International: સઉદી અરેબિયાએ યમન પર કર્યો હુમલો: હુદૈદાહમાં હુથી ઠેકાણાઓ પર બોમ્બમારો, મધ્ય પૂર્વમાં નવા યુદ્ધનું જોખમ

સઉદી અરેબિયાના નેતૃત્વ હેઠળના ગઠબંધને યમનના હુદૈદાહમાં હુથી બળવાખોરોના સૈન્ય ઠેકાણાઓ પર હવાઈ હુમલા કર્યા છે. લાલ સાગરમાં સઉદી સાથે જોડાયેલા જહાજો પર હુથી જૂથ દ્વારા કરવામાં આવેલા હુમલાના જવાબમાં આ કાર્યવાહી કરવામાં આવી છે. સઉદી ગઠબંધનના પ્રવક્તા મેજર જનરલ તુર્કી અલ મલ્કીએ સોશિયલ મીડિયા પર માહિતી આપતાં જણાવ્યું હતું કે, "અમે હોદૈદાહ પ્રાંતમાં આતંકવાદી હુથી મિલિશિયાના કાયદેસરના સૈન્ય ઠેકાણાઓ સામે યોગ્ય જવાબી કાર્યવાહી કરી છે."

આ હુમલા ત્યારે થયા છે જ્યારે ઈરાન સમર્થિત હુથીઓએ આ અઠવાડિયે લાલ સાગરમાંથી પસાર થઈ રહેલા સઉદી અરેબિયાના ૨ ઓઈલ ટેન્કરો પર હુમલો કર્યો હતો. સઉદી અરેબિયાએ આમાંથી એક હુમલાની પુષ્ટિ કરી છે. હુથીઓએ સોમવારે લાલ સાગરમાં સઉદી અરેબિયા સામે નાકાબંધી કરવાની જાહેરાત કરી હતી, જેની સામે સઉદી અરેબિયાએ સખત કાર્યવાહીની ચેતવણી આપી હતી.

હોદૈદાહ અને કામરાન આઇલેન્ડ પર હુમલા

હૂથી સંચાલિત 'અલ-મસીરાહ ટીવી'ના અહેવાલ મુજબ, સઉદી હુમલાઓએ લાલ સાગરના દરિયાકાંઠે આવેલા બંદર શહેર હોદૈદાહને નિશાન બનાવ્યું હતું. આ હુમલાઓમાં હોદૈદાહ શહેરમાં આવેલી સરકારી ટેલિકોમ કંપનીની સુવિધાઓ તેમજ યમનના પશ્ચિમ કિનારે આવેલા કામરાન દ્વીપ (Kamaran Island) પર બોમ્બમારો કરવામાં આવ્યો હતો.

બંદર અને એરપોર્ટ સુરક્ષિત હોવાનો સઉદીનો દાવો

સ્થાનિક લોકોએ હોદૈદાહ બંદર પર પણ હુમલો થયો હોવાનો દાવો કર્યો હતો, પરંતુ ગઠબંધન સેનાના પ્રવક્તા અલ-મલ્કીએ બંદર પરના હુમલાનો ઇનકાર કર્યો છે. તેમણે સ્પષ્ટ કર્યું કે હોદૈદાહ, રાસ ઇસ્સા અને સાલિફ સહિત યમનના તમામ બંદરો વેપારી જહાજોની અવરજવર માટે ખુલ્લા છે.

તેમણે વધુમાં ઉમેર્યું કે હવાઈ વાહનવ્યવહાર ચાલુ રાખવા માટે કોઈ એરપોર્ટને નિશાન બનાવાયું નથી. જોકે, તેમણે હુથીઓ પર સના ઇન્ટરનેશનલ એરપોર્ટ પર ફ્લાઇટ ઓપરેશન ચાલુ ન કરવા દેવાનો આરોપ મૂક્યો અને ચેતવણી આપી કે સઉદી અરેબિયા પોતાના જહાજો અને હિતોની રક્ષા માટે જરૂરી તમામ પગલાં લેવાનું ચાલુ રાખશે.

મધ્ય પૂર્વમાં ફરી સંઘર્ષ વધવાની ભીતિ

આ તાજા હુમલાઓને કારણે સઉદી અરેબિયા અને યમનના હુથીઓ વચ્ચે ફરી એકવાર પૂર્ણ કદનું યુદ્ધ શરૂ થવાનું જોખમ વધી ગયું છે. વર્ષ ૨૦૨૨માં બંને પક્ષો વચ્ચે થયેલી સમજૂતી બાદ મોટાભાગની લડાઈ અટકી ગઈ હતી. પરંતુ આ ઘટના છેલ્લા કેટલાક વર્ષોમાં સઉદી ગઠબંધન સેના અને હુથીઓ વચ્ચેનો પહેલો મોટો લશ્કરી સંઘર્ષ છે.