International: કૌણ છે IFS સત્યાંજલ પાંડે? જેમણે તણાવ વચ્ચે પાકિસ્તાનમાં ભારતીય હાઈકમિશનનો ચાર્જ સંભાળ્યો

પાકિસ્તાનમાં ભારતના નવા ચાર્જ ડી અફેર્સ (કામચલાઉ વડા) તરીકે ડૉ. સત્યાંજલ પાંડેએ ઈસ્લામાબાદ સ્થિત ભારતીય હાઈકમિશનનો પદભાર સંભાળી લીધો છે. તેઓ શનિવારે વાઘા-અટારી બોર્ડર રસ્તે પાકિસ્તાન પહોંચ્યા હતા. ડૉ. પાંડેએ ગીતિકા શ્રીવાસ્તવનું સ્થાન લીધું છે. ઉલ્લેખનીય છે કે, ગીતિકા શ્રીવાસ્તવ પાકિસ્તાનમાં ભારતીય હાઈકમિશનનું નેતૃત્વ કરનારા પ્રથમ મહિલા રાજદ્વારી હતા, જેઓ શનિવારે ભારત પરત ફર્યા છે.

તણાવપૂર્ણ સંબંધો વચ્ચે મોટી જવાબદારી

ડૉ. સત્યાંજલ પાંડેએ આ જવાબદારી એવા સમયે સંભાળી છે જ્યારે નવી દિલ્હી અને ઈસ્લામાબાદ વચ્ચેના દ્વિપક્ષીય સંબંધો અત્યંત વણસેલા છે. ઓગસ્ટ ૨૦૧૯માં ભારતે જમ્મુ-કાશ્મીરમાંથી કલમ ૩૭૦ હટાવ્યા બાદ પાકિસ્તાને રાજદ્વારી સંબંધોનો દરજ્જો ઘટાડી દીધો હતો. ૨૦૧૯થી ભારતે પાકિસ્તાનમાં કોઈ પૂર્ણકાલીન હાઈકમિશનરની નિયુક્તિ કરી નથી અને ત્યાં મિશનની જવાબદારી ચાર્જ ડી અફેર્સ દ્વારા જ સંભાળવામાં આવે છે.

કોણ છે ડૉ. સત્યાંજલ પાંડે?

ડૉ. સત્યાંજલ પાંડે ૨૦૦૮ બેચના ભારતીય વિદેશ સેવા (IFS) ના અધિકારી છે.

• અગાઉની કામગીરી: આ નવી જવાબદારી પહેલાં તેઓ શ્રીલંકા ખાતે ભારતના ડેપ્યુટી હાઈકમિશનર તરીકે ફરજ બજાવી રહ્યા હતા.

• વિવિધ હોદ્દાઓ: છેલ્લા કેટલાક વર્ષોમાં તેમણે વિદેશ મંત્રાલય અને વિદેશ સ્થિત ભારતીય મિશન્સમાં અનેક મહત્વપૂર્ણ હોદ્દાઓ પર સફળતાપૂર્વક કામ કર્યું છે.

ડૉક્ટરથી બ્યુરોક્રેટ બનવાની રોચક સફર

ડૉ. પાંડેની કારકિર્દીની સફર ખૂબ જ રસપ્રદ રહી છે. તેમણે પોતાના કરિયરની શરૂઆત તબીબી ક્ષેત્રથી કરી હતી અને ત્યારબાદ કૂટનીતિના ક્ષેત્રમાં પ્રવેશ કર્યો હતો.

તેમણે આગ્રાની સેન્ટ પીટર્સ કોલેજમાંથી શાળાકીય શિક્ષણ પૂર્ણ કર્યા બાદ લખનૌની પ્રતિષ્ઠિત કિંગ જ્યોર્જ મેડિકલ કોલેજ (KGMC) માંથી MBBS ની ડિગ્રી મેળવી હતી. સિવિલ સર્વિસમાં આવતા પહેલા તેમણે ૨૦૦૬-૨૦૦૭ દરમિયાન દિલ્હીની ગુરુ ગોવિંદ સિંહ હોસ્પિટલમાં રેસિડેન્ટ ડૉક્ટર તરીકે પણ સેવા આપી હતી. ત્યારબાદ તેમણે યુપીએસસી (UPSC) ની પરીક્ષા પાસ કરી અને ૨૦૦૮માં આઈએફએસ (IFS) કેડરમાં જોડાયા હતા.