International: નેતન્યાહૂએ ફોન પર વાતચીત બાદ PM મોદીનો માન્યો આભાર, ભારત-ઈઝરાયેલના સંબંધો વધુ મજબૂત કરવાનો આપ્યો કોલ

ઈઝરાયેલના પ્રધાનમંત્રી બેન્જામિન નેતન્યાહૂએ શનિવારે ભારતના પ્રધાનમંત્રી નરેન્દ્ર મોદીનો આભાર માન્યો છે અને બંને દેશો વચ્ચેના સંબંધોને વધુ ગાઢ બનાવવાનો વિશ્વાસ અપાવ્યો છે. આ પહેલા શુક્રવારે બંને નેતાઓ વચ્ચે ટેલિફોનિક વાતચીત થઈ હતી, જેમાં પશ્ચિમ એશિયાની પ્રવર્તમાન પરિસ્થિતિ અને ભારત-ઈઝરાયેલ વ્યૂહાત્મક ભાગીદારીમાં થયેલી પ્રગતિની સમીક્ષા કરવામાં આવી હતી. પ્રધાનમંત્રી નરેન્દ્ર મોદીએ સોશિયલ મીડિયા પ્લેટફોર્મ X પર પોસ્ટ કરીને આ અંગે માહિતી આપી હતી.

ભારત અને ઈઝરાયેલના સંબંધો વધુ મજબૂત કરવાનું વચન

નેતન્યાહૂએ સોશિયલ મીડિયા પ્લેટફોર્મ X પર લખ્યું, "મારા મિત્ર, ભારતના પ્રધાનમંત્રી નરેન્દ્ર મોદી, આપનો આભાર. આપણે સાથે મળીને ઈઝરાયેલ અને ભારત વચ્ચેના સંબંધોને વધુ મજબૂત બનાવતા રહીશું." નેતન્યાહૂ ભારતીય પ્રધાનમંત્રી મોદીની એ પોસ્ટનો જવાબ આપી રહ્યા હતા, જેમાં તેમણે ઈઝરાયેલના પીએમ સાથે થયેલી વાતચીતની વિગતો શેર કરી હતી.

બંને નેતાઓ વચ્ચે ફોન પર શું વાતચીત થઈ?

પીએમ મોદીએ પોતાની પોસ્ટમાં લખ્યું હતું, "મને ઈઝરાયેલના પ્રધાનમંત્રી બેન્જામિન નેતન્યાહૂનો ફોન આવ્યો હતો. અમે ભારત અને ઈઝરાયેલ વચ્ચેની ખાસ વ્યૂહાત્મક ભાગીદારીના વિવિધ પાસાઓમાં થયેલી પ્રગતિની સમીક્ષા કરી, જે સતત મજબૂત અને વિકસિત થઈ રહી છે. અમે પશ્ચિમ એશિયાની વર્તમાન પરિસ્થિતિ પર પણ વિચારોનું આદાન-પ્રદાન કર્યું." પ્રધાનમંત્રી કાર્યાલયે (PMO) જણાવ્યું કે બંને નેતાઓ ભવિષ્યમાં પણ સતત સંપર્કમાં રહેવા પર સહમત થયા છે.

પ્રધાનમંત્રી નરેન્દ્ર મોદીના કાર્યકાળ દરમિયાન ભારત અને ઈઝરાયેલના સંબંધો અભૂતપૂર્વ રીતે મજબૂત બન્યા છે. બંને દેશો સંરક્ષણ, ઈનોવેશન, ટેકનોલોજી, સાયબર સુરક્ષા અને વેપાર જેવા ક્ષેત્રોમાં ગાઢ સહયોગ જાળવી રહ્યા છે. પશ્ચિમ એશિયામાં વધી રહેલા તણાવ અને સુરક્ષાત્મક પડકારો વચ્ચે બંને નેતાઓની આ મુલાકાત/વાતચીત ખૂબ જ મહત્વપૂર્ણ માનવામાં આવી રહી છે.