સુરતમાં પૂરની તારાજી બાદ તંત્ર એક્શન મોડમાં:: સુરતમાં પૂરની તારાજી બાદ તંત્ર એક્શન મોડમાં: વેપારીઓના વીમા ક્લેમ ઝડપી બનાવવા કવાયત અને કાળાબજારિયાઓ સામે લાલ આંખ

સુરત શહેરમાં ગત તારીખ 6 અને 7 જુલાઈના રોજ થયેલા ભારે વરસાદ અને ત્યારબાદ સર્જાયેલી પૂરની ગંભીર પરિસ્થિતિને કારણે અનેક વેપારીઓની કમર તૂટી ગઈ છે. અનેક વિસ્તારોમાં દુકાનો, ગોડાઉન અને ઔદ્યોગિક એકમોમાં પાણી ઘૂસી જતાં મોટું આર્થિક નુકસાન થયું છે. આ પરિસ્થિતિને ધ્યાને લઈ, નાયબ મુખ્યમંત્રીની ઔદ્યોગિક વિસ્તારોની મુલાકાત બાદ વહીવટી તંત્ર પૂરજોશમાં સક્રિય થયું છે. અસરગ્રસ્ત વેપારીઓને હાલાકી ન ભોગવવી પડે અને તેમને થયેલા નુકસાનનું વળતર ઝડપથી મળી રહે તે માટે જિલ્લા કલેક્ટરના અધ્યક્ષસ્થાને ઈન્સ્યોરન્સ કંપનીઓના પ્રતિનિધિઓ સાથે એક મહત્વપૂર્ણ બેઠક યોજવામાં આવી હતી.

આ બેઠકમાં જિલ્લા કલેક્ટરે વીમા કંપનીઓને સ્પષ્ટ સૂચના આપી છે કે, પૂરને કારણે વેપારીઓ દ્વારા જે પણ ક્લેમ કરવામાં આવે, તેનો સ્વીકાર અને નિકાલ અત્યંત ઝડપથી કરવામાં આવે. વીમા ક્લેમની પ્રક્રિયા દરમિયાન અસરગ્રસ્ત વેપારીઓને ઓછામાં ઓછી અડચણ કે તકલીફ પડે તે જોવાની જવાબદારી પણ વીમા કંપનીઓની રહેશે. આ પ્રક્રિયાને સુગમ બનાવવા માટે વહીવટી તંત્ર દ્વારા ઈન્ડસ્ટ્રીઝ અને વેપારી વર્ગ સાથે સંકલન સાધવા માટે એક નોડલ ઓફિસરની નિમણૂક કરવામાં આવી છે. આ ઉપરાંત, વેપારીઓની ફરિયાદોના નિવારણ અને ઈન્સ્યોરન્સ એજન્સીઓ સાથેના સંકલન માટે એક ખાસ પોર્ટલ પણ ટૂંક સમયમાં અમલમાં મૂકવામાં આવશે, જેના પર વેપારીઓ પોતાની રજૂઆત કરી શકશે.

બીજી તરફ, પૂર જેવી આપત્તિના સમયમાં પોતાની મજબૂરીનો ફાયદો ઉઠાવીને કાળાબજારી કરનારા તત્વોને પણ જિલ્લા કલેક્ટરે કડક શબ્દોમાં ચેતવણી આપી છે. પૂર બાદ રિપેરિંગ શોપ્સ, ઓટો રિપેરિંગ સેન્ટરો તેમજ અનાજ અને જીવન જરૂરિયાતની ચીજવસ્તુઓ વેચતા કેટલાક વેપારીઓ દ્વારા સામાન્ય કરતા વધુ ભાવ વસૂલવામાં આવતા હોવાની ફરિયાદો સામે આવી છે. કલેક્ટરે સ્પષ્ટ કર્યું છે કે, આ સમય એકબીજાને મદદ કરવાનો છે, ન કે લોકોની લાચારીનો ગેરફાયદો ઉઠાવવાનો. જો કોઈ પણ વ્યક્તિ કે દુકાનદાર આવી કપરી સ્થિતિમાં વધુ ભાવ લેતા ઝડપાશે, તો તેમની સામે સખત કાયદાકીય કાર્યવાહી કરવામાં આવશે. તંત્રની આ કડક સૂચનાઓથી વેપારી વર્ગમાં રાહતની લાગણી પ્રસરી છે અને પૂરની આ આપત્તિમાં તેમને યોગ્ય ન્યાય મળે તેવી અપેક્ષા સેવાઈ રહી છે. વહીવટી તંત્ર દ્વારા વેપારીઓના નુકસાનના વળતર માટે લેવાયેલા આ નિર્ણયોથી આગામી દિવસોમાં ક્લેમ સેટલમેન્ટની પ્રક્રિયા વધુ સરળ બનશે તેવી આશા છે.