International: પાકિસ્તાને ભારતીય વિમાનોના એરસ્પેસ પરનો પ્રતિબંધ લંબાવ્યો, NOTAM જાહેર થતાં ઇન્ડિયન એરલાઇન્સ પર દબાણ વધશે

પાકિસ્તાને ભારતીય વિમાનો માટે પોતાના હવાઈ ક્ષેત્ર (Airspace) ના ઉપયોગ પરનો પ્રતિબંધ 24 ઓગસ્ટ સુધી લંબાવી દીધો છે. પાકિસ્તાન સિવિલ એવિએશન ઓથોરિટી (PAA) દ્વારા આ અંગેની સત્તાવાર જાહેરાત કરવામાં આવી છે. PAA દ્વારા જારી કરાયેલા 'નોટિસ ટુ એરમેન' (NOTAM) માં સ્પષ્ટ કરવામાં આવ્યું છે કે, આ પ્રતિબંધ ભારતમાં નોંધાયેલા, સંચાલિત, માલિકી ધરાવતા અને લીઝ પર લેવામાં આવેલા તમામ વિમાનો પર લાગુ રહેશે.

પાકિસ્તાન સરકારનો આ આદેશ ભારતીય સૈન્ય અને પેસેન્જર (મુસાફર) વિમાનો બંનેને લાગુ પડશે. નોંધનીય છે કે પાકિસ્તાને આ નિર્ણય અગાઉના પ્રતિબંધની મુદત પૂરી થવાના બરાબર ૬ દિવસ પહેલાં લીધો છે, જે ૨૪ જુલાઈએ સમાપ્ત થઈ રહ્યો હતો.

પાકિસ્તાનના બંને ફ્લાઇટ ઇન્ફોર્મેશન રીજનમાં પ્રતિબંધ લાગુ

પાકિસ્તાનનું હવાઈ ક્ષેત્ર મુખ્યત્વે બે ફ્લાઇટ ઇન્ફોર્મેશન રીજન (FIR) માં વહેંચાયેલું છે - કરાચી અને લાહોર.

• બંને ક્ષેત્રો બંધ: PAA ના નિવેદન અનુસાર, આ નવો આદેશ કરાચી અને લાહોર બંને એરસ્પેસ વિસ્તારો પર સમાન રીતે લાગુ થશે.

• તણાવની પૃષ્ઠભૂમિ: ગત વર્ષે થયેલા પહેલગામ આતંકી હુમલા બાદ ભારત અને પાકિસ્તાન વચ્ચેના સંબંધોમાં ભારે તણાવ પેદા થયો હતો. ભારતે પણ જવાબી કાર્યવાહીના ભાગરૂપે પાકિસ્તાની વિમાનો અને એરલાઇન્સ માટે પોતાનું હવાઈ ક્ષેત્ર બંધ કરી દીધું છે. ત્યારથી બંને દેશોએ એકબીજાની એરલાઇન્સ માટે પોતપોતાની હવાઈ સરહદો બંધ રાખી છે.

ભારતીય એરલાઇન્સ પર વધશે ઓપરેશનલ દબાણ

પાકિસ્તાન દ્વારા એરસ્પેસ પ્રતિબંધ વારંવાર લંબાવવામાં આવતા ભારતીય એરલાઇન્સ કંપનીઓ પર આર્થિક અને ઓપરેશનલ દબાણ ખૂબ વધી ગયું છે. રૂટ લાંબો થવાને કારણે ફ્યુઅલ (બળતણ) નો વપરાશ અને મુસાફરીનો સમય બંને વધી ગયા છે.

ફ્લાઇટ્સ પર પડેલી મોટી અસરો:

• ઇન્ડિગો (IndiGo): પાકિસ્તાની એરસ્પેસ બંધ થવાને કારણે ઇન્ડિગોએ અલ્માટી અને તાશ્કંદની ફ્લાઇટ્સ રોકવી પડી હતી. બાદમાં મુંબઈથી ઈરાન થઈને આ રૂટ શરૂ કરાયો હતો, પરંતુ પશ્ચિમ એશિયામાં તણાવ વધતાં ફેબ્રુઆરીથી તે પણ બંધ છે. હાલમાં ફુજૈરાહ, અલ્માટી, તાશ્કંદ, બાકુ અને કુવૈત માટેની ઇન્ડિગોની ફ્લાઇટ્સ સસ્પેન્ડ છે.

• એર ઇન્ડિયા (Air India): એર ઇન્ડિયાએ શિકાગો, શાંઘાઈ અને માલેની ફ્લાઇટ્સ સ્થગિત કરી દીધી છે. આ ઉપરાંત, ઉત્તર અમેરિકા જતી મોટાભાગની નોન-સ્ટોપ ફ્લાઇટ્સને હવે વન-સ્ટોપ ફ્લાઇટ્સમાં ફેરવવાની ફરજ પડી છે.