રથયાત્રા પહેલાં SOGની મોટી કાર્યવાહી: રથયાત્રા પહેલાં SOGની મોટી કાર્યવાહી: વેજલપુરમાંથી 7.120 કિલો ગાંજો અને ₹25 લાખની રોકડ સાથે ડ્રગ પેડલર ઝડપાયો

શહેર પોલીસ કમિશનરના માર્ગદર્શન હેઠળ શહેરને નશા મુક્ત બનાવવા માટે ચાલી રહેલી એન્ટી-નાર્કોટિક્સ ઝુંબેશ અંતર્ગત સ્પેશિયલ ઓપરેશન ગ્રુપ (SOG)ને મોટી સફળતા મળી છે. SOGની ટીમને મળેલી ચોક્કસ બાતમીના આધારે વેજલપુર વિસ્તારમાં આવેલી આસીમ પાર્ક સોસાયટીમાં દરોડો પાડવામાં આવ્યો હતો. આ કાર્યવાહી દરમિયાન પોલીસને ઇકબાલ ઉર્ફે શાહરૂખ ગફ્ફારભાઈ મહંમદખાન શેખ નામના 51 વર્ષીય ઇસમના મકાનમાંથી ગેરકાયદેસર રીતે સંગ્રહ કરેલો 7.120 કિલોગ્રામ ગાંજાનો જથ્થો મળી આવ્યો હતો. પોલીસે ઘટનાસ્થળેથી જ આરોપીને ઝડપી પાડી તેની પાસેથી રોકડ રકમ 25,00,000 રૂપિયા અને નાર્કોટિક્સ વેચાણ માટે ઉપયોગમાં લેવાતું ડિજિટલ વજન કાંટો, કટર તેમજ પેકિંગ મટીરીયલ સહિત કુલ 28,66,000 રૂપિયાનો મુદ્દામાલ કબ્જે કર્યો છે. આ સમગ્ર કામગીરીમાં પોલીસ ઇન્સ્પેક્ટર સી.બી.ચૌહાણ, પી.વી.દેસાઇ અને તેમની ટીમની મહત્વની ભૂમિકા રહી છે.

આરોપીની ગુનાહિત પદ્ધતિ અને તપાસ

આરોપીની ચોંકાવનારી વિગતો સામે આવી છે. આરોપી નારોલ વિસ્તારમાં રહેતા ઓડિશા રાજ્યના એક નાગરિક મારફતે ઓડિશાથી ગાંજો મંગાવતો હતો. ત્યારબાદ તે પોતાના ઘરમાં ગાંજાની નાની-નાની પડીકીઓ તૈયાર કરી, કાળા રંગની થેલીમાં 50-50 નંગ ભરીને સાંજના સમયે છૂટક વેચાણ કરતો હતો. પ્રાથમિક તપાસમાં તેણે આ ગાંજો રાનીપુર વિસ્તારમાં રહેતા રાજુ નામના વ્યક્તિ પાસેથી ખરીદ્યો હોવાની કબૂલાત કરી છે, જેને પકડવા માટે પોલીસે તપાસના ચક્રો ગતિમાન કર્યા છે. આરોપી વિરુદ્ધ વેજલપુર પોલીસ સ્ટેશનમાં NDPS એક્ટની વિવિધ કલમો હેઠળ ગુનો દાખલ કરવામાં આવ્યો છે.

આરોપીનો ગુનાહિત ઇતિહાસ

પકડાયેલ આરોપીનો ભૂતકાળ પણ ગુનાખોરીથી ખરડાયેલો છે. આરોપી ઇકબાલ ઉર્ફે શાહરૂખ વિરુદ્ધ અગાઉ સોલા હાઇકોર્ટ, ઇસનપુર, મણીનગર, નારોલ, ગાંધીનગર ડભોડા અને વાંસણા પોલીસ સ્ટેશનમાં ગંભીર પ્રકારના કુલ 9 ગુનાઓ નોંધાયેલા છે. જેમાં હત્યાનો પ્રયાસ, લૂંટ, મારામારી અને જુગારધારા જેવા અનેક ગંભીર ગુનાઓનો સમાવેશ થાય છે. આટલા બધા ગુનાઓ અગાઉ નોંધાયેલા હોવા છતાં તે સતત નશાના વેપાર અને અન્ય ગુનાહિત પ્રવૃત્તિઓમાં સક્રિય રહ્યો હોવાનું જણાય છે. આગામી જગન્નાથજીની રથયાત્રાને ધ્યાનમાં રાખીને શહેર પોલીસ દ્વારા અસામાજિક તત્વો અને નશાના સોદાગરો પર સખત કાર્યવાહી કરવામાં આવી રહી છે, જે અંતર્ગત આ સફળ ઓપરેશનને એક મોટી સિદ્ધિ ગણવામાં આવી રહી છે. હાલ પોલીસ સમગ્ર સપ્લાય ચેઇનને તોડવા માટે વધુ ઊંડાણપૂર્વક તપાસ કરી રહી છે.