વૃંદાવનના વાઘા અને માણેકચોકના દાગીના: જગન્નાથજીની 149મી રથયાત્રામાં દવે પરિવારને મળ્યું ભગવાનનું 'મામેરું' કરવાનું પરમ સૌભાગ્ય

અમદાવાદમાં ભગવાન જગન્નાથજીની 149મી રથયાત્રાને લઈને ભક્તોમાં ભારે ઉત્સાહ જોવા મળી રહ્યો છે, ત્યારે આ વર્ષે મોસાળ ગણાતા સરસપુરમાં ભગવાનનું પરમ આકર્ષણ એવું 'મામેરું' કરવાનો સુઅવસર સરસપુરના જ વતની અને ઉદ્યોગપતિ તેજસ દવેના પરિવારને પ્રાપ્ત થયો છે. વર્ષોની પ્રતીક્ષા અને ડ્રો પદ્ધતિ દ્વારા પસંદગી પામ્યા બાદ, દવે પરિવારે ભગવાન જગન્નાથ, ભાઈ બળભદ્ર અને બહેન સુભદ્રાજી માટે ભક્તિભાવપૂર્વક વિશેષ વાઘા અને સોના-ચાંદીના કિંમતી અલંકારો તૈયાર કરાવ્યા છે. આ પાવન પ્રસંગે તેમના નિવાસ્થાન ખાતે ભવ્ય શોભાયાત્રા અને ભજન સંધ્યા સહિતના વિવિધ ધાર્મિક કાર્યક્રમોનું સુંદર આયોજન કરવામાં આવ્યું છે, જેમાં મોટી સંખ્યામાં શ્રદ્ધાળુઓ ઉમટી પડ્યા છે.

નાનપણથી જ સરસપુરમાં રહીને 1 થી 5 ધોરણ સુધી અભ્યાસ કરનાર તેજસ દવેની ઈચ્છા ભગવાનના મામેરાનો લાવો લેવાની હતી. છેલ્લા 5 થી 7 વર્ષના સતત પ્રયાસો બાદ, જ્યારે તેઓ દ્વારકાની યાત્રાએ હતા ત્યારે મંદિર તરફથી ડ્રોમાં તેમનું નામ નીકળ્યાના સમાચાર મળતા જ સમગ્ર પરિવાર ભાવવિભોર થઈ ગયો હતો. 'ફૂલ નહીં તો ફૂલની પાંખડી' સમજીને પોતાની યથાશક્તિ પ્રમાણે તેમણે ભગવાનના સ્વાગતની તૈયારીઓ આરંભી દીધી હતી. આજે સવારે 9 થી 12 વાગ્યા દરમિયાન તેમના ઘરે ભગવાનના આગમન સાથે જ એક ભવ્ય અને ઉત્સાહભરી શોભાયાત્રા કાઢવામાં આવી હતી. આ મહોત્સવમાં માત્ર તેમનો પરિવાર કે સમાજ જ નહીં, પરંતુ આજુબાજુના ગામના લોકો અને સોસાયટીના રહીશો પણ દર્શનનો લાભ લેવા મોટી સંખ્યામાં ઉમટી પડ્યા હતા.

ભગવાનના મામેરાની વિશેષતા અંગે વાત કરતા તેજસ દવેએ જણાવ્યું કે ત્રણેય ભગવાનના વસ્ત્રો એટલે કે વાઘા માટેનું ખાસ કાપડ પવિત્ર ભૂમિ વૃંદાવનથી મંગાવવામાં આવ્યું છે, જેની સુંદર ડિઝાઇન દરિયાપુરમાં તૈયાર કરવામાં આવી છે. આ વાઘામાં ખાસ કરીને મોર અને મોરપીંછની અદભુત ડિઝાઇન આકર્ષણનું કેન્દ્ર બનશે. આ ઉપરાંત, ભગવાન માટેના તમામ અલંકારો, જેમાં ભવ્ય મુગટ, હાર અને કિંમતી ચેન સહિતના દાગીનાઓ અમદાવાદના સુપ્રસિદ્ધ માણેકચોક બજારમાં તૈયાર કરાવવામાં આવ્યા છે. આ દિવ્ય પ્રસંગના આયોજનના ભાગરૂપે સવારની શોભાયાત્રા અને મહાપ્રસાદ બાદ સાંજે 5 થી 7 વાગ્યા દરમિયાન ભજન સંધ્યા તેમજ રાત્રે 8 થી 11 વાગ્યા સુધી પ્રખ્યાત સરડવની ભજન મંડળીના કાર્યક્રમ અને રાત્રિ ભોજનનું ભવ્ય આયોજન કરવામાં આવ્યું છે.