ગિરનારમાં સિંહના હુમલા બાદ સરકારે લીધા મહત્વના નિર્ણયો: સીડી માર્ગ 'સાયલન્સ ઝોન' જાહેર

જૂનાગઢના ગિરનાર વન્યજીવ અભયારણ્યમાં સિંહના હુમલામાં ખેડા જિલ્લાના 11 વર્ષીય બાળક મયુર ચૌહાણના દુઃખદ મૃત્યુ બાદ રાજ્ય સરકાર એક્શનમાં આવી છે. વન અને પર્યાવરણ મંત્રી અર્જુન મોઢવાડિયા અને રાજ્ય મંત્રી પ્રવિણ માળીની અધ્યક્ષતામાં મળેલી ઉચ્ચસ્તરીય બેઠકમાં ભવિષ્યમાં આવી ઘટનાઓ અટકાવવા માટે થર્મલ ડ્રોનથી મોનિટરિંગ, કાયમી ચેક પોસ્ટ અને નવી SOP તૈયાર કરવા સહિતના અત્યંત મહત્વના નિર્ણયો લેવામાં આવ્યા છે.

ગહન ચર્ચા બાદ લેવાયા મહત્વના પગલાં 

ગિરનારની નવી સીડી પર અંદાજે 50મા પગથિયા નજીક બનેલી આ કરુણ ઘટનાની રાજ્ય સરકારે ગંભીર નોંધ લીધી છે. મુખ્યમંત્રી ભૂપેન્દ્ર પટેલના માર્ગદર્શન હેઠળ વન વિભાગના ઉચ્ચ અધિકારીઓ સાથે તાકીદની બેઠક યોજાઈ હતી. ગાંધીનગર ખાતે મીડિયાને માહિતી આપતા મંત્રી અર્જુન મોઢવાડિયાએ જણાવ્યું હતું કે, વન્યજીવોની વધુ અવરજવર વાળા સંવેદનશીલ સ્થળોએ કાયમી ચેક પોસ્ટ ઊભી કરીને સતત મોનિટરિંગ કરવામાં આવશે.

કલેક્ટરની અધ્યક્ષતામાં નવી SOP બનશે 

યાત્રાળુઓની સુરક્ષા અને વન્યજીવ વ્યવસ્થાપન માટે જૂનાગઢ જિલ્લા કલેક્ટરના અધ્યક્ષસ્થાને તમામ વહીવટી વિભાગોના સંકલન સાથે એક નવી સર્વગ્રાહી સ્ટાન્ડર્ડ ઓપરેટિંગ પ્રોસિજર તૈયાર કરવામાં આવશે. આ SOP નો કડક અમલ કરાવી ઇમરજન્સી પ્રતિસાદને પણ વધુ સઘન બનાવવામાં આવશે.

સીડી માર્ગ 'સાયલન્સ ઝોન', ડ્રોનથી રખાશે નજર 

માનવ અને વન્યજીવ સંઘર્ષ ઘટાડવા માટે ગિરનાર અને દાતાર સીડી માર્ગને હવેથી ‘સાયલન્સ ઝોન’ જાહેર કરવામાં આવશે, જેથી ઘોંઘાટ ન થવાથી વન્યજીવોને અનાવશ્યક ખલેલ પહોંચે નહીં. આ સાથે સમગ્ર વિસ્તારમાં વન્યજીવોની હિલચાલ પર સતત નજર રાખવા માટે અત્યાધુનિક 'થર્મલ ડ્રોન' સર્વેલન્સ શરૂ કરવાનો નિર્ણય લેવાયો છે. યાત્રાળુઓની સુરક્ષા માટે વન વિભાગના 25 ટ્રેકર્સ કાયમી ધોરણે વોચ રાખશે.

જનજાગૃતિ અભિયાન અને સરકારની પ્રતિબદ્ધતા 

યાત્રાળુઓ અને સ્થાનિક લોકો જંગલ વિસ્તારમાં સુરક્ષિત રીતે કેવી રીતે વર્તવું તે બાબતે જાગૃત થાય તે માટે વ્યાપક જનજાગૃતિ અભિયાન ચલાવવામાં આવશે. મંત્રીએ ખાતરી આપતા જણાવ્યું હતું કે, રાજ્ય સરકાર ગિરનાર વન્યજીવ અભયારણ્યમાં યાત્રાળુઓની સુરક્ષા અને વન્યજીવ સંરક્ષણ વચ્ચે સંતુલન જળવાઈ રહે તે માટે તમામ જરૂરી પગલાં લેવા પ્રતિબદ્ધ છે.