International: H-1B વીઝા પર ટ્રમ્પને કોર્ટનો સખત ફટકો: $1,00,000 ફી પર રોક યથાવત, ભારતીયોને મોટી રાહત

અમેરિકાની એક ફેડરલ અપીલ કોર્ટે H-1B વીઝા પર રાષ્ટ્રપતિ ડોનાલ્ડ ટ્રમ્પને મોટો ઝટકો આપ્યો છે. કોર્ટે ટ્રમ્પ પ્રશાસનની તે અરજીને ફગાવી દીધી છે જેમાં નીચલી કોર્ટના જજ દ્વારા આપવામાં આવેલા સ્ટે આદેશને હટાવવાની માંગ કરવામાં આવી હતી. નીચલી કોર્ટના જજે પોતાના ચુકાદામાં ટ્રમ્પ પ્રશાસન દ્વારા વિદેશી પ્રોફેસનલ્સ પર લગાવાયેલી ૧,૦૦,૦૦૦ અમેરિકન ડોલરની વીઝા ફી પર રોક લગાવી દીધી હતી અને તેને ગેરકાનૂની ટેક્સ ગણાવ્યો હતો જેને યુએસ કોંગ્રેસે મંજૂરી આપી નહોતી.

અપીલ કોર્ટે સ્ટે આપવાનો ઇનકાર કર્યો

બોસ્ટનની ૧લી સર્કિટ કોર્ટ ઓફ અપીલ્સે નીચલી કોર્ટના ૮ જૂનના નિર્ણય પર સ્ટે આપવાનો સાફ ઇનકાર કરી દીધો છે. ત્રણ જજોની બેન્ચે ચુકાદો આપતા જણાવ્યું કે ટ્રમ્પ પ્રશાસન એ સાબિત કરવામાં નિષ્ફળ રહ્યું છે કે તેમણે આવી અધધ ફી લાદીને પોતાના અધિકારક્ષેત્રનું ઉલ્લંઘન નથી કર્યું.

ફીમાં કરવામાં આવ્યો હતો મોટો વધારો

અમેરિકી રાષ્ટ્રપતિ ડોનાલ્ડ ટ્રમ્પે સપ્ટેમ્બર ૨૦૨૫માં એક આદેશ જારી કરીને H-1B વીઝાની ફી વધારીને ૧,૦૦,૦૦૦ ડોલર કરી દીધી હતી. આ પહેલા આ ફી માત્ર ૨,૦૦૦ થી ૫,૦૦૦ અમેરિકન ડોલર જેટલી જ હતી. અમેરિકન આઈટી અને ટેક કંપનીઓ વિદેશી કર્મચારીઓની ભરતી માટે મોટે ભાગે આ જ વીઝા પર નિર્ભર રહે છે. આ નિર્ણયની સૌથી વધુ અસર ભારતીયો પર પડી રહી હતી, કારણ કે H-1B વીઝા મેળવનારાઓમાં લગભગ 80 ટકા ભારતીયો હોય છે.

H-1B પ્રોગ્રામના દુરુપયોગનો આરોપ

H-1B પ્રોગ્રામ હેઠળ અમેરિકા દર વર્ષે ૬૫,૦૦૦ સામાન્ય વીઝા અને એડવાન્સ્ડ ડિગ્રી ધરાવતા પ્રોફેસનલ્સ માટે વધારાના ૨૦,૦૦૦ વીઝા જારી કરે છે, જે ૩ થી ૬ વર્ષ માટે માન્ય હોય છે. ફી વધારા પાછળ ટ્રમ્પે એવો દાવો કર્યો હતો કે H-1B વીઝાનો દુરુપયોગ થઈ રહ્યો છે, જેથી સ્થાનિક અમેરિકી વર્કર્સની જગ્યાએ ઓછા પગારવાળા વિદેશી કર્મચારીઓને રાખી શકાય.