International: ટ્રમ્પની ધમકી બાદ અમેરિકી સેનાનો ઈરાન પર જોરદાર હુમલો, કેશમ આઈલેન્ડ અને બંદર અબ્બાસ સહિત અનેક સ્થળોએ ધડાકા

અમેરિકી સેનાએ ગુરુવારે વહેલી સવારે ફરી એકવાર હવાઈ હુમલા શરૂ કરી દીધા છે. આ હુમલા જોર્ડનમાં અમેરિકી સેનાના મથક પર ઈરાનના મિસાઈલ હુમલાના એક દિવસ બાદ કરવામાં આવ્યા છે. જોર્ડન પરના હુમલા બાદ અમેરિકી પ્રમુખ ડોનાલ્ડ ટ્રમ્પે ઈરાન પર ખૂબ જ જોરદાર હુમલો કરવાની વાત કહી હતી. અમેરિકી સેન્ટ્રલ કમાન્ડે X પર એક પોસ્ટમાં જણાવ્યું કે આજે રાત્રે ૮ વાગ્યે (અમેરિકી સમયાનુસાર) ઈરાન સામે હુમલા શરૂ કરવામાં આવ્યા હતા.

સેન્ટ્રલ કમાન્ડે નિવેદનમાં જણાવ્યું હતું કે, "આ હુમલા મધ્ય પૂર્વમાં હાજર અમેરિકી સેના પર ગઈકાલે ઈરાન દ્વારા કરવામાં આવેલા હુમલાના પ્રયાસનો કડક જવાબ છે." સીએનએન (CNN) એ એક અમેરિકી અધિકારીને ટાંકીને જણાવ્યું હતું કે સેનાએ ઈરાની સૈન્ય મથકો પર હુમલા કર્યા છે.

દક્ષિણ ઈરાનમાં સંભળાયા વિસ્ફોટ

દરમિયાન ઈરાનના સરકારી મીડિયા પ્રેસ ટીવીએ જણાવ્યું હતું કે અમેરિકાના હુમલા બાદ દેશના દક્ષિણી વિસ્તારોમાં મોટા ધડાકાના અવાજો સંભળાયા છે. સરકારી બ્રોડકાસ્ટર IRIB એ જણાવ્યું હતું કે બંદર અબ્બાસ અને અબૂ મુસા, કિશ અને કેશમ ટાપુઓ પર પણ વિસ્ફોટ થયા છે. હોર્મુઝ વિસ્તારમાં આવતા કેશમ ટાપુ પર ત્રણ ધડાકા સંભળાયા છે. કેશમમાં એક રહેણાંક ઈમારત પર હુમલા બાદ બે લોકો કાટમાળ નીચે દબાયા હોવાના અહેવાલ છે.

ટ્રમ્પે આપી હતી જોરદાર હુમલાની ધમકી

ટ્રમ્પે બુધવારે ઓવલ ઓફિસમાં પત્રકારોને જણાવ્યું હતું કે, 'હવે અમારો વારો છે. અમે તેમના પર ખૂબ જ જોરદાર હુમલો કરવા જઈ રહ્યા છીએ. તેમને ખબર છે કે આવું થવાનું છે.' ટ્રમ્પનું આ નિવેદન મંગળવારે જોર્ડનમાં અમેરિકી સૈન્ય મથક પર થયેલા હુમલા બાદ આવ્યું હતું. ઈરાનના ઈસ્લામિક રિવોલ્યુશનરી ગાર્ડ કોર્પ્સે જોર્ડનમાં અમેરિકી ઠેકાણાઓ પર અનેક બેલેસ્ટિક મિસાઈલો છોડી હતી. જોર્ડનની સેનાએ જણાવ્યું કે તેણે ૫ મિસાઈલોને હવામાં જ રોકી દીધી હતી.

ઈરાનની તસ્નીમ ન્યૂઝ એજન્સીએ જણાવ્યું કે ફાર્સ પ્રાંતમાં કાજેરૂન શહેરના બહારના વિસ્તારમાં એક સ્થળને નિશાન બનાવવામાં આવ્યું હતું. મિસાઈલ હુમલા બાદ કિશ ટાપુ પર જોરદાર ધડાકાના અવાજો સંભળાયા હતા, પરંતુ અધિકારીઓને ટાંકીને જણાવાયું છે કે ટાપુના એરપોર્ટ અને પેસેન્જર ફેરી સર્વિસ પર કોઈ અસર પડી નથી.