચોથા બાળકનું નામ 'એલેક નીલ વેન્સ' (Alec Neil Vance) રાખ્યું છે. આ કપલને અગાઉથી ત્રણ બાળકો છે – ૯ વર્ષનો ઇવાન, ૬ વર્ષનો વિવેક અને ૪ વર્ષની મિરાબેલ.

સોશિયલ મીડિયા પર શેર કરી ખુશી

જેડી વેન્સ અને ઉષા વેન્સે સોશિયલ મીડિયા પર એક સંયુક્ત નિવેદન જારી કરીને પોતાના પુત્રના જન્મના સમાચાર શેર કર્યા હતા.

"અમને જણાવતા અત્યંત આનંદ થાય છે કે આજે સવારે અમારા પુત્ર 'એલેક નીલ વેન્સ'નો જન્મ થયો છે. ઉષા અને બાળક બંને સ્વસ્થ અને ખુશ છે. અમારા અન્ય ત્રણેય બાળકો તેમના નાના ભાઈને મળવા માટે ખૂબ જ ઉત્સાહિત છે."

ઉષા વેન્સે વોશિંગ્ટન સ્થિત 'વોલ્ટર રીડ નેશનલ મિલિટરી મેડિકલ સેન્ટર' ખાતે બાળકને જન્મ આપ્યો હતો. તેમણે મેડિકલ સેન્ટરના ડોક્ટરો, સ્ટાફ અને વ્હાઇટ હાઉસની મેડિકલ ટીમનો આભાર વ્યક્ત કર્યો હતો.

અમેરિકી ઇતિહાસમાં 156 વર્ષ બાદ બની આ ઘટના

અમેરિકી બ્રોડકાસ્ટર સીબીએસ ન્યૂઝ (CBS News) ના અહેવાલ મુજબ, આધુનિક અમેરિકી ઇતિહાસમાં 156 વર્ષ પછી પ્રથમ વાર બન્યું છે કે કોઈ કાર્યરત ઉપરાષ્ટ્રપતિના ઘરે બાળકનો જન્મ થયો હોય.

અમેરિકી ઉપરાષ્ટ્રપતિ જેડી વેન્સ હંમેશાં અમેરિકનોને વધુ બાળકો પેદા કરવા માટે પ્રોત્સાહિત કરતા રહ્યા છે. તેમણે અગાઉ 'માર્ચ ફોર લાઈફ' રેલી દરમિયાન જણાવ્યું હતું કે તેઓ ઈચ્છે છે કે અમેરિકામાં વધુમાં વધુ બાળકોનો જન્મ થાય.