અમદાવાદમાં પશુ હિંસકો બેફામ?: ઘાટલોડિયાની સોસાયટીમાં RWA ના નિયમોના લીરેલીરા ઉડાડી શ્વાનને ગાયબ કરાયાના આક્ષેપ

ગુજરાત મોડેલ અને સંસ્કારી નગરી ગણાતા અમદાવાદ શહેરમાંથી પશુ ક્રૂરતાની એક અત્યંત ચોંકાવનારી અને માનવતાને શરમમાં મૂકે તેવી ઘટના સામે આવી છે. અમદાવાદના ઘાટલોડિયા વિસ્તારમાં આવેલા રત્નદીપ ટાવરમાં પશુ હિંસા અને પશુઓ પ્રત્યેની ક્રૂરતાની પરાકાષ્ઠા જોવા મળી છે. મળતી માહિતી મુજબ, સોસાયટીના જ કેટલાક જવાબદાર ગણાતા સભ્યો અને હોદ્દેદારો ભેગા મળીને એક અબોલ શ્વાનની પાછળ પડ્યા હતા અને તેને ગંભીર નુકસાન પહોંચાડવાનો પ્રયાસ કરી રહ્યા હતા. જોકે, આ હિંસા સામે સોસાયટીની જ એક જાગૃત મહિલા શક્તિરૂપ બનીને સામે આવી હતી અને અબોલ જીવ પર થતો અત્યાચાર અટકાવવાનો બહાદુરીપૂર્વક પ્રયાસ કર્યો હતો.

નિયમો અને કાયદાના લીરેલીરા ઊડ્યાં 

ઘટનાની વિગતો એવી છે કે, રત્નદીપ ટાવર સોસાયટીના મોટાભાગના સભ્યો અને કમિટીના લોકો ભેગા થઈને સોસાયટીના જ પરિસરમાં રહેતા કૂતરાઓ પર પશુ હિંસા આચરી રહ્યા હતા. જ્યારે ત્યાં રહેતી એક મહિલાએ આ અમાનવીય કૃત્યનો વિરોધ કર્યો અને કાયદાનો હવાલો આપ્યો, ત્યારે સોસાયટીના લોકો વધુ ઉશ્કેરાઈ ગયા હતા. પશુ હિંસા આચરી રહેલા લોકોએ કાયદો અને વ્યવસ્થાને પડકાર ફેંકતા અહંકારભર્યા શબ્દોમાં મહિલાને ધમકાવી હતી કે, "તમારે જે કરવું હોય એ કરી લો, જેને બોલાવવા હોય એને બોલાવી લો. અમે તો આ જાનવરને પકડીશું જ અને અહીંથી કાઢીશું જ." આ પ્રકારની વર્તણૂક સ્પષ્ટ કરે છે કે સોસાયટીના સભ્યોને દેશના કાયદા કે કોઈ વહીવટી તંત્રનો કોઈ ડર રહ્યો નથી.

RWA અને AWA ના નિયમોનું સરેઆમ ઉલ્લંઘન: શું પ્રમુખ સામે થશે એક્શન?

આ ઘટના બાદ સોસાયટીના વહીવટદારો સામે અનેક સવાલો ઊભા થઈ રહ્યા છે. શું રત્નદીપ ટાવરના પ્રમુખ, સેક્રેટરી અને કમિટી સભ્યોએ રેસિડેન્ટ વેલ્ફેર એસોસિએશન અને એનિમલ વેલ્ફેર બોર્ડ ઓફ ઈન્ડિયાની ગાઈડલાઈન્સ નથી વાંચી? એનિમલ વેલ્ફેર બોર્ડના સ્પષ્ટ નિયમો છે કે સોસાયટીની હદમાં રહેતા રખડતા શ્વાનોને ત્યાંથી હટાવી શકાય નહીં કે તેમની સાથે હિંસા કરી શકાય નહીં. તો પછી આ નિયમોનું ઉલ્લંઘન કરવાની પરવાનગી સોસાયટીના હોદ્દેદારોને કોણે આપી?

જાનવર જીવતું છે કે મારી નાખવામાં આવ્યું?

સૌથી મોટો અને હૃદયદ્રાવક સવાલ એ ઊભો થાય છે કે સોસાયટીના સભ્યો જે શ્વાનને ગાડીમાં નાખીને ક્યાંક ફેંકી આવ્યા છે, તે અત્યારે કઈ હાલતમાં હશે? શું તે નિર્દોષ જાનવર હજી જીવતું હશે કે પછી સોસાયટીના લોકોએ તેને મારીને ક્યાંક ફેંકી દીધું છે? આ શંકાએ પશુ પ્રેમીઓની ઊંઘ હરામ કરી દીધી છે. જો શ્વાનનો જીવ ગયો હશે, તો આ મામલો સીધો જ ફોજદારી ગુનામાં (IPC અને ન્યાય સંહિતાની કલમો હેઠળ) પરિવર્તિત થશે, જેમાં સંડોવાયેલા તમામ લોકોને સખત સજા અને જેલની જોગવાઈ છે.

અમદાવાદમાં પશુ હિંસકો બેફામ?

આ ઘટના એ વાતનો પુરાવો છે કે અમદાવાદ શહેરમાં અબોલ જીવો પ્રત્યે સહિષ્ણુતા ઘટતી જાય છે અને પશુ હિંસકો બેફામ બન્યા છે. શું આ શહેરમાં જાનવરોને આઝાદીથી જીવવાનો કોઈ હક નથી? દેશના દરેક નાગરિકની એ ફરજ છે કે તે તમામ જીવંત પ્રાણીઓ પ્રત્યે કરુણા રાખે. પશુ કલ્યાણ સંસ્થાઓ અને સ્થાનિક એનિમલ એક્ટિવિસ્ટ્સ આ મામલે ઘાટલોડિયા પોલીસ સ્ટેશનમાં ફરિયાદ નોંધાવવાની તજવીજ હાથ ધરી રહ્યા છે.