સોનાવેશ દર્શન, ગજરાજોનું પૂજન અને રથનું સ્વાગત...: આજે જગન્નાથજી મંદિરમાં યોજાઈ પૂજા વિધિ,આવતીકાલે નગરચર્યાએ નીકળશે નાથ

અમદાવાદ શહેરમાં ભગવાન જગન્નાથજીની 149મી રથયાત્રા પૂર્વે જમાલપુર સ્થિત જગન્નાથ મંદિરમાં આજે ભક્તિ, પરંપરા અને શ્રદ્ધાનો અનોખો સંગમ જોવા મળ્યો હતો. અષાઢી બીજની પૂર્વ સંધ્યાએ ભગવાન જગન્નાથજી, બલરામજી અને સુભદ્રાજીનો વૈદિક મંત્રોચ્ચાર વચ્ચે ભવ્ય સોનાવેશ કરવામાં આવ્યો હતો. ભગવાનને સોનાના અલંકારોથી શણગારવામાં આવતા મંદિરનું સમગ્ર વાતાવરણ ભક્તિમય બની ગયું હતું. વહેલી સવારથી જ મોટી સંખ્યામાં શ્રદ્ધાળુઓ સોનાવેશના દર્શન માટે ઉમટી પડ્યા હતા અને "જય રણછોડ માખણચોર" તેમજ "જય જગન્નાથ"ના જયઘોષથી સમગ્ર મંદિર પરિસર ગુંજી ઉઠ્યું હતું. ભગવાનના દિવ્ય સ્વરૂપના દર્શન કરી ભક્તોએ ધન્યતા અનુભવી હતી.

ગજરાજો અને રથનું ફૂલોથી કરાયું સ્વાગત

રથયાત્રાની પરંપરા મુજબ ભગવાનની યાત્રામાં સૌથી આગળ ગજરાજો પ્રસ્થાન કરતા હોય છે. આ પરંપરાને જાળવી રાખતાં આજે સવારે રથયાત્રામાં જોડાનારા તમામ ગજરાજોને મંદિર પરિસરમાં લાવવામાં આવ્યા હતા. વૈદિક વિધિ અનુસાર તેમનું વિશેષ પૂજન કરવામાં આવ્યું હતું. ગજરાજો અને ભગવાનના રથનું ફૂલોથી ભવ્ય સ્વાગત કરવામાં આવ્યું હતું. ત્યારબાદ ભગવાન જગન્નાથજી, બલરામજી અને સુભદ્રાજીના રથોને મંદિર પરિસરમાં લાવવામાં આવ્યા હતા, જ્યાં ભક્તોએ રથોના દર્શન કરી આવતીકાલે નીકળનારી ભવ્ય નગરયાત્રા માટે ઉત્સાહ વ્યક્ત કર્યો હતો. હવે આવતીકાલે ભગવાન જગન્નાથજી નગરચર્યા માટે ભવ્ય રથમાં બિરાજમાન થઈ લાખો ભક્તોને દર્શન આપવા નીકળશે.

ગજરાજો ગણપતિનું સ્વરૂપ, નિર્વિઘ્ન રથયાત્રા માટે કરાઈ પ્રાર્થના

મંદિરના મહારાજે જણાવ્યું હતું કે ભગવાન જગન્નાથજી, સુભદ્રાજી અને બલરામજી આવતીકાલે સમગ્ર મહાનગરની જનતાને રથમાં બિરાજમાન થઈ દર્શન આપવા નીકળવાના છે અને તેની આતુરતાપૂર્વક લાખો ભક્તો રાહ જોઈ રહ્યા છે. રથયાત્રાના એક દિવસ અગાઉ ગજાનંદ ગણપતિ મહારાજના સ્વરૂપ માનવામાં આવતા ગજરાજોનું વિશેષ પૂજન કરવામાં આવે છે. હિન્દુ શાસ્ત્રોમાં કોઈપણ શુભ કાર્ય પહેલાં ગણપતિજીનું સ્મરણ કરવામાં આવે છે અને ગજરાજોને પણ ગણપતિનું સ્વરૂપ માનવામાં આવે છે. તેથી ભગવાનના સાનિધ્યમાં ગજરાજોની પૂજા કરીને એવી પ્રાર્થના કરવામાં આવે છે કે ભગવાન જગન્નાથજીની સમગ્ર યાત્રા નિર્વિઘ્ન પૂર્ણ થાય, તમામ ભક્તોને સુખ-શાંતિ અને સમૃદ્ધિ મળે તેમજ ભગવાન અને ગજાનંદ ગણપતિ મહારાજની કૃપા સમગ્ર નગર પર વરસે.

આવતીકાલે નાથ નગરચર્ચાએ નીકળશે. 

ધારાસભ્ય કૌશિક જૈને ગજરાજોની પૂજા કરી વ્યક્ત કરી ધન્યતા

દરિયાપુર વિધાનસભાના ધારાસભ્ય કૌશિક જૈને અમદાવાદના મેયર હિતેશ બારોટ સાથે ગજરાજોની પૂજા કરી હતી. તેમણે જણાવ્યું કે ભગવાન જગન્નાથજીની રથયાત્રા અમદાવાદની આસ્થા અને ગૌરવનું પ્રતિક છે. રથયાત્રામાં જોડાનારા ગજરાજોની પૂજા કરવાનો અવસર મળવો તેમના માટે ગૌરવની વાત છે. તેમણે વિશ્વાસ વ્યક્ત કર્યો કે દરિયાપુર સહિત સમગ્ર માર્ગ પર લાખો ભક્તોના સ્વાગત માટે પૂરતી વ્યવસ્થા કરવામાં આવી છે અને આ ભવ્ય રથયાત્રા શાંતિપૂર્ણ, સુરક્ષિત અને ભવ્ય રીતે પૂર્ણ થશે.

મેયર હિતેશ બારોટે વ્યક્ત કરી ભાવુકતા

અમદાવાદના મેયર હિતેશ બારોટે ગજરાજોની પૂજા વિધિમાં ભાગ લીધો હતો. તેમણે જણાવ્યું કે બાળપણથી તેઓ ભગવાન જગન્નાથજીની રથયાત્રા નિહાળતા આવ્યા છે અને ક્યારેય કલ્પના પણ કરી નહોતી કે એક દિવસ અમદાવાદના મેયર તરીકે તેમને ગજરાજોની પૂજા કરવાનો અવસર મળશે. ગજરાજો ગણપતિજીના સ્વરૂપ હોવાથી તેમની પૂજા રથયાત્રાના શુભ પ્રારંભનું પ્રતિક છે. તેમણે ભગવાન જગન્નાથજીને પ્રાર્થના કરી હતી કે સમગ્ર રથયાત્રા સુખ, શાંતિ, સલામતી અને સમૃદ્ધિ સાથે પૂર્ણ થાય તેમજ દરેક નગરજનને ભગવાનના દિવ્ય દર્શનનો લાભ મળે.

મંદિર ટ્રસ્ટીએ પરંપરાનું મહત્વ સમજાવ્યું

ગજરાજોના પૂજન બાદ જગન્નાથ મંદિરના ટ્રસ્ટી મહેન્દ્ર ઝાએ જણાવ્યું હતું કે વર્ષોથી ચાલી આવતી પરંપરા મુજબ અષાઢી બીજના દિવસે ગજરાજોની આગેવાનીમાં ભગવાન જગન્નાથજીની રથયાત્રા નીકળે છે. તે પહેલાં મંદિરના પ્રાંગણમાં ગજરાજોને બોલાવી ભગવાનના સાનિધ્યમાં તેમનું પૂજન કરવામાં આવે છે અને એવી પ્રાર્થના કરવામાં આવે છે કે ભગવાન સમગ્ર નગરમાં જનતા જનાર્દનને દર્શન આપી હેમખેમ અને મંગલમય રીતે ફરી મંદિર પરત ફરે. તેમણે વધુમાં જણાવ્યું હતું કે આજે સાંજે રાજ્યના મુખ્યમંત્રી ભૂપેન્દ્ર પટેલ જગન્નાથ મંદિરે પધારી ભગવાનના દર્શન કરશે તેમજ વિશિષ્ટ આરતી અને પૂજનમાં ભાગ લેશે.

આવતીકાલે ભક્તિના મહાપર્વની સાક્ષી બનશે અમદાવાદ

જગન્નાથ મંદિરમાં આજે યોજાયેલી સોનાવેશ વિધિ, ગજરાજોનું પૂજન, રથોના આગમન અને ભવ્ય સ્વાગત સાથે સમગ્ર અમદાવાદમાં રથયાત્રાનો ઉત્સાહ ચરમસીમાએ પહોંચી ગયો છે. મંદિર પરિસરમાં ભક્તોની ભારે ભીડ જોવા મળી રહી છે અને દરેકના ચહેરા પર ભગવાનના દર્શનની આતુરતા સ્પષ્ટ દેખાઈ રહી છે. હવે સૌની નજર આવતીકાલે યોજાનારી 149મી જગન્નાથ રથયાત્રા પર કેન્દ્રિત છે, જ્યારે ભગવાન જગન્નાથજી, બલરામજી અને સુભદ્રાજી ભવ્ય રથમાં બિરાજમાન થઈ લાખો ભક્તોને દર્શન આપવા માટે અમદાવાદની નગરચર્યાએ પ્રસ્થાન કરશે.