સુરત પૂર: 9,100 પરિવારોનો સર્વે પૂર્ણ,: 48 થી 72 કલાકમાં સ્થિતિ સામાન્ય કરવા આદેશ

સુરત અને આસપાસના વિસ્તારોમાં ભારે વરસાદ અને પૂરના કારણે સર્જાયેલી વિકટ પરિસ્થિતિ બાદ રાજ્ય સરકાર દ્વારા જનજીવન પૂર્વવત કરવા માટે યુદ્ધના ધોરણે કવાયત હાથ ધરવામાં આવી છે. નાયબ મુખ્યમંત્રી હર્ષ સંઘવીએ મોડી રાત્રે સુરત ખાતે ઉચ્ચસ્તરીય સમીક્ષા બેઠક યોજીને 48 થી 72 કલાકમાં શહેરને ફરી ધમધમતું કરવા માટે તંત્રને કડક આદેશ આપ્યા છે.

મોડી રાત્રે કલેક્ટર કચેરી ખાતે હાઈ-લેવલ સમીક્ષા બેઠક 

પૂરના પાણી ઓસર્યા બાદની સ્થિતિનો તાગ મેળવવા માટે નાયબ મુખ્યમંત્રી હર્ષ સંઘવીએ સુરત કલેક્ટર કચેરીમાં જિલ્લાના તમામ સંકલન અધિકારીઓ અને મહાનગરપાલિકાના ઉચ્ચ અધિકારીઓ સાથે તાકીદની બેઠક યોજી હતી. આ બેઠકમાં તેમણે કોઈપણ પ્રકારની ઢીલાશ દાખવ્યા વિના ત્રણ મુખ્ય બાબતો પર ભાર મૂક્યો હતો: ભરાયેલા પાણીનો ત્વરિત નિકાલ, યુદ્ધના ધોરણે સાફસફાઈ અને નાગરિકોની સ્વાસ્થ્ય સુરક્ષા. પૂરથી પ્રભાવિત વેપાર-રોજગાર અને દુકાનોને આગામી 48 થી 72 કલાકમાં ફરી રાબેતા મુજબ શરૂ કરવા માટે પ્રશાસનને સ્પષ્ટ સૂચનાઓ આપવામાં આવી છે.

9100 પરિવારોનો રેકોર્ડબ્રેક સર્વે અને રોકડ સહાયની ચૂકવણી 

રાહત કામગીરી અંગે માહિતી આપતા નાયબ મુખ્યમંત્રીએ જણાવ્યું હતું કે, અસરગ્રસ્તોને તાત્કાલિક મદદ પહોંચાડવા તંત્ર રાત-દિવસ કામગીરી કરી રહ્યું છે. અત્યાર સુધીમાં શહેરના અંદાજે 9100 જેટલા પરિવારોનો ડોર-ટુ-ડોર સર્વે સફળતાપૂર્વક પૂર્ણ કરી દેવાયો છે. જેમાંથી 800 થી વધુ અસરગ્રસ્ત પરિવારોને રૂ. 6,800 લેખે ઘરવખરી અને કેશડોલ (રોકડ સહાય) રૂબરૂમાં ચૂકવી દેવામાં આવી છે. બાકીના પરિવારોને પણ સત્વરે સહાય પહોંચાડવા માટે અલગ-અલગ ટીમો કાર્યરત કરી દેવામાં આવી છે.

58 વિસ્તારોમાં વ્યાપારી નુકસાનીનો અંદાજ અને હેલ્પલાઇન સુવિધા 

સુરત શહેરના 58 જેટલા નાના-મોટા ગલી-મહોલ્લા અને કોમર્શિયલ વિસ્તારોમાં દુકાનોને થયેલા નુકસાનનો સર્વે પણ ઝડપથી કરવામાં આવી રહ્યો છે. પ્રો-એક્ટિવ અભિગમ દાખવીને તૈયાર થઈ રહેલા આ ડેટાના આધારે આગામી દિવસોમાં મુખ્યમંત્રીની અધ્યક્ષતામાં વેપારીઓ માટે સરકારી સહાય અંગેનો મહત્વનો નિર્ણય લેવામાં આવશે. વધુમાં, જો કોઈ વિસ્તાર કે સોસાયટી ટેકનિકલ કારણોસર સર્વેમાંથી રહી ગઈ હોય, તો તેમના માટે કલેક્ટર કચેરી ખાતે ખાસ ઇન્ચાર્જ અધિકારીની નિમણૂક કરી હેલ્પલાઈન નંબર કાર્યરત કરાયો છે. નાગરિકોના ફોન આવતા જ સીધી ટીમ મોકલીને ત્વરિત સર્વે કરવામાં આવશે.