Inetrnational: મુસ્લિમ દેશ મોરોક્કોમાંથી સ્પેનના સેઉટામાં ઘૂસ્યા હજારો શરણાર્થીઓ, બોર્ડર ગેટ તોડ્યા; મેડ્રિડે મોકલી સેના

સ્પેને ઉત્તર આફ્રિકામાં આવેલા પોતાના વિસ્તાર સેઉટા (Ceuta) માં સર્જાયેલી ગંભીર શરણાર્થી કટોકટી બાદ સેના તૈનાત કરી દીધી છે. મોરોક્કોમાંથી હજારોની સંખ્યામાં ગેરકાયદેસર શરણાર્થીઓ સમુદ્ર અને જમીનના રસ્તે સરહદ તોડીને ઘૂસી આવતા આ નિર્ણય લેવામાં આવ્યો છે. સેઉટા એ મોરોક્કોને અડીને આવેલો સ્પેનનો એક નાનો દ્વીપકલ્પ વિસ્તાર છે.

મીડિયા અહેવાલો મુજબ, ગુરુવારે ૨૦૦૦ થી ૩૦૦૦ જેટલા લોકો સેઉટામાં ઘૂસી આવ્યા હતા, જ્યારે છેલ્લા ૧૦ દિવસમાં આ આંકડો ૧૫૦૦ થી ૨૦૦૦ સુધી પહોંચી ગયો હતો. સરહદ પાર કરીને અંદર ઘૂસ્યા બાદ કેટલાક શરણાર્થીઓ 'વિવા એસ્પાના' (સ્પેન ઝિંદાબાદ) ના નારા લગાવતા જોવા મળ્યા હતા.

બોર્ડર ગેટ તોડીને શહેરમાં ઘૂસ્યા લોકો

સોશિયલ મીડિયા પર સામે આવેલા વીડિયોમાં સેંકડો લોકો સરહદ પર બનેલા મુખ્ય ગેટ તોડીને શહેર તરફ ભાગતા દેખાઈ રહ્યા છે. આ સિવાય મોટી સંખ્યામાં લોકો સમુદ્રના રસ્તે તરીને કે લાઈફ જેકેટ અને ટ્યુબના સહારે સ્પેનિશ વિસ્તાર તરફ આવી રહ્યા છે.

પરિસ્થિતિની ગંભીરતાને જોતા સેઉટા ક્ષેત્રના પ્રમુખ જીસસ વિવાસે વિસ્તારમાં માનવીય અને સામાજિક ઈમરજન્સી જાહેર કરી હતી અને સ્પેનની કેન્દ્ર સરકાર પાસે સેના મોકલવાની માંગ કરી હતી.

સ્પેને મોકલી લશ્કરી ટુકડી અને પોલીસ દળ

સ્થિતિ પર કાબૂ મેળવવા માટે સ્પેન સરકારે સેઉટામાં સુરક્ષા દળોની મદદ અર્થે ૬૦ સૈનિકોની એક ટુકડી અને ૨૦૦ વધારાના વિશેષ પોલીસ અધિકારીઓને રવાના કર્યા છે. આ સિવાય સ્પેનના વડાપ્રધાન પેડ્રો સાંચેઝ અને ગૃહમંત્રી પરિસ્થિતિની સમીક્ષા કરવા માટે સેઉટાની મુલાકાત લેવાના છે.

૯ શરણાર્થીઓના મૃતદેહ મળ્યા, સ્થિતિ બેકાબૂ

શરણાર્થીઓના અધિકારો માટે કામ કરતી સંસ્થાઓના જણાવ્યા મુજબ, સ્થિતિ હાલ નિયંત્રણ બહાર છે. ગુરુવારે મોરોક્કોના અધિકારીઓએ શરણાર્થીઓને રોકવા માટે વોટર કેનનનો ઉપયોગ કર્યો હતો. બીજી તરફ, સેઉટામાંથી ૯ શરણાર્થીઓના મૃતદેહ મળી આવ્યા છે, જેથી છેલ્લા કેટલાક મહિનામાં ઘૂસણખોરીના પ્રયાસ દરમિયાન જીવ ગુમાવનારા શરણાર્થીઓની સંખ્યા ૬૦ પર પહોંચી ગઈ છે.