કાળજું કંપાવતો અકસ્માત: જામનગર-રાજકોટ હાઇવે પર કારે મહિલાને ફંગોળી, હાલત ગંભીર

જામનગર-રાજકોટ હાઈવે પર આવેલ ફલ્લા ગામ પાસે એક અત્યંત ગંભીર અને કાળજું કંપાવી દેનારો માર્ગ અકસ્માત સર્જાયો છે. હાઈવે પર પૂરપાટ ઝડપે ધસી આવેલી એક ફોર વ્હીલ કારના ચાલકે રસ્તો ઓળંગી રહેલી એક મહિલાને જોરદાર ટક્કર મારી હતી. આ ટક્કર એટલી પ્રચંડ હતી કે મહિલા ફૂટબોલની જેમ હવામાં અધ્ધર ઉછળાઈને રોડ પર પટકાઈ હતી. આ સમગ્ર રૂંવાડા ઊભા કરી દેનારી ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે, જેના ફૂટેજ સોશિયલ મીડિયા પર વાયરલ થતાં ચકચાર મચી ગઈ છે.

મળતી માહિતી મુજબ, ફલ્લા ગામ પાસેથી પસાર થતા હાઈવે પર એક મહિલા રસ્તો ક્રોસ કરી રહી હતી. તે દરમિયાન રાજકોટ તરફથી જામનગર તરફ જતી એક બેફામ ગતિએ આવતી ફોર વ્હીલરના ચાલકે સ્ટેયરીંગ પરથી કાબૂ ગુમાવ્યો હતો અને રોડ પર જઈ રહેલી મહિલાને અડફેટે લીધી હતી. વાયરલ થયેલા સીસીટીવી ફૂટેજમાં સ્પષ્ટ જોઈ શકાય છે કે, કારની સ્પીડ એટલી વધારે હતી કે ટક્કર વાગતા જ મહિલા હવામાં પાંચથી છ ફૂટ ઊંચી ઉછળીને રોડની બીજી બાજુ દૂર જઈને પડી હતી. અકસ્માત સર્જીને કાર ચાલક ગાડી લઈને ઘટનાસ્થળેથી નાસી છૂટ્યો હતો.

આ ભયાનક અકસ્માતને પગલે આસપાસના સ્થાનિક લોકો અને રાહદારીઓ તાત્કાલિક મહિલાની વહારે દોડી આવ્યા હતા. ટક્કર અને પછડાટના કારણે મહિલાને માથા તેમજ શરીરના અન્ય ભાગોમાં ગંભીર ઈજાઓ પહોંચી હતી અને તે લોહીલુહાણ હાલતમાં બેભાન થઈ ગઈ હતી. સ્થાનિક લોકો દ્વારા તાત્કાલિક ૧૦૮ એમ્બ્યુલન્સને જાણ કરવામાં આવી હતી. ઈજાગ્રસ્ત મહિલાને તાત્કાલિક અસરથી નજીકની હોસ્પિટલમાં સારવાર અર્થે ખસેડવામાં આવી છે, જ્યાં તેની હાલત અત્યંત નાજુક હોવાનું જાણવા મળી રહ્યું છે.

ઘટનાની જાણ થતાં જ સ્થાનિક પોલીસની ટીમ પણ હોસ્પિટલ અને ઘટનાસ્થળે પહોંચી ગઈ હતી. પોલીસે અકસ્માત સ્થળની આસપાસથી સીસીટીવી ફૂટેજ મેળવીને કાયદેસરની કાર્યવાહી હાથ ધરી છે. ફૂટેજના આધારે અકસ્માત સર્જનાર ફોર વ્હીલ કારના નંબરની ઓળખ મેળવી ફેબામ અને ગુનાહિત બેદરકારી દાખવનાર ચાલકને ઝડપી પાડવા માટે ચક્રો ગતિમાન કર્યા છે.