રથયાત્રા પૂર્વે ભાવનગરમાં એમ્બ્યુલન્સના બહાને દારૂની હેરાફેરીનો ભાંડો ફૂટ્યો: 4.14 લાખનો મુદ્દામાલ જપ્ત

રથયાત્રાના તહેવાર પૂર્વે શહેરમાં કાયદો અને વ્યવસ્થાની જાળવણી માટે સઘન ચેકિંગ કરી રહેલી ભાવનગર લોકલ ક્રાઇમ બ્રાન્ચ (LCB) ને મોટી સફળતા સાંપડી છે. પોલીસે એમ્બ્યુલન્સના નામે શહેરમાં ઘુસાડવામાં આવતો ભારતીય બનાવટના વિદેશી દારૂનો મસમોટો જથ્થો ઝડપી પાડીને કુલ 4,14,008 રૂપિયાનો મુદ્દામાલ જપ્ત કર્યો છે.

બાતમીના આધારે આખલોલ જકાતનાકા પાસે વોચ

પ્રાપ્ત વિગતો અનુસાર, LCB પોલીસની ટીમ શહેર વિસ્તારમાં પેટ્રોલિંગ કરી રહી હતી. તે દરમિયાન ચોક્કસ બાતમી મળી હતી કે નારી ચોકડી તરફથી આવતી એક સફેદ રંગની મારુતિ સુઝુકી ઇકો કાર, જેના પર એમ્બ્યુલન્સ અને હોસ્પિટલના નામ લખેલા છે, તેમાં વિદેશી દારૂનો જથ્થો છુપાવીને લાવવામાં આવી રહ્યો છે. આ બાતમીના આધારે પોલીસે આખલોલ જકાતનાકા નજીક સ્વરાજ ટ્રેક્ટરના શોરૂમ સામે રોડ પર વોચ ગોઠવીને શંકાસ્પદ વાહનને અટકાવ્યું હતું.

રાજસ્થાન માર્કિંગવાળી 1248 દારૂની બોટલ કબ્જે

પોલીસે એમ્બ્યુલન્સની તલાશી લેતા અંદરથી કાળા રંગના ઝભલાઓમાં સંતાડેલો દારૂનો જથ્થો મળી આવ્યો હતો, જેના પર 'ફોર સેલ ઇન રાજસ્થાન ઓન્લી' લખેલું હતું. જપ્ત કરાયેલા જથ્થામાં 180 ml ની ગ્રીન લેબલ બ્લેન્ડેડ વ્હિસ્કીની 480 બોટલ, 8 PM સ્પેશિયલ રેર વ્હિસ્કીની 384 બોટલ, મેકડોવેલ્સ નં 1 ઓરિજિનલ ડિલક્સ કલેકશનની 384 બોટલ તેમજ કિંગફિશર સુપર સ્ટ્રોંગ બીયરના 24 ટીન મળીને કુલ 1248 દારૂની બોટલો અને 24 બીયરના ટીનનો સમાવેશ થાય છે.

એક આરોપીની ધરપકડ, અન્ય બે વોન્ટેડ

કાર્યવાહી દરમિયાન પોલીસે ડ્રાઇવર કિરણ સહદેવભાઈ મહેતાની સ્થળ પરથી જ ધરપકડ કરી લીધી હતી. આ ઉપરાંત, દારૂની હેરાફેરીમાં વપરાયેલી 2.50 લાખ રૂપિયાની મારુતિ સુઝુકી ઇકો એમ્બ્યુલન્સ, એક વીવો કંપનીનો મોબાઇલ ફોન અને ડ્રાઇવિંગ લાયસન્સ સહિતનો મુદ્દામાલ જપ્ત કરવામાં આવ્યો હતો. પ્રાથમિક પૂછપરછમાં આ ગુનામાં સંડોવાયેલા અન્ય બે શખ્સો પ્રહલાદ રાકેશભાઈ રાઠોડ (રહે. ભાવનગર) અને પ્રકાશ (રહે. આબુ, રાજસ્થાન) ના નામ ખૂલતા તેમને વોન્ટેડ જાહેર કરાયા છે.