International: રજાઓ માણવા વિયેતનામ ગયેલા 'લાવા' કંપનીના 110ડિસ્ટ્રિબ્યુટર્સ પર આભ તૂટ્યું: બોટ પલટી જતાં 15 ભારતીયોના મોત

વિયેતનામના પ્રખ્યાત પ્રવાસી મથક ફુ ક્વોક દ્વીપ (Phu Quoc Island) નજીક એક ભયાનક બોટ દુર્ઘટના સર્જાઈ છે. દરિયામાં બોટ પલટી જવાની આ ઘટનામાં ભારતીય મોબાઈલ મેન્યુફેક્ચરિંગ કંપની 'લાવા મોબાઈલ્સ' (Lava Mobiles) ના ૧૪ ચેનલ પાર્ટનર્સ (ડિસ્ટ્રિબ્યુટર્સ) અને કંપનીના એક કર્મચારી સહિત કુલ ૧૫ ભારતીય પ્રવાસીઓના મોત નિપજ્યા છે.

અધિકારીઓ પાસેથી મળતી માહિતી મુજબ, મૃતકોમાં ૧૦ લોકો તમિલનાડુના, ૩ આંધ્રપ્રદેશના અને ૨ કેરળના રહેવાસી હતા. લાવા મોબાઈલ્સે આ ઘટના અંગે ઊંડો શોક વ્યક્ત કરીને તેને એક કલ્પના બહારની મોટી દુર્ઘટના ગણાવી છે.

લાવા કંપનીએ સત્તાવાર પોસ્ટ કરીને આપી માહિતી

લાવા કંપનીએ સોશિયલ મીડિયા પર સત્તાવાર નિવેદન જાહેર કરતા જણાવ્યું કે, "અમે અત્યંત દુઃખ સાથે જણાવી રહ્યા છીએ કે વિયેતનામના ફુ ક્વોક દ્વીપ નજીક આજે સવારે એક બોટ અકસ્માતમાં અમારા ૧૪ ચેનલ પાર્ટનર્સ અને લાવા ટીમના એક સભ્યનું દુઃખદ અવસાન થયું છે. અમારી સંવેદના અને પ્રાર્થનાઓ પીડિત પરિવારોના પ્રિયજનો સાથે છે. આ મુશ્કેલ સમયમાં કંપની તેમના પરિવારોની સાથે અડીખમ ઊભી છે."

કંપનીએ વધુમાં ઉમેર્યું કે, તેઓ વિયેતનામ સ્થિત ભારતીય દૂતાવાસ અને ત્યાંના સ્થાનિક પ્રશાસન સાથે સતત સંપર્કમાં છે. મૃતકોના પાર્થિવ દેહને વહેલી તકે ભારત પરત લાવવા માટે તમામ જરૂરી પ્રયાસો કરવામાં આવી રહ્યા છે. ભારત અને વિયેતનામ બંને દેશોમાં કંપનીની ટીમો પીડિત પરિવારોને મદદ કરી રહી છે.

રજાઓ માણવા ગયા હતા ૧૧૦ કર્મચારીઓ

આ વિદેશ પ્રવાસનું આયોજન લાવા મોબાઈલ કંપની દ્વારા કરવામાં આવ્યું હતું. દક્ષિણ ભારતમાંથી કંપનીના અંદાજે ૧૧૦ જેટલા ડિસ્ટ્રિબ્યુટર્સ અને કર્મચારીઓ વેકેશન માણવા માટે આ ટૂર પર વિયેતનામ ગયા હતા, જ્યાં સવારના સમયે આ કાળમુખો અકસ્માત નડ્યો હતો.

૨૦ લોકોએ બારીમાંથી કૂદીને બચાવ્યો જીવ

આ ભયાનક અકસ્માતમાંથી બચી ગયેલા કંપનીના કર્મચારી નિર્મલ કુમારે આપઘાતની ક્ષણો વર્ણવતા કહ્યું કે, "તે એક આખી પેક (બંધ) સ્પીડબોટ હતી, જેમાં ૩૨ મુસાફરો સવાર હતા. બોટ કિનારેથી રવાના થઈ તેના માંડ ત્રણ જ મિનિટમાં તે દરિયામાં પલટી ગઈ હતી. બોટ પલટતાં જ અમારામાંથી લગભગ ૨૦ લોકો આગળની બારી તોડીને બહાર કૂદી ગયા અને જીવ બચાવવામાં સફળ રહ્યા. પરંતુ, કમનસીબે પાછળની સીટ પર બેઠેલા ૧૫ લોકો બોટની અંદર જ ફસાઈ ગયા અને ગૂંગળામણ તેમજ ડૂબી જવાને કારણે તેમના મોત થયા."