સુરત: રથયાત્રા પૂર્વે પોલીસ મથકે નેતાઓ અને સામાજિક અગ્રણીઓનો જમાવડો, શાંતિ સમિતિમાં લેવાયો નિર્ણય

આગામી સમયમાં યોજાનારી ભવ્ય શ્રી જગન્નાથ રથયાત્રા-2026 શાંતિપૂર્ણ, ભક્તિમય અને કોમી સૌહાર્દના વાતાવરણમાં સંપન્ન થાય તે હેતુથી સુરત પોલીસ એક્શન મોડમાં આવી છે. આ સંદર્ભે અશ્વિનીકુમાર પોલીસ સ્ટેશન ખાતે એક અગત્યની શાંતિ સમિતિની બેઠકનું આયોજન કરવામાં આવ્યું હતું. આ બેઠકમાં સુરત પોલીસના ઉચ્ચ અધિકારીઓ સહિત વિસ્તારના વિવિધ ધર્મ અને સમાજના અગ્રણીઓ તેમજ પ્રતિષ્ઠિત નાગરિકો મોટી સંખ્યામાં ઉપસ્થિત રહ્યા હતા.આ બેઠક અંગે સુરત ક્રાઈમ બ્રાન્ચના જોઈન્ટ પોલીસ કમિશનર ડૉ. કરણરાજ વાઘેલાએ જણાવ્યું હતું કે, "શ્રી જગન્નાથ રથયાત્રા એ શ્રદ્ધા અને ભાઈચારાનું પ્રતીક છે. રથયાત્રા દરમિયાન શાંતિ, સુરક્ષા અને કાયદો-વ્યવસ્થાની સ્થિતિ જળવાઈ રહે તે માટે પોલીસ સજ્જ છે. આ શાંતિ સમિતિની બેઠકનો મુખ્ય ઉદ્દેશ્ય તમામ સમાજો વચ્ચે પરસ્પર સંવાદ સાધીને સૌહાર્દપૂર્ણ વાતાવરણ ઊભું કરવાનો છે.

શાંતિપૂર્ણ વાતાવરણ અને આયોજન અંગે ચર્ચા

બેઠક દરમિયાન રથયાત્રાના રૂટ, ટ્રાફિક વ્યવસ્થા, સુરક્ષા અને કાયદો-વ્યવસ્થાની સ્થિતિ જાળવી રાખવા અંગે વિસ્તૃત ચર્ચા-વિચારણા કરવામાં આવી હતી. તમામ સમાજના આગેવાનોએ રથયાત્રાના ઉત્સવને ભાઈચારા અને પરંપરાગત રીતે ઉજવવા માટે પોતાના સકારાત્મક સૂચનો રજૂ કર્યા હતા. પોલીસ પ્રશાસન દ્વારા તહેવાર દરમિયાન શાંતિ ડહોળવાનો પ્રયાસ કરનારા અસામાજિક તત્વો સામે કડક નજર રાખવા અને કાયદો જાળવી રાખવા માટે જરૂરી આયોજનની રૂપરેખા સ્પષ્ટ કરવામાં આવી હતી.

પોલીસ દ્વારા કડક સુરક્ષા અને સહયોગની અપીલ

બેઠકમાં હાજર પોલીસ અધિકારીઓ દ્વારા રથયાત્રા દરમિયાન સ્વયંસેવકોની ભૂમિકા, સીસીટીવી કેમેરાની દેખરેખ અને સોશિયલ મીડિયા પર ફેલાતી અફવાઓથી દૂર રહેવા જેવી બાબતો અંગે મહત્વની સૂચનાઓ આપવામાં આવી હતી. નાગરિકોને અપીલ કરવામાં આવી હતી કે, રથયાત્રાના માર્ગ પર ક્યાંય પણ શંકાસ્પદ હલચલ જણાય તો તાત્કાલિક પોલીસને જાણ કરવી અને પોલીસ તંત્રને પૂરતો સહયોગ આપવો.