સૌરાષ્ટ્ર યુનિવર્સિટીમાં મોટો વહીવટી ફેરફાર:: પરીક્ષા નિયામક મનીષ શાહનું રાજીનામું, ટૂંક સમયમાં નવા નિયામકની જાહેરાત

રાજકોટની સૌરાષ્ટ્ર યુનિવર્સિટીમાં મહત્વપૂર્ણ વહીવટી ફેરફાર સામે આવ્યો છે. યુનિવર્સિટીના પરીક્ષા નિયામક ડૉ. મનીષ શાહે પોતાના પદ પરથી સ્વૈચ્છિક રાજીનામું આપ્યું છે, જેને યુનિવર્સિટી પ્રશાસને સ્વીકારી લીધું છે. ડૉ. મનીષ શાહ મૂળ કેમેસ્ટ્રી વિભાગના પ્રોફેસર હોવાથી વિભાગીય શૈક્ષણિક કામગીરી તેમજ અન્ય વહીવટી જવાબદારીઓના વધતા ભારને ધ્યાનમાં રાખીને તેમણે પરીક્ષા નિયામકના વધારાના કાર્યભારમાંથી મુક્તિ આપવા વિનંતી કરી હતી. યુનિવર્સિટી દ્વારા તેમની રજૂઆતને ગ્રાહ્ય રાખીને રાજીનામું મંજૂર કરવામાં આવ્યું છે.

ટૂંક સમયમાં નવા પરીક્ષા નિયામકની થશે જાહેરાત

યુનિવર્સિટી પ્રશાસનના જણાવ્યા અનુસાર પરીક્ષા નિયામકનું પદ અત્યંત જવાબદારીભર્યું હોવાથી ઉતાવળમાં નિર્ણય લેવામાં આવશે નહીં. હાલમાં આ પદ માટે 1થી 2 નામો વિચારણા હેઠળ છે અને સંબંધિત વ્યક્તિઓ સાથે ચર્ચા ચાલી રહી છે. પ્રશાસને સંકેત આપ્યો છે કે આગામી થોડા કલાકોમાં નવા પરીક્ષા નિયામકના નામની સત્તાવાર જાહેરાત કરવામાં આવશે. આ સમગ્ર પ્રક્રિયા જવાબદારી અને પારદર્શિતા સાથે પૂર્ણ કરવામાં આવશે જેથી પરીક્ષા સંબંધિત કામગીરીમાં કોઈ વિક્ષેપ ન આવે.

મનીષ શાહના કાર્યની પ્રશંસા, વધારાના ભારને કારણે લીધો નિર્ણય

યુનિવર્સિટી પ્રશાસને જણાવ્યું કે ડૉ. મનીષ શાહે પરીક્ષા નિયામક તરીકે નોંધપાત્ર કામગીરી કરી હતી. જોકે તેઓ કેમેસ્ટ્રી વિભાગના પ્રોફેસર તરીકે શિક્ષણકાર્ય સાથે સંકળાયેલા હોવા ઉપરાંત વિભાગની આંતરિક જવાબદારીઓ અને અન્ય શૈક્ષણિક કાર્યો પણ સંભાળી રહ્યા હતા. પરીક્ષા નિયામકનો વધારાનો કાર્યભાર લાંબા સમય સુધી સંભાળવો મુશ્કેલ બનતા તેમણે ફરીથી પોતાના શૈક્ષણિક કાર્ય પર વધુ ધ્યાન કેન્દ્રિત કરવાની ઇચ્છા વ્યક્ત કરી હતી. આ રજૂઆતને ધ્યાનમાં રાખીને યુનિવર્સિટીએ તેમનો નિર્ણય સ્વીકાર્યો છે.

વિદ્યાર્થી સંગઠનોની રજૂઆતો ભૂતકાળના મુદ્દાઓ આધારિત હોવાનું સ્પષ્ટીકરણ

તાજેતરમાં વિદ્યાર્થી સંગઠનો દ્વારા શિક્ષણ મંત્રી સમક્ષ પરીક્ષા વ્યવસ્થાને લઈને કરવામાં આવેલી રજૂઆતો અંગે પણ યુનિવર્સિટીએ સ્પષ્ટતા કરી છે. પ્રશાસનના જણાવ્યા અનુસાર રજૂ કરાયેલા મોટાભાગના મુદ્દાઓ ભૂતકાળની ઘટનાઓ સાથે સંબંધિત હતા અને હાલમાં એવી સ્થિતિ નથી. પરિણામોમાં વિલંબ કે પરીક્ષા પ્રક્રિયામાં વિદ્યાર્થીઓને અન્યાય થતો હોવાના આક્ષેપોને લઈને યુનિવર્સિટીએ જણાવ્યું કે વર્તમાન સમયમાં આવી કોઈ ગંભીર સમસ્યા નોંધાઈ નથી તેમજ કોઈ વિદ્યાર્થીએ વ્યક્તિગત રીતે આવી ફરિયાદ યુનિવર્સિટી સમક્ષ નોંધાવી નથી.

પીજી એડમિશન પ્રક્રિયા સમયસર પૂર્ણ, પરિણામોની કામગીરી પણ નિયમિત

યુનિવર્સિટી પ્રશાસનના જણાવ્યા મુજબ હાલ પીજી (PG) એડમિશન પ્રક્રિયા સંપૂર્ણપણે નિયમિત રીતે ચાલી રહી છે. પ્રથમ રાઉન્ડ સફળતાપૂર્વક પૂર્ણ થઈ ગયો છે અને સેમેસ્ટર-6 પૂર્ણ કરનારા વિદ્યાર્થીઓએ પીજીમાં પ્રવેશ માટે ફોર્મ ભરવાની તેમજ એડમિશન કન્ફર્મ કરવાની પ્રક્રિયા પણ પૂર્ણ કરી દીધી છે. પ્રશાસનનું કહેવું છે કે જો પરિણામોમાં ગંભીર વિલંબ અથવા પરીક્ષા પ્રક્રિયામાં અવ્યવસ્થા હોત તો પીજી એડમિશનની પ્રક્રિયા સમયસર પૂર્ણ થઈ શકી હોત નહીં. તેથી હાલ પરીક્ષા વિભાગની કામગીરી રાબેતા મુજબ ચાલી રહી હોવાનું યુનિવર્સિટીએ સ્પષ્ટ કર્યું છે.