International: અમેરિકામાં H-1B વીઝા પર 3 વર્ષ માટે પ્રતિબંધ મૂકતું બિલ રજૂ, $1,00,000 ફીને કાયદાકીય રૂપ અપાશે; ભારતીયોને મોટો ઝટકો

અમેરિકી સીનેટર ટિમ શીહી દ્વારા યુએસ સીનેટમાં એક નવું બિલ રજૂ કરવામાં આવ્યું છે, જે ભારતીય આઈટી પ્રોફેશનલ્સ અને કુશળ કર્મચારીઓ માટે મોટો આંચકો સાબિત થઈ શકે છે. 'એન્ડ H-1B એબ્યુઝ એક્ટ' (End H-1B Abuse Act) નામના આ બિલનો મુખ્ય હેતુ આગામી ૩ વર્ષ માટે નવા H-1B વીઝા જારી કરવા પર સંપૂર્ણ પ્રતિબંધ મૂકવાનો અને ટ્રમ્પ પ્રશાસન દ્વારા સૂચવવામાં આવેલી $૧,૦૦,૦૦૦ ની વીઝા ફીને કાયદાકીય મંજૂરી આપવાનો છે.

ઉલ્લેખનીય છે કે, અગાઉ યુએસ કોર્ટે ટ્રમ્પ પ્રશાસનના વીઝા ફી વધારવાના નિર્ણયને રદ કર્યો હતો. હવે રિપબ્લિકન પાર્ટીના નેતા ટિમ શીહી દ્વારા આ પ્રસ્તાવિત કાયદો લાવીને વીઝા નિયમોને અત્યંત કડક બનાવવાની તૈયારી કરવામાં આવી રહી છે.

'અમેરિકી કર્મચારીઓના હિતોનું રક્ષણ પ્રાથમિકતા'

બિલ રજૂ કરતા સીનેટર ટિમ શીહીએ જણાવ્યું હતું કે, "H-1B પ્રોગ્રામની શરૂઆત ટેકનિકલ ક્ષેત્રે કર્મચારીઓની અછત દૂર કરવા માટે કરવામાં આવી હતી, નહીં કે અમેરિકી નાગરિકોના સ્થાને સસ્તા વિદેશી કામદારોને લાવવા માટે. આ કાયદો અમેરિકી નાગરિકોની નોકરીઓની સુરક્ષા કરશે અને રાષ્ટ્રીય સુરક્ષાના હિતોને પ્રાધાન્ય આપશે."

પ્રસ્તાવિત બિલની મુખ્ય જોગવાઈઓ:

• ૩ વર્ષનો બેન: નવા H-1B વીઝા જારી કરવા પર ૩ વર્ષ માટે સંપૂર્ણ રોક.

• વાર્ષિક કેપમાં ઘટાડો: વાર્ષિક વીઝા મર્યાદા ઘટાડીને માત્ર ૨૫,૦૦૦ કરવાની ભલામણ.

• વેતન મર્યાદા: H-1B વીઝા ધારકો માટે ન્યૂનતમ $૨,૦૦,૦૦૦ નો વાર્ષિક પગાર નક્કી કરવો.

• લોટરી સિસ્ટમ રદ: હાલની રેન્ડમ લોટરી સિસ્ટમ નાબૂદ કરીને મેરિટ અને સેલેરી આધારિત સિલેક્શન લાગુ કરવું.

• ડિપેન્ડન્ટ્સ પર રોક: વીઝા ધારકો પોતાના પરિવારજનો કે આશ્રિતો (Dependents) ને અમેરિકા લાવી શકશે નહીં.

• OPT પ્રોગ્રામ બંધ: વિદેશી વિદ્યાર્થીઓ માટે કામ કરવાની મંજૂરી આપતા 'ઓપ્શનલ પ્રેક્ટિકલ ટ્રેનિંગ' (OPT) પ્રોગ્રામને નાબૂદ કરવો.

ભારતીયો પર સૌથી વધુ અસર

અમેરિકાની ટેકનોલોજી કંપનીઓ દર વર્ષે હજારો ભારતીય એન્જિનિયરો અને આઈટી નિષ્ણાતોની ભરતી માટે H-1B વીઝા પર જ નિર્ભર રહે છે. જો આ પ્રસ્તાવિત કાયદો પસાર થઈ જશે, તો અમેરિકામાં નોકરી કરવાનું કે ગ્રીન કાર્ડ મેળવવાનું સ્વપ્ન જોતા લાખો ભારતીય યુવાનો પર તેની સીધી અને ગંભીર અસર પડશે.