International: યુક્રેને ફ્રાન્સ પાસેથી ખરીદ્યા 16 રાફેલ વિમાન, રશિયાના Su-57 સ્ટીલ્થ જેટ સાથે થશે સીધી ટક્કર; જાણો કયું ફાઈટર જેટ પડશે ભારે?

રશિયા અને યુક્રેન વચ્ચે ચાલી રહેલા ભીષણ યુદ્ધની વચ્ચે એક મોટા સમાચાર સામે આવ્યા છે. ભૂતકાળમાં પાકિસ્તાન સામેના ઓપરેશનમાં શાનદાર પ્રદર્શન કરનાર ફ્રાન્સના શક્તિશાળી 'રાફેલ' (Rafale) ફાઈટર જેટથી હવે યુક્રેનની સેના પણ સજ્જ થવા જઈ રહી છે. ફ્રાન્સ સરકારના સૂત્રોએ પુષ્ટિ કરી છે કે યુક્રેનને ૧૬ અત્યાધુનિક રાફેલ F-4 કેટેગરીના ફાઈટર જેટ સપ્લાય કરવામાં આવશે.

આ યુદ્ધ વિમાનો યુક્રેનની સેનાને વર્ષ ૨૦૨૮ થી ૨૦૨૯ વચ્ચે મળશે. ફ્રાન્સ અને યુક્રેન વચ્ચે વર્ષ ૨૦૨૫ માં થયેલા સંરક્ષણ ભાગીદારી કરાર હેઠળ આ પ્રથમ મોટી ડીલ છે, જે ૨૦૩૫ સુધીમાં ૧૦૦ રાફેલ જેટ સુધી પહોંચી શકે છે. યુક્રેનની ધરતી પર રાફેલની સીધી ટક્કર રશિયાના પાંચમી પેઢીના ઘાતક ફાઈટર જેટ સુખોઈ-૫૭ (Sukhoi-57) સાથે થશે.

સુખોઈ-૫૭ સામે રાફેલ કેટલું શક્તિશાળી?

સંરક્ષણ નિષ્ણાતોના મતે, રશિયાનું સુખોઈ-૫૭ એ 5th Generation (પાંચમી પેઢીનું) સ્ટીલ્થ ફાઈટર જેટ છે, જે રાફેલ કરતાં વધુ શક્તિશાળી રડાર, વધુ ઈંધણ ક્ષમતા અને મોટી માત્રામાં બોમ્બ તેમજ મિસાઈલ લઈ જવાની ક્ષમતા ધરાવે છે. હવામાંથી હવામાં હુમલો કરવાની બાબતમાં પણ સુખોઈ-૫૭ રાફેલ કરતાં આગળ છે.

તેમ છતાં, રાફેલ જેટ સમગ્ર રશિયન વાયુસેના માટે મોટો ખતરો સાબિત થશે. હાલમાં યુક્રેન જૂના એફ-૧૬ અને મિરાજ-૨૦૦૦ જેવા વિમાનો ઉડાવી રહ્યું છે, જેની સરખામણીએ રાફેલના આવવાથી યુક્રેનની તાકાતમાં જબરદસ્ત વધારો થશે.

બંને વિમાનો સાથે ભારતનું મોટું કનેક્શન

ભારત આ બંને ફાઈટર જેટ્સના કેન્દ્રમાં છે, જેના કારણે વૈશ્વિક સ્તરે આ ડીલ પર નજર રાખવામાં આવી રહી છે:

• રાફેલ અને ભારત: ભારતીય વાયુસેના (IAF) પાસે ઓલરેડી રાફેલ વિમાનો છે. આ ઉપરાંત ભારત ફ્રાન્સ પાસેથી વધુ ૧૦૦ રાફેલ ખરીદવા માટે વાતચીત કરી રહ્યું છે. જો કે, અત્યારે સોર્સ કોડ, કિંમત અને ટેક્નોલોજી ટ્રાન્સફર (ભારતમાં જ વિમાન બનાવવા) ની શરતોને લીધે વાતચીત ચાલી રહી છે.

• સુખોઈ-૫૭ અને ભારત: બીજી તરફ, રશિયાએ ભારતને તેના સૌથી આધુનિક સુખોઈ-૫૭ સ્ટીલ્થ જેટની ઓફર કરી છે. રશિયા ભારતને સંપૂર્ણ ટેક્નોલોજી ટ્રાન્સફર સાથે આ વિમાનો ભારતમાં જ ઉત્પાદિત કરવા માટે તૈયાર છે, જેને લઈને બંને દેશો વચ્ચે ગંભીર મંત્રણા ચાલી રહી છે.

હવે જોવાનું એ રહેશે કે વર્ષ ૨૦૨૮માં જ્યારે રાફેલ યુક્રેનના આકાશમાં ઉડશે, ત્યારે રશિયાના સુખોઈ વિમાનો સામે તે કેટલું ટકી શકશે.