ભાવનગર: ડીલ થાય તે પહેલાં જ ઝડપાયો ‘તરતો ખજાનો’, કરોડોની હેરાફેરીનો પર્દાફાશ

ગુજરાતમાં વન્યજીવોના અંગો અને પ્રતિબંધિત પદાર્થોની ગેરકાયદેસર હેરાફેરી અટકાવવા માટે ચાલી રહેલી ઝુંબેશ અંતર્ગત સ્ટેટ મોનિટરિંગ સેલ (SMC)ને એક મોટી સફળતા મળી છે. ભાવનગર નજીક આવેલા બુધેલ ગામના ખાર વિસ્તારમાં એસએમસીની ટીમે બાતમીના આધારે દરોડો પાડીને આંતરરાષ્ટ્રીય બજારમાં કરોડો રૂપિયાની કિંમત ધરાવતો વ્હેલ માછલીની ઉલ્ટી (એંબરગ્રીસ)નો મોટો જથ્થો ઝડપી પાડ્યો છે. આ કાળાબજાર અને ગેરકાયદેસર વેચાણના મોટા નેટવર્કનો પર્દાફાશ કરી પોલીસે ઘટનાસ્થળેથી ચાર આરોપીઓની ધરપકડ કરી છે.

મળતી વિગતો અનુસાર, સ્ટેટ મોનિટરિંગ સેલને ચોક્કસ બાતમી મળી હતી કે ભાવનગર નજીક બુધેલ ગામમાં આવેલી બ્લ્યુ સ્કાય સોસાયટી પાસે ખાર વિસ્તારની પડતર જગ્યામાં કેટલાક શખ્સો પ્રતિબંધિત એંબરગ્રીસના મોટા જથ્થા સાથે કોઈ ગ્રાહકને ડિલિવરી આપવા અથવા વેચાણનું નેટવર્ક બિછાવવા માટે એકઠા થયા છે. આ બાતમીના આધારે એસએમસીની ટીમે પ્લાન બનાવીને આખી જગ્યાને કોર્ડન કરી દરોડો પાડ્યો હતો. પોલીસ તંત્ર ત્રાટકતાં જ ત્યાં હાજર શખ્સોમાં દોડધામ મચી ગઈ હતી, પરંતુ પોલીસે તમામ શખ્સોને આબાદ રીતે દબોચી લીધા હતા.

આ શખ્સોની તલાશી લેતા તેમની પાસેથી અલગ-અલગ સાઈઝ અને આકારના, સખત ઘન પદાર્થના સફેદ, ક્રીમ અને ગોલ્ડન બ્રાઉન જેવા રંગના એંબરગ્રીસ (સ્પર્મ વ્હેલ માછલીની ઉલ્ટી)ના ટુકડા મળી આવ્યા હતા. બજાર કિંમત અનુસાર આ જથ્થાની કિંમત અંદાજે ચાર કરોડ ત્રીસ લાખ સાઠ હજાર આંકવામાં આવી છે. પોલીસે આ કિંમતી જથ્થો તેમજ અન્ય સામગ્રી સહિત કુલ ₹4,31,60,100નો મુદ્દામાલ કબજે કર્યો છે. આ મામલે આગળની કાયદેસરની તપાસ અને વન્યપ્રાણી સંરક્ષણ હેઠળ કડક કાર્યવાહી કરવા માટે ચારેય આરોપીઓ અને મુદ્દામાલને ભાવનગર જિલ્લાના વરતેજ પોલીસ સ્ટેશનને સોંપવામાં આવ્યા છે. પોલીસ અને વન વિભાગ આ નેટવર્કના મૂળ સુધી પહોંચવા માટે આગળની તપાસ ચલાવી રહ્યા છે.