જસદણ ડમી સ્કૂલ કૌભાંડ વિવાદ:: DEO દિક્ષિત પટેલનું નિવેદન, ડમી પ્રવેશ હશે તો થશે કાર્યવાહી

રાજકોટ જિલ્લાના જસદણ સ્થિત આલ્ફા કોચિંગ ક્લાસમાં સામે આવેલા ડમી એડમિશનના વિવાદને લઈને શિક્ષણ વિભાગે મહત્વપૂર્ણ કાર્યવાહી શરૂ કરી છે. સમગ્ર મામલે જિલ્લા શિક્ષણાધિકારી દિક્ષિત પટેલે સ્પષ્ટતા કરતા જણાવ્યું કે 'આલ્ફા' નામની કોઈ પણ શાળા શિક્ષણ વિભાગ દ્વારા માન્ય નથી અને કોઈ પણ કોચિંગ ક્લાસને શિક્ષણ વિભાગ તરફથી માન્યતા આપવામાં આવતી નથી. હાલ સમગ્ર મામલાની પોલીસ દ્વારા તપાસ ચાલી રહી છે અને પોલીસ પાસેથી પ્રાપ્ત થયેલી વિદ્યાર્થીઓની યાદીના આધારે શિક્ષણ વિભાગે અલગ-અલગ જિલ્લાની શાળાઓમાં વિદ્યાર્થીઓના પ્રવેશ અંગે તપાસ શરૂ કરી છે.

31 શાળામાં 697 વિદ્યાર્થીઓના નામ સામે આવ્યા

પ્રાથમિક તપાસ દરમિયાન કુલ 31 શાળાઓમાં 697 વિદ્યાર્થીઓ અભ્યાસ કરતા હોવાનું સામે આવ્યું છે. આ તમામ વિદ્યાર્થીઓની વિગતવાર યાદી પ્રાદેશિક નિયામક કચેરીને મોકલી આપવામાં આવી છે જેથી સંબંધિત જિલ્લાઓમાં પણ યોગ્ય તપાસ હાથ ધરી શકાય. રાજકોટ જિલ્લામાં પણ 47 વિદ્યાર્થીઓ વિવિધ શાળાઓમાં દાખલ હોવાનું સામે આવ્યું છે. હવે આ તમામ વિદ્યાર્થીઓ નિયમિત રીતે શાળામાં હાજરી આપતા હતા કે માત્ર કાગળ પર પ્રવેશ લઈને કોચિંગ ક્લાસમાં અભ્યાસ કરતા હતા તેની ચકાસણી કરવામાં આવશે.

ડમી પ્રવેશ સાબિત થશે તો થશે કાર્યવાહી

જિલ્લા શિક્ષણાધિકારી દિક્ષિત પટેલે જણાવ્યું કે હાલ તપાસ પ્રક્રિયા ચાલી રહી છે અને તપાસ પૂર્ણ થયા વગર કોઈ નિષ્કર્ષ પર પહોંચવું યોગ્ય નથી. જો તપાસ દરમિયાન એવું સામે આવશે કે વિદ્યાર્થીઓએ માત્ર ડમી પ્રવેશ લીધો હતો અને નિયમિત રીતે શાળામાં હાજરી આપતા ન હતા તો શિક્ષણ વિભાગ દ્વારા નિયમો અનુસાર કાર્યવાહી હાથ ધરવામાં આવશે. હાલમાં તમામ શાળાઓના હાજરી રેકોર્ડ, પ્રવેશ પ્રક્રિયા અને અન્ય દસ્તાવેજોની ચકાસણી કરવામાં આવી રહી છે.

રાજકોટ ઉપરાંત અનેક જિલ્લાઓના વિદ્યાર્થીઓનો સમાવેશ

શિક્ષણ વિભાગે પોલીસ પાસેથી મળેલી માહિતીના આધારે અલગ-અલગ જિલ્લાઓમાં વિદ્યાર્થીઓ ક્યાં અભ્યાસ કરે છે તેની વિગતો એકત્ર કરી છે. તેમાં અમદાવાદના 8, અમરેલીના 5, અરવલ્લીના 10, ગીર સોમનાથના 48, તેમજ જામનગર અને જૂનાગઢ જિલ્લાના મળીને 29 વિદ્યાર્થીઓનો સમાવેશ થાય છે. આ ઉપરાંત અન્ય જિલ્લાઓમાં પણ વિદ્યાર્થીઓ વિવિધ શાળાઓમાં દાખલ હોવાનું સામે આવ્યું છે. જિલ્લા શિક્ષણાધિકારીએ જણાવ્યું કે અન્ય જિલ્લાઓમાં સીધી કાર્યવાહી કરવાની સત્તા સ્થાનિક જિલ્લા શિક્ષણ વિભાગ પાસે ન હોવાથી સમગ્ર માહિતી નિયામક કચેરીને મોકલી દેવામાં આવી છે. હવે નિયામક કચેરી સંબંધિત જિલ્લાઓને જરૂરી સૂચનાઓ આપશે અને આગળની તપાસ હાથ ધરાશે.

કોચિંગ ક્લાસ પર શિક્ષણ વિભાગનું નિયંત્રણ નથી

દિક્ષિત પટેલે વધુમાં સ્પષ્ટ કર્યું કે કોચિંગ ક્લાસો શિક્ષણ વિભાગના નિયંત્રણ હેઠળ આવતા નથી. તેથી આવા ક્લાસોને મંજૂરી આપવાની કે તેમની કામગીરી પર સીધી કાર્યવાહી કરવાની કોઈ પ્રક્રિયા શિક્ષણ વિભાગ પાસે ઉપલબ્ધ નથી. આ મામલામાં શિક્ષણ વિભાગની ભૂમિકા માત્ર વિદ્યાર્થીઓ કઈ શાળામાં દાખલ છે અને તેમની શૈક્ષણિક હાજરી અંગે તપાસ કરવાની છે. કોચિંગ ક્લાસની કામગીરી સંબંધિત મુદ્દાઓ પોલીસ તપાસનો વિષય છે.

તપાસ પૂર્ણ થયા બાદ જ અંતિમ નિર્ણય

શિક્ષણ વિભાગે જણાવ્યું છે કે હાલ સમગ્ર પ્રક્રિયા તપાસના તબક્કામાં છે અને દરેક વિદ્યાર્થીની હાજરી, પ્રવેશ અને શૈક્ષણિક રેકોર્ડની વિગતવાર ચકાસણી કરવામાં આવી રહી છે. તપાસ પૂર્ણ થયા બાદ જ સ્પષ્ટ થશે કે ક્યાંય ડમી એડમિશનની ગેરરીતિ થઈ છે કે નહીં. જો કોઈપણ પ્રકારની અનિયમિતતા અથવા નિયમભંગ સામે આવશે તો સંબંધિત શાળા અને જવાબદાર વ્યક્તિઓ સામે નિયમો મુજબ કડક કાર્યવાહી કરવામાં આવશે. હાલ શિક્ષણ વિભાગ અને પોલીસ બંને તંત્ર સંકલન સાથે સમગ્ર મામલાની તપાસ આગળ ધપાવી રહ્યા છે.