સુરતના પૂરગ્રસ્ત વેપારીઓ માટે રાજ્ય સરકારનું મોટું રાહત પેકેજ: 1 લાખ સુધીની રોકડ સહાય અને 30 લાખ સુધીની લોનની જાહેરાત

ગાંધીનગર: સુરત શહેરમાં તાજેતરમાં આવેલા ભારે વરસાદ અને પૂરના કારણે વેપારીઓને થયેલા વ્યાપક નુકસાનની ભરપાઈ કરવા રાજ્ય સરકારે એક વિશેષ રાહત પેકેજની જાહેરાત કરી છે. રાજ્યના મંત્રી હર્ષ સંઘવી દ્વારા જાહેર કરાયેલા આ પેકેજ અંતર્ગત અસરગ્રસ્ત વેપારીઓને 7,500 થી લઈને 1 લાખ રૂપિયા સુધીની સીધી આર્થિક સહાય અને 30 લાખ રૂપિયા સુધીની લોન તેમજ વ્યાજ સહાય આપવામાં આવશે.

લાખો રૂપિયાના નુકસાન સામે સરકારનો આર્થિક ટેકો

ગત 6 જુલાઈના રોજ સુરતમાં ખાબકેલા ભારે વરસાદને પગલે અનેક વિસ્તારોમાં જળબંબાકારની સ્થિતિ સર્જાઈ હતી. પૂરના પાણી દુકાનોમાં ઘૂસી જતાં વેપારીઓનો લાખો રૂપિયાનો માલસામાન પલળીને બરબાદ થઈ ગયો હતો. આ કપરી પરિસ્થિતિમાં વેપારીઓને ફરીથી બેઠા કરવા માટે રાજ્ય સરકારે કેબિનેટ બેઠકમાં મહત્વપૂર્ણ નિર્ણય લઈને વિશેષ રાહત પેકેજ મંજૂર કર્યું છે.

કોને કેટલી રોકડ સહાય મળશે?

સરકાર દ્વારા જાહેર કરાયેલા માપદંડો મુજબ, લારી-ગલ્લા અને રેકડી ચલાવતા અસરગ્રસ્તોને 7,500 રૂપિયાની સહાય અપાશે. 40 ફૂટ સુધીની નાની કેબિન ધરાવતા વેપારીઓને 25,000 રૂપિયા અને 40 ફૂટથી મોટી કેબિન ધરાવતા વેપારીઓને 50,000 રૂપિયા ચૂકવવામાં આવશે. જ્યારે પાકી દુકાન ધરાવતા અને નુકસાન પામેલા વેપારીઓને મહત્તમ 1 લાખ રૂપિયા સુધીની સહાય મળશે. આ સહાયનો લાભ લેવા માટે વેપારીઓએ છેલ્લા 3 મહિનાનું GST રિટર્ન ભરેલું હોવું આવશ્યક છે.

વેપાર પુનઃ શરૂ કરવા 30 લાખ સુધીની લોન અને વ્યાજ સહાય

વેપારીઓ ફરી પોતાનો ધંધો શરૂ કરી શકે તે માટે સરકારે વિશેષ લોન અને વ્યાજ સહાયની પણ જાહેરાત કરી છે. આ યોજના હેઠળ 3 વર્ષ સુધી લોનના વ્યાજ પર સરકાર 7 ટકા સહાય ચૂકવશે. GST માં 7 લાખ રૂપિયા સુધીનું ટર્નઓવર ધરાવતા વેપારીઓને 20 લાખની લોન અને 5 લાખ સુધીની વ્યાજ સહાય મળશે. 7.5 લાખ સુધીના ટર્નઓવર પર 25 લાખની લોન અને 8 લાખની વ્યાજ સહાય, તેમજ 7.5 લાખથી વધુ ટર્નઓવર ધરાવતા વેપારીઓને 30 લાખ સુધીની લોન અને 10 લાખ રૂપિયા સુધીની વ્યાજ સહાય અપાશે.

સર્વે, સફાઈ અને તાત્કાલિક કેશડોલ વિતરણ

રાહત કામગીરી અંગે માહિતી આપતા હર્ષ સંઘવીએ જણાવ્યું હતું કે, "અસરગ્રસ્ત વિસ્તારોનો સર્વે પૂર્ણ થયા બાદ તાત્કાલિક ધોરણે કેશડોલ અને ઘરવખરી સહાય ચૂકવવાની કામગીરી શરૂ કરી દેવાઈ છે." તેમણે ઉમેર્યું હતું કે હાલ શહેરમાં 9,000 જેટલા સ્વચ્છતા દૂતો સફાઈ કામગીરીમાં જોડાયેલા છે અને મેડિકલ કેમ્પ પણ કાર્યરત છે. નોંધનીય છે કે, અત્યાર સુધીમાં 19,000 થી વધુ નાગરિકોને કેશડોલ અપાઈ છે, જ્યારે રોજગાર પર અસર પડતાં 36,000 થી વધુ લોકોને વિશેષ આર્થિક સહાય પૂરી પાડવામાં આવી છે.