ગાંધીનગરમાં ચાંદીપુરા વાયરસ મુદ્દે ઉચ્ચસ્તરીય બેઠક: આરોગ્ય મંત્રીએ સર્વેલન્સ અને ફોગિંગ સઘન બનાવવા આપ્યા આદેશ

રાજ્યમાં વધી રહેલા ચાંદીપુરા વાયરસના કેસોને પગલે સચિવાલય ગાંધીનગર ખાતે આરોગ્ય મંત્રી પ્રફુલભાઈ પાનશેરીયાની અધ્યક્ષતામાં એક મહત્વપૂર્ણ સમીક્ષા બેઠક યોજાઈ હતી. આ બેઠકમાં વાયરસના નિયંત્રણ, દર્દીઓની સારવાર અને સર્વેલન્સની કામગીરીને વધુ અસરકારક બનાવવા માટે આરોગ્ય તંત્રને કડક સૂચનાઓ આપવામાં આવી છે.

શંકાસ્પદ 27 નમૂનાઓમાંથી 7 પોઝિટિવ, 3 બાળકોના મોત 

લેબોરેટરી ટેસ્ટિંગ અંગે માહિતી આપતા આરોગ્ય મંત્રીએ જણાવ્યું હતું કે, સચોટ નિદાન માટે ટેસ્ટિંગની કામગીરી ઝડપથી ચાલી રહી છે. કુલ 27 શંકાસ્પદ કેસોના નમૂનાઓમાંથી 19 ના પરિણામો પ્રાપ્ત થયા છે. જેમાં 7 કેસ પોઝિટિવ અને 12 નેગેટિવ નોંધાયા છે, જ્યારે 8 નમૂનાના રિપોર્ટ હજુ બાકી છે. ચાલુ વર્ષે ચાંદીપુરા વાયરસથી 3 પોઝિટિવ બાળકોના કમનસીબ મોત થયા છે. મંત્રીશ્રીએ આ અંગે ઊંડું દુઃખ વ્યક્ત કરી, રાજ્યમાં હવે એક પણ બાળકનું આ વાયરસથી મોત ન થાય તે માટે તંત્રને વિશેષ કાળજી લેવા તાકીદ કરી હતી.

ખાનગી ડૉક્ટરો અને IMA સાથે સંકલન, સમયસર સારવારની તાકીદ 

રોગચાળાને નાથવા આરોગ્ય વિભાગ દ્વારા ઇન્ડિયન મેડિકલ એસોસિએશનની પણ મદદ લેવામાં આવી રહી છે. રાજ્યના તમામ ચાઇલ્ડ સ્પેશિયાલિસ્ટને ગાંધીનગર મુખ્ય મથક સાથે સીધા સંકલનમાં રહેવા જણાવાયું છે. નાના સેન્ટરો અને ખાનગી ક્લિનિક ચલાવતા ડૉક્ટરોને પણ સૂચના અપાઈ છે કે, જો કોઈ શંકાસ્પદ કેસ જણાય તો પ્રાથમિક સારવાર આપીને સમય બગાડ્યા વિના બાળકને ઓક્સિજન અને વેન્ટિલેટરની સુવિધા ધરાવતી મોટી હોસ્પિટલોમાં તુરંત જ દાખલ કરવામાં આવે.

અગાઉના 61 સ્થળોએ કેસ નિયંત્રણમાં, નવા વિસ્તારોમાં કામગીરી તેજ 

વર્ષ 2024 માં રાજ્યના જે 61 સ્થળો પરથી ચાંદીપુરા વાયરસના કેસ નોંધાયા હતા, ત્યાં આરોગ્ય વિભાગની ટીમો દ્વારા દવા છંટકાવ અને જનજાગૃતિની કામગીરી પૂર્ણ કરી લેવાઈ છે. રાહતની વાત એ છે કે આ 61 સ્થળોમાંથી એક પણ જગ્યાએ નવો કેસ રિપીટ થયો નથી. જોકે, નવા જે વિસ્તારોમાં દર્દીઓ મળી આવ્યા છે ત્યાં સેન્ડફ્લાય માખીના નાશ માટે સ્પ્રે, ફોગિંગ અને સેનિટાઈઝેશનની કામગીરી યુદ્ધના ધોરણે કરવામાં આવી રહી છે. રાજ્યના તમામ આરોગ્ય કેન્દ્રો પર દવાનો પૂરતો જથ્થો ઉપલબ્ધ કરાવી દેવાયો છે.

વાલીઓને સાવચેત રહેવા તંત્રની અપીલ અને આગામી કાર્યવાહી 

મુખ્યમંત્રી ભૂપેન્દ્ર પટેલના માર્ગદર્શન હેઠળ આરોગ્ય વિભાગ દ્વારા ચાંદીપુરા વાયરસની સ્થિતિ પર સતત મોનિટરિંગ કરવામાં આવી રહ્યું છે. આરોગ્ય મંત્રીએ વાલીઓને અપીલ કરી છે કે જો બાળકમાં તાવ, ઉલટી કે બેભાન થવા જેવા લક્ષણો દેખાય, તો તુરંત જ નજીકના સરકારી આરોગ્ય કેન્દ્રનો સંપર્ક કરવો.

આ સમીક્ષા બેઠકમાં આરોગ્ય વિભાગના અધિક મુખ્ય સચિવ રાજીવ ટોપનો, શહેરી આરોગ્ય કમિશનર ડૉ. સંધ્યા ભુલ્લર, ગ્રામ્ય આરોગ્ય કમિશનર ડૉ. રતનકંવર ગઢવી ચારણ અને જાહેર આરોગ્ય અધિક નિયામક ડૉ. નિલમ પટેલ સહિતના ઉચ્ચ અધિકારીઓ ઉપસ્થિત રહ્યા હતા અને રોગચાળાને નાથવા ભવિષ્યની રણનીતિ નક્કી કરી હતી.