જય રણછોડના નાદથી ગુંજી ઉઠ્યું મંદિર પરિસર :: અમદાવાદમાં ભગવાનની ‘નેત્રોત્સવ વિધિ’ શરૂ, અદભુત દર્શન કરવા ભક્તો ઉમટ્યા

અષાઢી બીજના પાવન પર્વે આયોજિત 149મી રથયાત્રાના મંગલમય આરંભ પૂર્વે અમદાવાદના ઐતિહાસિક જગન્નાથ મંદિરમાં આજે અમાસના દિવસે ભક્તિનો સાગર છલકાયો હતો. ભગવાન જગન્નાથજી, સુભદ્રાજી અને બલભદ્રજી મોસાળથી પરત ફર્યા બાદ ગર્ભગૃહમાં રત્નવેદી પર બિરાજમાન થયા હતા. આ અવસરે વહેલી સવારથી જ મંદિર પરિસર ‘જય રણછોડ, માખણ ચોર’ અને ‘જય જગન્નાથ’ ના નાદથી ગુંજી ઉઠ્યું હતું. પરંપરાગત અને શાસ્ત્રોક્ત વિધિ મુજબ આશરે 30 યજમાનો દ્વારા મંત્રોચ્ચાર સાથે નેત્રોત્સવ પૂજન વિધિનો પ્રારંભ કરવામાં આવ્યો હતો. ધાર્મિક માન્યતા એવી છે કે, મોસાળ સરસપુરમાં ભક્તો દ્વારા અતિશય લાડ લડાવવાને કારણે અને અવનવી વાનગીઓના ભોગને લીધે ભગવાનને આંખો આવી જાય છે, જેના કારણે તેમના નેત્રો પર પાટા બાંધવામાં આવે છે. આ પાટા ખોલવાની વિધિ એટલે કે નેત્રોત્સવ પૂજન દ્વારા વરુણદેવને રીઝવીને પ્રભુની આંખોને ઠંડક પહોંચાડવાની વિશેષ વૈદિક અર્ચના કરવામાં આવે છે.

ગજવેશના અલૌકિક દર્શન અને મહાઆરતી
નેત્રોત્સવ પૂજા સંપન્ન થયા બાદ એક અત્યંત વિશેષ અને અલૌકિક ઘટના ઘટી હતી. જેવી ભગવાનના નેત્રો પરથી પાટા ખોલવામાં આવ્યા, કે તરત જ પ્રભુએ દિવ્ય ‘ગજવેશ’ એટલે કે ગણેશ સ્વરૂપ ધારણ કર્યું હતું. આ વર્ષમાં માત્ર એક જ વાર મળતા ગજવેશના દર્શનનો લહાવો લેવા માટે હજારો શ્રદ્ધાળુઓ ઉમટી પડ્યા હતા. આ પવિત્ર ક્ષણના સાક્ષી બનવા માટે ભક્તોમાં અદમ્ય ઉત્સાહ જોવા મળ્યો હતો. નેત્રોત્સવ બાદ મંદિરમાં ધ્વજારોહણની વિધિ કરવામાં આવશે અને ત્યારબાદ મહાઆરતીનું આયોજન કરવામાં આવ્યું છે, જેમાં મોટી સંખ્યામાં ભાવિકોએ જોડાશે. 15 દિવસના મોસાળના પ્રવાસ બાદ પ્રભુના આ સ્વરૂપના દર્શન કરીને ભક્તો ભાવવિભોર બની ગયા હતા. મહંત દિલીપદાસજી મહારાજની નિશ્રામાં યોજાયેલા આ તમામ કાર્યક્રમો દરમિયાન મંદિર પરિસરમાં અત્યંત પવિત્ર અને ભક્તિમય માહોલ છવાઈ ગયો હતો.

સાધુ-સંતોનો ભંડારો અને રથયાત્રાની પૂર્વ તૈયારી
નેત્રોત્સવ અને ગજવેશ દર્શનની સાથે જ રથયાત્રાને લઈને તૈયારીઓને આખરી ઓપ આપવામાં આવ્યો છે. સવારે  11 વાગ્યાના સુમારે સાધુ-સંતો માટે વિશેષ ભંડારાનું આયોજન કરવામાં આવ્યું છે અને સાથે જ વસ્ત્રદાન સમારંભ પણ યોજાશે. સમગ્ર દેશભરમાંથી પધારેલા સાધુ-સંતોનું સન્માન કરવામાં આવ્યું હતું. રથયાત્રાની હવે ગણતરીના દિવસો બાકી રહી હોવાથી ભક્તોમાં ભારે ઉત્સુકતા અને આતુરતા જોવા મળી રહી છે. 149મી રથયાત્રાને લઈને સુરક્ષા વ્યવસ્થાથી લઈને રથના માર્ગો સુધીની તમામ તૈયારીઓ પૂર્ણતાના આરે છે. અમાસના આ પવિત્ર દિવસે થયેલી આ શાસ્ત્રોક્ત વિધિઓ અને પ્રભુના દર્શને ભક્તોના હૃદયમાં ભક્તિની નવી ચેતના જગાવી છે. રથયાત્રાના પાવન પર્વને વધાવવા માટે સમગ્ર અમદાવાદ નગરી સજ્જ થઈ છે અને ભક્તો આતુરતાથી રથયાત્રાની રાહ જોઈ રહ્યા છે.