જામનગરમાં જળસંકટ ટાળવા મહાનગરપાલિકાનો એક્શન પ્લાન: વરસાદ ખેંચાશે તો ડેમોમાં 'સૌની યોજના'નું પાણી અપાશે

જામનગર શહેરમાં ચોમાસાની શરૂઆત નબળી રહેતા અને જુલાઈ માસ અડધો વીતી જવા છતાં વરસાદ ન પડતા મહાનગરપાલિકા ચિંતિત બની છે. નાગરિકોને પીવાના પાણીની કોઈ અછત ન સર્જાય તે માટે તંત્ર દ્વારા આગોતરો એક્શન પ્લાન તૈયાર કરી લેવામાં આવ્યો છે. જો વરસાદ પાછોતરો પડશે તો 'સૌની યોજના' મારફતે નગરને પાણી પૂરું પાડતા ડેમોમાં નર્મદાના નીર ઠાલવવાની તૈયારીઓ શરૂ કરી દેવામાં આવી છે.

જુલાઈ અડધો વીતવા છતાં વરસાદ ન પડતા તંત્ર એલર્ટ 

હાલમાં જામનગર મહાનગરપાલિકા દ્વારા શહેરીજનોને એકાંતરા પાણી વિતરણ કરવામાં આવી રહ્યું છે. જુલાઈ મહિનાના 15 દિવસ પસાર થઈ ગયા હોવા છતાં મેઘરાજાની પધરામણી ન થતા તંત્રની ચિંતા વધી છે. લોકોને પીવાનું પાણી પૂરતા પ્રમાણમાં મળતું રહે અને શહેરમાં જળસંકટ ઉભું ન થાય તે માટે તંત્રએ એક નવો માસ્ટર પ્લાન ઘડી કાઢ્યો છે. આ પ્લાન અંતર્ગત સૌની યોજના હેઠળ જળાશયો ભરવા અંગે રાજ્ય સરકાર સમક્ષ સત્તાવાર માંગણી મૂકી દેવામાં આવી છે.

વર્તમાન જળાશયોમાં પાણીની સ્થિતિ 

શહેરને પીવાનું પાણી પૂરું પાડતા મુખ્ય જળાશયોની સ્થિતિ અંગે વાત કરતા વોટર વર્ક્સ વિભાગના કાર્યપાલક ઈજનેર નરેશ પટેલે માહિતી આપી હતી કે, રણજીતસાગર ડેમમાં હાલ ઓગસ્ટ મહિનાના અંત સુધી ચાલે તેટલો પીવાના પાણીનો જથ્થો ઉપલબ્ધ છે. જોકે, અન્ય મુખ્ય જળાશયો જેમ કે સસોઈ, ઊંડ-1 અને આજી-3 ડેમમાં માત્ર જુલાઈ માસના અંત સુધી જ ચાલી શકે તેટલું જ પાણી બચ્યું છે.

'સૌની યોજના' હેઠળ 550 MCFT પાણીની માંગ 

જો જુલાઈના અંત સુધીમાં નોંધપાત્ર વરસાદ નહીં પડે અથવા વરસાદ પાછોતરો રહેશે, તો નગરજનોને મુશ્કેલીમાંથી બચાવવા માટે તંત્રએ કમર કસી છે. કાર્યપાલક ઈજનેરે વધુમાં જણાવ્યું હતું કે, આગોતરા આયોજનના ભાગરૂપે રાજ્ય સરકાર સાથે પત્રવ્યવહાર કરાયો છે. આ અંતર્ગત 'સૌની યોજના' મારફતે ઊંડ-1 ડેમમાં 200 એમસીએફટી (MCFT), આજી-3 ડેમમાં 200 એમસીએફટી અને સસોઈ ડેમમાં 150 એમસીએફટી પાણી છોડવાની માંગ કરવામાં આવી છે.