International: PoKમાં નિહત્થા લોકો પર ગોળીબાર કરતી પાકિસ્તાની સેના, 2 દિવસમાં 30ના મોત, મૃતદેહો પણ ગાયબ કર્યા; ભારે વિરોધ

પાકિસ્તાનના કબજા હેઠળના કાશ્મીરમાં (PoK) પાકિસ્તાની સેના અને રેન્જર્સે વિરોધ પ્રદર્શનોને દબાવવા માટે ક્રૂર દમનચક્ર ચાલુ રાખ્યું છે. પાકિસ્તાની સુરક્ષા દળો પ્રદર્શનકારીઓ પર સીધો ગોળીબાર કરી રહ્યા છે. અહેવાલો મુજબ, છેલ્લા બે દિવસમાં PoKમાં ભારે હિંસા થઈ હોવા છતાં વિરોધ પ્રદર્શન સતત વધી રહ્યો છે અને રાત્રે પણ પ્રદર્શનો થઈ રહ્યા છે. પાકિસ્તાની સેના અને સુરક્ષા દળો સામે લોકોમાં ભારે રોષ જોવા મળી રહ્યો છે.

કાશ્મીરમાં વિરોધ પ્રદર્શનોનું નેતૃત્વ કરી રહેલી જોઈન્ટ અવામી એક્શન કમિટી (JAAC)ના જણાવ્યા અનુસાર, પાકિસ્તાની સુરક્ષા દળોએ હજારો શાંતિપૂર્ણ પ્રદર્શનકારીઓ પર ગોળીબાર કર્યો હતો, જેમાં મંગળવારે ૫ લોકોના મોત થયા હતા. આ પહેલા સોમવારે ૨૫ પ્રદર્શનકારીઓ સુરક્ષા દળોના ગોળીબારમાં માર્યા ગયા હતા.

PoKને દુનિયાથી કાપી નાખવામાં આવ્યું, ઈન્ટરનેટ બંધ

PoKમાં વિરોધ પ્રદર્શનનો તબક્કો શરૂ થયો હતો, જેને દબાવવા માટે પાકિસ્તાને નિર્દયતાથી કાર્યવાહી કરી છે. વિસ્તારમાં ઈન્ટરનેટ બંધ હોવાના કારણે કોઈ સ્પષ્ટ માહિતી મળી રહી નથી. આ વિસ્તારને બાકીની દુનિયાથી સંપૂર્ણપણે કાપી નાખવામાં આવ્યો છે અને મોટા પાયે ધરપકડો કરવામાં આવી રહી છે. દરમિયાન, એમનેસ્ટી ઈન્ટરનેશનલે પાકિસ્તાની અધિકારીઓ પાસે કમ્યુનિકેશન પરનો પ્રતિબંધ હટાવવાની માંગ કરી છે.

જોઈન્ટ અવામી એક્શન કમિટીના નેતૃત્વ હેઠળ પાકિસ્તાનના કબજા હેઠળના કાશ્મીરમાં લોકો પાકિસ્તાની સેનાને વિસ્તારમાંથી હટાવવા અને ચૂંટણી સુધારા સહિતની અનેક માંગણીઓને લઈને રોડ પર ઉતર્યા હતા. સોમવારે આ વિસ્તારમાં વિધાનસભા ચૂંટણીનો પ્રથમ તબક્કો યોજાયો હતો, જેનો સ્થાનિક જૂથોએ બહિષ્કાર કર્યો છે.

પાકિસ્તાની સેના મૃતદેહો ગાયબ કરી રહી છે

JAACના પ્રવક્તા એસ.એ. ખાને પાકિસ્તાની સુરક્ષા દળો પર નિહત્થા પ્રદર્શનકારીઓ પર ગોળીબાર કરવાનો અને પુરાવા નષ્ટ કરવાનો આરોપ લગાવ્યો છે. તેમણે કહ્યું, "સુરક્ષા દળોએ મૃતદેહોને હટાવી દીધા અને મીરપુરની હોસ્પિટલ બંધ કરી દીધી. અમારી પાસે રસ્તાઓ પર લોહીથી લુહાન પડેલા મૃતદેહોની તસવીરો અને વીડિયો પુરાવા છે. સુરક્ષા દળોએ પુરાવા નષ્ટ કરવા માટે મૃતદેહોને ત્યાંથી હટાવી દીધા."

JAAC એ પાકિસ્તાન સામે મૂકી આ માંગણીઓ

JAAC એ PoKમાં પાકિસ્તાની શોષણનો અંત લાવવા માટે ઘણી માંગણીઓ રજૂ કરી છે:

મંત્રીઓ, વરિષ્ઠ અધિકારીઓ, ન્યાયાધીશો અને અમલદારોના વિશેષાધિકારો નાબૂદ કરવા.

પાકિસ્તાનમાં શરણાર્થીઓ માટે PoK વિધાનસભામાં અનામત રાખવામાં આવેલી 12 બેઠકો નાબૂદ કરવી.

તમામ માટે મફત અને સમાન શિક્ષણ આપવું તથા વિદ્યાર્થી સંઘો પુનઃસ્થાપિત કરવા.

PoKમાં આંતરરાષ્ટ્રીય એરપોર્ટનું નિર્માણ કરવું.

સરકારી નોકરીઓમાં શરણાર્થી ક્વોટા નાબૂદ કરવો અને ક્વોટા સિસ્ટમનો અંત લાવવો.

વીજળી અને ઘઉં/લોટના મુદ્દે કરેલા વચનોનો અમલ કરવો.

જોઈન્ટ અવામી એક્શન કમિટીના કાર્યકરો સામેના પોલીસ કેસ પાછા ખેંચવા.

કાળા કાયદા અને દમનકારી બાહ્ય સુરક્ષા ઉપાયો હટાવવા.

સ્થાનિક ઉત્પાદન ખર્ચ અનુસાર વીજળીના દરો ઘટાડવા.

નાગરિકોના અધિકારોનું રક્ષણ કરવું અને JAAC સાથે થયેલા તમામ અગાઉના કરારોનો અમલ કરવો.