International: ભારત તેજસમાં ફસાયું, ચીન પાકિસ્તાન માટે ઝડપથી બનાવી રહ્યું છે J-35 સ્ટીલ્થ જેટ; જાણો ભારત પર શું થશે અસર?

પાકિસ્તાની મીડિયા અને ડિફેન્સ વેબસાઇટ્સ દ્વારા દાવો કરવામાં આવ્યો છે કે ચીન પાસેથી પાકિસ્તાનને ટૂંક સમયમાં જ J-35 સ્ટીલ્થ ફાઇટર જેટ (J-35 Stealth Fighter Jet) મળવા જઈ રહ્યું છે. અહેવાલો અનુસાર, ચીનની શિનયાંગ એરક્રાફ્ટ કોર્પોરેશન એક મહત્વપૂર્ણ ઔદ્યોગિક તબક્કામાં પહોંચી ગઈ છે અને તેણે પોતાની એસેમ્બલી ક્ષમતા બમણી કરી દીધી છે, જેથી ઘરેલું સેના અને પાકિસ્તાન બંનેના ઓર્ડર સમયસર પૂરા કરી શકાય. પાકિસ્તાની સેનાએ પણ આ ડીલ અંગે ઈશારો કર્યો છે.

શું છે J-35 ફાઇટર જેટ અને ચીનનો માસ્ટર પ્લાન?

J-35 એ પાંચમી પેઢીનું (5th Generation) અત્યાધુનિક સ્ટીલ્થ લડાયક વિમાન છે, જે વાયુસેના અને નૌસેના બંને માટે તૈયાર કરવામાં આવ્યું છે.

• પ્રોડક્શન ક્ષમતા બમણી: ચીનની કંપનીએ એક વિશાળ એસેમ્બલી કોમ્પ્લેક્સનું નિર્માણ કર્યું છે જે ૨૦૨૬ સુધીમાં સંપૂર્ણ ક્ષમતા સાથે કામ કરવા લાગશે. ચીને આગામી ૩ થી ૫ વર્ષમાં પોતાના ફાઇટર જેટનું ઉત્પાદન બમણું કરવાની જાહેરાત કરી છે.

• પાકિસ્તાનનો મોટો ઓર્ડર: અહેવાલો અનુસાર, પાકિસ્તાન ચીન પાસેથી ૪૦ જેટલા J-35A સ્ટીલ્થ વિમાનો ખરીદવાની તૈયારીમાં છે. આ સિવાય પાકિસ્તાન ચીન પાસેથી KJ-500 અવાક્સ (Awacs) એરક્રાફ્ટ અને HQ-19 એર ડિફેન્સ સિસ્ટમ પણ ખરીદી રહ્યું છે.

ભારત માટે કેમ ચિંતાનો વિષય?

પાકિસ્તાન તરફથી પાંચમી પેઢીના સ્ટીલ્થ જેટ મેળવવાના દાવા વચ્ચે ભારત માટે મુશ્કેલી એ છે કે ભારતીય વાયુસેના (IAF) પાસે હાલમાં કોઈ સ્ટીલ્થ ફાઇટર જેટ નથી. બીજી તરફ, ભારત પોતાના સ્વદેશી લડાયક વિમાન 'તેજસ' (Tejas) ના એન્જિનની ડિલિવરી માટે અમેરિકા પર નિર્ભર છે, જ્યાંથી સપ્લાય ખૂબ જ ધીમી ગતિએ થઈ રહ્યો છે. ભારત ભવિષ્યમાં કોઈ સ્ટીલ્થ જેટ ખરીદશે કે કેમ તે અંગે હજુ કોઈ અંતિમ નિર્ણય લેવાયો નથી.

ભારતીય વાયુસેના પર શું થશે અસર?

ચીનની આ સુપરફાસ્ટ પ્રોડક્શન સ્પીડથી ભારત અને પશ્ચિમી દેશોના સૈન્ય આયોજકો પર દબાણ વધશે. જો પાકિસ્તાનને J-35 મળશે, તો ભારતીય આકાશમાં મુખ્ય મુકાબલો ભારતના સૌથી એડવાન્સ વિમાન 'રાફેલ' (Rafale) અને J-35 વચ્ચે થશે:

રાફેલ વર્સિસ J-35: J-35 માત્ર તેની 'સ્ટીલ્થ' (રાડારની નજરમાં ન આવવાની) ક્ષમતાના મામલામાં રાફેલ કરતાં આગળ હોઈ શકે છે. પરંતુ, રાફેલની શાનદાર કોમ્બેટ ક્ષમતા, ભારતીય વાયુસેના પાસે રહેલી અદભુત રણનીતિ અને રશિયન S-400 એર ડિફેન્સ સિસ્ટમ ના કારણે ભારત કોઈપણ પાકિસ્તાની કે ચીની ખતરાને હવામાં જ નેસ્તનાબૂદ કરવા માટે સક્ષમ છે.