અમદાવાદમાં ગોઝારો અકસ્માત: અમદાવાદમાં ગોઝારો અકસ્માત: દાણીલીમડા-શાહ આલમ રોડ પર બાઈક અને ટેમ્પો વચ્ચે ટક્કર

કોને ખબર હતી કે રોજની જેમ પોતાના ગંતવ્ય સ્થાને જવા નીકળેલો યુવક રસ્તામાં આટલા ભયાનક અકસ્માતનો ભોગ બનશે! અમદાવાદના દાણીલીમડા ચાર રસ્તાથી શાહ આલમ ટોલનાકા તરફ જતા BRTS રોડ પર કાળ બનીને આવેલા માલવાહક ટેમ્પોએ બાઈક સવાર યુવકને એવી જોરદાર ટક્કર મારી કે જોનારા લોકોના કાળજા કમ્પી ઉઠ્યા હતા. કોઈ કંઈ સમજે તે પહેલાં જ સામાન્ય લાગતો દિવસ એક મોટી દુર્ઘટનામાં ફેરવાઈ ગયો હતો. ઘાયલ યુવકને તાત્કાલિક 108 એમ્બ્યુલન્સ મારફતે સારવાર માટે હોસ્પિટલ ખસેડવામાં આવ્યો હતો.

અમદાવાદના દાણીલીમડા ચાર રસ્તાથી શાહ આલમ ટોલનાકા તરફ જતા BRTS રૂટ પર એક ગંભીર અકસ્માત સર્જાયો હતો. આ માર્ગ પર પૂરપાટ ઝડપે જઈ રહેલા એક બાઈક ચાલક અને માલવાહક ટેમ્પો વચ્ચે સામસામે જોરદાર ટક્કર થતા અકસ્માતનો બનાવ બનવા પામ્યો હતો. અકસ્માત એટલો ભયાનક હતો કે બાઈકનો કચ્ચરઘાણ નીકળી ગયો હતો અને બાઈક સવાર યુવક રોડ પર પટકાયા હતા, જેના કારણે તેને ગંભીર ઈજાઓ પહોંચી હતી. સ્થાનિક લોકો અને રાહદારીઓએ તાત્કાલિક આ ઘટનાની જાણ 108 ઈમરજન્સી સેવાને કરી હતી. ઘટનાસ્થળે પહોંચેલી 108 ની ટીમે પ્રાથમિક સારવાર આપી ઘાયલ યુવકને વધુ સારવાર માટે નજીકની હોસ્પિટલમાં ખસેડવાની તજવીજ હાથ ધરી હતી.

ટ્રાફિક અને તપાસ

અકસ્માતની આ ઘટનાને પગલે આસપાસના વિસ્તારમાં લોકોના ટોળા એકઠા થઈ ગયા હતા, જેના કારણે રસ્તા પર ટ્રાફિક જામની સમસ્યા સર્જાઈ હતી. ઘટનાની જાણ થતા જ સ્થાનિક પોલીસનો કાફલો તાત્કાલિક સ્થળ પર દોડી આવ્યો હતો અને રોડ પરથી અકસ્માતગ્રસ્ત વાહનોને ખસેડી ટ્રાફિક પૂર્વવત કરાવ્યો હતો. પોલીસે ટેમ્પો ચાલકને અટકાયતમાં લઈને આગળની તપાસ શરૂ કરી છે. પ્રાથમિક તપાસમાં અકસ્માત કયા કારણોસર સર્જાયો તે જાણવા માટે આસપાસના સીસીટીવી ફૂટેજની તપાસ કરવામાં આવી રહી છે. રસ્તા પર નિયમોનું ઉલ્લંઘન કરીને BRTS રૂટ પર વાહન ચલાવવું કેટલું જોખમી બની શકે છે, તે આ ઘટના પરથી સ્પષ્ટ જણાય આવે છે.