મોરબીમાં ફૂડ વિભાગનું મેગા ચેકિંગ: 40 થી વધુ સ્થળોએ દરોડા, મોટા પ્રમાણમાં અખાદ્ય જથ્થાનો નાશ

મોરબી મહાનગરપાલિકાની ફૂડ શાખા દ્વારા લોકોના આરોગ્ય સાથે ચેડાં કરતા ભેળસેળિયા તત્વો અને ખાણીપીણીના વેપારીઓ સામે કડક કાર્યવાહી હાથ ધરવામાં આવી છે. ફૂડ વિભાગની ટીમે શહેરના વિવિધ વિસ્તારોમાં નાસ્તા અને ફરસાણની 40 જેટલી દુકાનો પર સઘન ચેકિંગ હાથ ધરીને વાસી અને અખાદ્ય ખોરાકનો સ્થળ પર જ નાશ કર્યો હતો, તેમજ બેદરકારી દાખવતા વેપારીઓને નોટિસ ફટકારી કાયદેસરની કાર્યવાહી કરી છે.

શહેરના વિવિધ વિસ્તારોમાં 40 સ્થળોએ તપાસ 

પ્રાપ્ત વિગતો અનુસાર, મોરબી ફૂડ શાખાની ટીમ દ્વારા શહેરીજનોના સ્વાસ્થ્યની ચિંતા કરી શહેરના નવલખી રોડ, મહેન્દ્રનગર રોડ અને અવની ચોકડી સહિતના વિસ્તારોમાં ચેકિંગ ઝુંબેશ હાથ ધરવામાં આવી હતી. આ ઝુંબેશ અંતર્ગત નાસ્તા અને ફરસાણના વ્યવસાય સાથે સંકળાયેલા 40 જેટલા સ્થળોએ આકસ્મિક તપાસ કરવામાં આવી હતી, જેમાં સ્વચ્છતા અને ખાદ્યપદાર્થોની ગુણવત્તાની ઝીણવટભરી ચકાસણી કરવામાં આવી હતી.

વાસી નૂડલ્સ, એક્સપાયરી ડેટ વગરના પીઝા બેઝ અને પાઉંનો નાશ 

ચેકિંગ દરમિયાન ફૂડ વિભાગની ટીમે અનેક સ્થળોએથી આરોગ્ય માટે અત્યંત હાનિકારક વાસી ખોરાક ઝડપી પાડ્યો હતો. રવાપર ચોકડી પાસે આવેલા 'ગુરુજી ફાસ્ટફૂડ' માંથી વાસી ચટણી, ગ્રેવી, વાસી નૂડલ્સ અને ફૂડ કલર મળી આવતા તેનો સ્થળ પર જ નાશ કરવામાં આવ્યો હતો. આ ઉપરાંત, 'સાઈઝ ઝીરો કેફે' માં ચેકિંગ કરતા ત્યાંથી એક્સપાયરી ડેટ વિનાના પાઉં અને પીઝા બેઝ તેમજ 'ચેતના સ્વીટ એન્ડ નમકીન' માંથી એક્સપાયરી ડેટ વગરના નમકીનના ફૂડ પેકેટો મળી આવતા તંત્ર દ્વારા આ તમામ અખાદ્ય જથ્થાનો સ્થળ પર નાશ કરવામાં આવ્યો હતો.

ગંદકી અને લાયસન્સ વિના ચાલતા વેપારીઓને નોટિસ 

ખાણીપીણીની દુકાનોમાં ગંદકી અને નિયમોના ઉલ્લંઘન અંગે પણ ફૂડ વિભાગે કડક વલણ અપનાવ્યું હતું. નવલખી રોડ પર આવેલા 'પશુપતિનાથ ચાઇનીઝ' માં વાસી નૂડલ્સ અને ફૂડ કલરના ઉપયોગ સાથે અત્યંત ગંદકીવાળી (અનહાઈજેનીક) સ્થિતિ જોવા મળી હતી. તદુપરાંત, તપાસ કરતા આ પેઢી પાસે ફૂડ લાયસન્સ પણ ન હોવાનું સામે આવતા વિભાગ દ્વારા સંચાલકને 'ગ્રીન નોટિસ' ફટકારવામાં આવી છે.

મોરબી ફૂડ શાખાની આ સઘન ચેકિંગની કાર્યવાહીથી નફાખોરી માટે વાસી ખોરાક વેચતા વેપારીઓમાં ફફડાટ વ્યાપી ગયો છે. ફૂડ વિભાગ દ્વારા તમામ વેપારીઓને ફરજિયાત ફૂડ લાયસન્સ મેળવવા, રસોડામાં સ્વચ્છતા જાળવવા અને ગ્રાહકોને ગુણવત્તાયુક્ત ખોરાક પૂરો પાડવા કડક ચેતવણી આપવામાં આવી છે. લોકોના સ્વાસ્થ્ય હિતમાં આગામી દિવસોમાં પણ આ પ્રકારની સરપ્રાઈઝ ચેકિંગ ઝુંબેશ સતત ચાલુ રહેશે તેવો તંત્ર દ્વારા નિર્દેશ આપવામાં આવ્યો છે.