International: ઈરાન સમર્થિત હુથીઓનો સાઉદી અરેબિયા પર મોટો હુમલો, રહેણાંક વિસ્તારને બનાવ્યો નિશાન; 11 લોકો ઈજાગ્રસ્ત

ઈરાન સમર્થિત યમનના હુથી બળવાખોરોએ ગુરુવારે સાઉદી અરેબિયા પર મોટો હુમલો કર્યો છે, જેમાં ૪ વર્ષના બાળક સહિત ૧૧ સામાન્ય નાગરિકો ઈજાગ્રસ્ત થયા છે. સાઉદી અરેબિયાના નેતૃત્વ હેઠળની ગઠબંધન સેનાએ શુક્રવારે માહિતી આપતા જણાવ્યું હતું કે આ હુમલા યમન સરહદ નજીકના દક્ષિણ વિસ્તાર નજરાન (Najran) માં કરવામાં આવ્યા હતા. ગઠબંધન સેનાના પ્રવક્તા મેજર જનરલ તુર્કી અલ-મલ્કીએ હુથીઓ પર આંતરરાષ્ટ્રીય માનવતાવાદી કાયદાનું ઉલ્લંઘન કરીને જાણીજોઈને નાગરિકો અને રહેણાંક વિસ્તારોને નિશાન બનાવવાનો આરોપ લગાવ્યો છે.

રહેણાંક વિસ્તારમાં રોકેટ અને શેલ છોડ્યા

સૈન્ય દ્વારા આપવામાં આવેલી માહિતી મુજબ, ગુરુવારે મોડી રાત્રે હુથી બળવાખોરો દ્વારા અંધાધૂંધ રોકેટ/રોકેટ શેલ દાગવામાં આવ્યા હતા જે નજરાનના રહેણાંક વિસ્તારોમાં પડ્યા હતા. ઈજાગ્રસ્તોમાં ૭ સાઉદી નાગરિક, ૧ યમની, ૨ ઈજિપ્તના અને ૧ પાકિસ્તાની નાગરિક સામેલ છે. અલ-મલ્કીએ ઉમેર્યું કે સાઉદી નાગરિકોમાં એક મહિલા અને ૪ વર્ષનું માસુમ બાળક પણ છે, જેઓ ગંભીર રીતે દાઝી ગયા છે.

યમનમાં હુથીઓનો સૌથી ઘાતક હુમલો

સાઉદી અરેબિયા પર કરાયેલો આ હુમલો યમનના મધ્ય અને પૂર્વીય ક્ષેત્રોમાં કરાયેલા સૌથી વિનાશક હુમલાના એક દિવસ બાદ કરવામાં આવ્યો છે. યમનમાં કરાયેલા હુમલામાં સાઉદી સમર્થિત સરકારી સેનાના ઓછામાં ઓછા ૩૦ જવાનો શહીદ થયા હતા અને ૫૦થી વધુ ઈજાગ્રસ્ત થયા હતા. યમનના અધિકારીઓએ જણાવ્યું કે મારીબ અને હદ્રામૌત પ્રાંતમાં આંતરરાષ્ટ્રીય સ્તરે માન્યતાપ્રાપ્ત સરકારના મિલિટરી કેમ્પ પર હુથીઓ દ્વારા બોમ્બમારો કરવામાં આવ્યો હતો.

એક દાયકાથી ચાલી રહ્યું છે ગૃહયુદ્ધ

વર્ષ ૨૦૧૪ માં હુથી બળવાખોરોએ રાજધાની સના પર કબજો કરી લીધા પછી યમન ગૃહયુદ્ધની લપેટમાં આવી ગયું છે. તે સમયે આંતરરાષ્ટ્રીય સ્તરે માન્યતાપ્રાપ્ત સરકારે દેશ છોડીને સાઉદી અરેબિયામાં આશરો લેવો પડ્યો હતો. ત્યારબાદ ૨૦૧૫થી સાઉદી ગઠબંધન સેનાએ આ હુથીઓ સામે મોર્ચો ખોલ્યો હતો. એક દાયકાથી વધુ સમયથી ચાલી રહેલા આ સંઘર્ષમાં લાખો લોકોએ જીવ ગુમાવ્યા છે અને યમનમાં ભારે માનવતાવાદી સંકટ સર્જાયું છે.