ઉનાકાંડના 10 વર્ષ બાદ પણ ન્યાય અધૂરો: ઉનાકાંડના 10 વર્ષ બાદ પણ ન્યાય અધૂરો! : કોંગ્રેસ સહિત દલિત આગેવાનોનો સરકાર સામે આક્રોશ, જિગ્નેશ મેવાણીએ કર્યા આક્ષેપો

ઉનાકાંડની ઘટનાને 10 વર્ષ પૂર્ણ થવા છતાં પીડિતોને ન્યાય ન મળતા ગુજરાતના દલિત સમાજમાં ભારે રોષની લાગણી જોવા મળી રહી છે. આ સંદર્ભમાં અમદાવાદના નિકોલ સ્થિત મંગળ પાંડે હોલ ખાતે એક મહત્વપૂર્ણ ચર્ચા-મંથન કાર્યક્રમનું આયોજન કરવામાં આવ્યું હતું, જેમાં કોંગ્રેસના ધારાસભ્ય જિગ્નેશ મેવાણી સહિત દલિત સમાજના અનેક અગ્રણીઓ અને સામાજિક કાર્યકર્તાઓ એકત્રિત થયા હતા. કાર્યક્રમના પ્રારંભમાં જિગ્નેશ મેવાણીએ આ ઘટનાને માનવતા પરનો કલંક ગણાવતા જણાવ્યું હતું કે, 10 વર્ષ પહેલાં ગીર સોમનાથના મોટા સમઢિયાળા ગામના બાલુભાઈ સરવૈયા અને તેમના પરિવારજનો પર ગૌરક્ષકોના નામે કેટલાક ગુંડાઓ દ્વારા જે અમાનવીય અત્યાચાર ગુજારવામાં આવ્યો હતો, તેની યાદ આજે પણ દલિત સમાજને હચમચાવી દે છે. પોલીસની હાજરીમાં બનેલી આ ઘટનાએ સમગ્ર દેશમાં ઘેરા પ્રત્યાઘાતો જન્માવ્યા હતા અને તત્કાલીન સમયે દેશના મોટા નેતાઓ પણ પીડિતોના સમર્થનમાં આગળ આવ્યા હતા, છતાં દાયકા પછી પણ પરિસ્થિતિમાં કોઈ ખાસ સુધારો જોવા મળ્યો નથી.

અદાલતી ચુકાદા પર અસંતોષ અને અપીલની માંગ

ઘટનાના 10 વર્ષ બાદ તાજેતરમાં આવેલા અદાલતી ચુકાદાએ પીડિતો અને દલિત સમાજને ભારે નિરાશ કર્યા છે. આ મામલે જિગ્નેશ મેવાણીએ આક્ષેપ કર્યો હતો કે, જે 42 આરોપીઓ સામે સ્પષ્ટ પુરાવા હતા અને જેઓ પીડિતોને મારતા વીડિયોમાં પણ દેખાય છે, તેમાંથી મોટાભાગના આરોપીઓને મુક્ત કરી દેવાયા છે અને માત્ર 5 લોકોને સજા થઈ છે. આ ચુકાદાથી દલિત સમાજની લાગણી દુભાઈ છે, તેથી સમાજની એવી માંગ છે કે પીડિત પરિવાર તો અપીલમાં જશે જ, પરંતુ રાજ્ય સરકાર પણ સામાજિક ન્યાય સુનિશ્ચિત કરવા માટે હાઈકોર્ટમાં અપીલ દાખલ કરે. એટલું જ નહીં, સરકાર આ કેસ માટે હાઈકોર્ટમાં ટોચના વકીલની નિમણૂક કરીને પીડિતોને ન્યાય અપાવવામાં મદદરૂપ બને તેવી અપીલ પણ કરવામાં આવી છે.

સરકાર સામે વચનભંગનો આક્ષેપ

સંમેલનમાં મુખ્ય મુદ્દો તત્કાલીન મુખ્યમંત્રી આનંદીબેન પટેલે પીડિત પરિવારને આપેલા વચનોનો રહ્યો હતો. પીડિતોએ આક્ષેપ કર્યો હતો કે તેમને ખેતીની જમીન, સરકારી નોકરી અને ઘર માટે પ્લોટ આપવાનું વચન આપવામાં આવ્યું હતું, પરંતુ 10 વર્ષ વીતી ગયા છતાં એક પણ વચન પૂર્ણ કરવામાં આવ્યું નથી. ઘર માટેની સહાયના પણ માત્ર એક-એક હપ્તા ચૂકવીને સંતોષ માની લેવામાં આવ્યો છે અને અન્ય કોઈ સરકારી સહાય કે વચનો પૂરા થયા નથી. 

રાજકીય નિવેદનો અને અપેક્ષાઓ

વડાપ્રધાન નરેન્દ્ર મોદીના દલિતો પ્રત્યેના નિવેદનો પર આકરા પ્રહાર કરતા જિગ્નેશ મેવાણીએ તેને નાટ્યશાસ્ત્ર ગણાવ્યું હતું. તેમણે કહ્યું હતું કે, એક તરફ દલિતોને પોતાના ભાઈ ગણાવવાની વાતો કરવામાં આવે છે, તો બીજી તરફ તેમના જ પુસ્તક 'કર્મયોગી'માં સફાઈ કર્મચારીઓ વિશે અપમાનજનક ટિપ્પણીઓ કરવામાં આવી છે, જે ભાજપ સરકારની દલિત વિરોધી માનસિકતા દર્શાવે છે. આ સંમેલનમાં એક ઠરાવ કરવામાં આવ્યો હતો કે, હવે આ મામલે દલિત સમાજનું એક પ્રતિનિધિમંડળ રાજ્યના મુખ્યમંત્રીને રૂબરૂ મળીને પોતાની માંગણીઓ રજૂ કરશે. જો સરકાર આ માંગણીઓનો સકારાત્મક નિકાલ નહીં લાવે, તો મોટા પાયે સંમેલનો યોજીને સરકાર વિરુદ્ધ ઉગ્ર લડત આપવામાં આવશે અને ભાજપને પાડી દેવાનો કોલ પણ આપવામાં આવશે.

જીગ્નેશ મેવાણીએ વધુમાં જણાવ્યું હતું કે અમારી મુખ્ય ત્રણ માંગણીઓ છે. પહેલી માંગણી એ છે કે, જે તે સમયે આનંદીબેન પટેલે જે પીડિત પરિવારોને ખેતીની જમીન, સરકારી નોકરી અને ઘરનો પ્લોટ આપવાનું વચન આપ્યું હતું, તેનું એક પણ વચન પૂરું થયું નથી. તેથી હવે આ વચન પણ પૂરું કરવામાં આવે. જો રાજ્યની સરકાર આ વચનો પૂરા નહીં કરે, તો હવે અમારે ફરી એકવાર ઉગ્ર આંદોલન કરવાની ફરજ પડશે.

વધુમાં, જિગ્નેશ મેવાણી એકમાત્ર ધારાસભ્ય છે જે આ લડત ચલાવી રહ્યા છે, જો આ ધારાસભ્ય લડત ચલાવે તો સરકાર પર દબાણ પણ બને, તો જે અન્ય પાર્ટીમાં રહેલા ધારાસભ્યો છે, તેઓ કેમ નથી લડતા અને તેમને દલિત સમાજ પ્રત્યે કેમ પ્રેમ નથી? તે લોકો તો ધૃતરાષ્ટ્ર મૌન ધારણ કરીને બેઠા છે. તેઓ ગુજરાતના 50 લાખ દલિતોના પ્રતિનિધિ નહીં, પણ ભારતીય જનતા પાર્ટીના પગલૂછણિયા છે. આવા પગલૂછણિયાઓ પાસેથી ગુજરાતના 50 લાખ દલિતોને કોઈ અપેક્ષા નથી.

છેલ્લે, અમે આ ત્રણ માંગણીઓને લઈને રાજ્યના મુખ્યમંત્રીને મળવા જઈશું. એક ડેલિગેશન સ્વરૂપે જઈશું. જો સરકાર આ માંગણીઓનો સકારાત્મક નિકાલ નહીં લાવે, તો મોટા પાયે સંમેલનો યોજીને સરકાર વિરુદ્ધ ઉગ્ર લડત આપવામાં આવશે અને ભાજપને પાડી દેવાનો કોલ પણ આપવામાં આવશે.